बेनी नगरपालिका वडा नं १ रत्नेचौरस्थित भानु माविका कक्षा ११÷१२का विद्यार्थीलाई भिमकुमारी महत स्मृति अक्षयकोषले पाठ्यक्रम र शैक्षिक साम्रागी वितरण गरेको छ । समाजसेवी सबी थापाले आफ्नी स्वर्गीय आमाको स्मृतिमा विद्यालयमा स्थापना गर्नुभएको कोषबाट विद्यार्थीलाई १३ हजार बराबरको शैक्षिक साम्रागी र पाठयपुस्तक सहयोग गरिएको कोषका सदस्य एकेन्द्र बहादुर महतले जानकारी दिनुभयो ।
वडा अध्यक्ष टेक बहादुर थापाको प्रमुख आतिथ्यतामा आयोजित कार्यक्रममा समाजसेवी सबी थापा र इन्द्र थापाले हरेक बर्ष विपन्न, जेहेन्दार विद्यार्थीलाई सहयोग गर्ने गरेकोमा धन्यवाद दिदैं आगामी दिनमा पनि विद्यालयलाई निरन्तर सहयोग गर्न अनुरोध गर्नुभएको थियो । सहयोग हस्तान्तरण कार्यक्रमको अध्यक्षता कोषका अध्यक्ष नेत्रबहादुर महत, स्वागत निर्वतमान प्रअ भरत खत्री, मन्तब्य प्रअ दिनेश बोगटीले राख्नुभएको थियो ।
यसअगाडी आफ्नै आमाको स्मृतिमा सबी थपाले बेनी नगरपालिका–४,थामडाँडामास्थित भृकुटी आधारभुत विद्यालयमा १ लाखको ‘भिमकुमारी महत स्मृति कोष’ अक्षयकोष स्थापना गर्नुभएको थियो ।
उक्त कोषबाट विद्यालयमा अध्ययनरत गरीब, विपन्न, जेहेन्दार र उत्कृष्ट विद्यार्थीलाई लक्षित उक्त छात्रवृत्ति दिइने छ । हाल अमेरिकामा रहनुभएका इशा फाउण्डेशनका संस्थापक समेत रहनुभएका शवी र इन्द्र थापादम्पत्तीले म्याग्दीमा विपन्नको उपचार, अभिभावकविहिन बालबालिकाको उच्च शिक्षासम्मको शैक्षिक अभिभावकत्व ग्रहण गदैं आउनुभएको छ ।
