म्याग्दीको बेनी नगरपालिका-९ तोरीपानीकी १९ वर्षीया मीना परियार सात महिनादेखि बेपत्ता छिन्। २०८० पुस १६ गते राति घरबाटै बेपत्ता भएकी परियारको अहिलेसम्म कुनै अत्तोपत्तो छैन। बेपत्ता भएको दिन बिहान ११ बजेसम्म स्थानीय युवा राम खत्रीसँगै रहेको तथ्य फेला परे पनि त्यसयता मीनाको स्थिति अज्ञात छ।
आफन्त, शुभचिन्तक, दलित अधिकारकर्मीहरूको सहयोगमा सदरमुकाम बेनीमा ‘कि सास चाहियो कि लास’ भन्दै सुरु गरिएको आन्दोलनमा बुवा ६० वर्षीय चन्द्र परियार र आमा ५९ वर्षीया भूलमाया परियार पनि सहभागी छन्।
अनेक दुःख, पीडाका बिच हुर्काइएकी छोरी मीनालाई गाउँघर, खोलाकिनार सबैतिर खोजतलास गरे पनि फेला नपरेपछि बुवाआमा, आफन्तजन सबै चिन्तित छन्। मीनाको खोजीका लागि प्रमाणसहित प्रहरी कार्यालयमा उजुरी गरेपछि पक्राउ परेका खत्रीलाई जिल्ला अदालतले पुर्पक्ष थुनामा राखेको छ। तर पनि छोरीका बारेमा केही पत्ता नलागेपछि परियार दम्पतीले छोरीको खोजीका लागि सबैसमक्ष अपिल गरिरहेको छ। ‘छोरी गायब बनेदेखि नै भोकनिद्रा हराएको छ। छोरी फर्किने आशामा दबाब दिन बेनी आएको हुँ,’ चन्द्र परियारले भने।
मीनाकी भाउजू कमला बर्देवा नेपालीले घरमा सुतिरहेको अवस्थामा एक्कासि बेपत्ता भएकी नन्द मीना सात महिनासम्म नफर्किंदा अनेक सोच्न बाध्य भएको बताइन्। उनले मिलेमतोमा घटना घटाइएको दाबी गरेकी छन्। ‘न्याय नपाएपछि बाध्य भएर सडकमा आन्दोलन गर्नुपरेको छ,’ उनले भनिन्।
बेपत्ता बनाउनेका बारेमा पर्याप्त प्रमाण हुँदा समेत न्याय नपाएको र सामाजिक दुर्व्यवहार सहनुपरेको कमलाको भनाइ छ। मीनाका आफन्तजनले घटनाको वास्तविक पहिचान गर्न सम्बन्धित निकायबाट अभियुक्तसँग जोडिएर अनुसन्धान गर्ने विषयमा चासो कम देखिएको गुनासो गरेका छन्। बेपत्ता मीनालाई न्याय दिन दलित समुदायसम्बद्ध विभिन्न संघसंस्थाले समेत वास्तविकता सार्वजनिक नगरेसम्म र दोषीमाथि कारबाही नभएसम्म धर्ना र दबाबका चरणबद्ध कार्यक्रम गरिने बताएका छन्।
यता अनुसन्धानकै क्रममा कारागार पठाइएका अभियुक्त खत्रीले मीनासँग प्रेम सम्बन्ध रहेको र यौन सम्पर्कसमेत राखेको स्वीकार गरे पनि आफूले बेपत्ता नबनाएको बताएका छन्।
पुर्पक्षमा राखेर अनुसन्धान अघि बढाउन कारागार पठाउने आदेशपछि पनि मीनाबारे केही नयाँ तथ्य सार्वजनिक भएको छैन। मीना र अभियुक्त खत्रीबिच सामाजिक सञ्जालमा कुराकानी भएको, खेत जोत्ने बेलामा चिनजान भएको, शारीरिक सम्बन्ध भएको, ६ महिनाको गर्भ रहेको, भागेर भारत जाने सल्लाह भएकोबारे खुलाए पनि बेपत्ता गराएको भन्ने आरोप स्वीकार गर्न खत्री तयार छैनन्।
मुलुकी अपराध संहिता २०७४ दफा २०७ को उपदफा १ बमोजिम बेपत्ता पार्ने अभियोग लागेका खत्रीलाई १५ वर्ष कैद र पाँच लाख रूपैयाँसम्म जरिवाना गरी पीडित पक्षलाई क्षतिपूर्ति भराउन माग गरिएको छ। बेपत्ता मीनाको मोबाइलको अन्तिम ‘लोकेसन’ उत्तरी म्याग्दीको बैसरी आसपासको क्षेत्र देखिएको थियो। २० वर्षभन्दा तलको उमेर भएकी किशोरीसँग सहमतिमै सम्बन्ध राख्न कानुनले अवैध मान्ने भएकाले थप काननुसमेत आकर्षित हुने जानकारहरू बताउँछन्।
