म्याग्दी जिल्लामा चालु आर्थिक वर्ष २०८०–८१ मा सात वटा झोलुङ्गे पुल निर्माण भएको छ । झोलुङ्गे पुल क्षेत्रगत कार्यक्रम (स्वाप), टिबिएसयु, स्थानीय तह, समुदाय र गैरसरकारी संस्था मिलन म्याग्दीको साझेदारीमा थप ३ वटा झोलुङ्गे पुल निर्माणाधीन छन् ।
टिभिएसयुमार्फत स्थानीय तहले प्राप्त गर्ने बजेटबाट सामाजिक तथा प्राविधिक सहयोग गर्ने गरी मिलनलाई झोलुङ्गे पुल निर्माण गर्ने जिम्मा दिने गरिएको छ ।
गत आर्थिक बर्षमा निर्माण सकिएका र निर्माणाधिन अबस्थामा रहेका पुलको कुल लागत १९ करोड ३ लाख ४१ ह्जार ६६२ रुपैयाँ रहेको मिलन म्याग्दीका कार्यकारी निर्देशक दिलमायाँ बिटालुले बताउनुभयो । उहाँका अनुसार “निर्माणाधीन र सम्पन्न भएका पुलबाट नौ हजार आठ सय ८२ घरधुरी प्रत्येक्ष रुपमा लाभान्वित भएका छन् ।
मालिका गाउँपालिका, रघुगङ्गा गाउँपालिका र बेनी नगरपालिकामा एक÷एक वटा पुल निर्माणाधिन अबस्थामा छन् । भने मालिकामा १ मंगलामा, अन्नपूर्णमा ३ र धवलागिरीमा २ वटा पुलको निर्माण सम्पन्न भएको छ ।
मालिका गाउँपालिका–६ दरबाङमा म्याग्दीखोला माथि ११द्ध मिटर, मंगला गाउँपालिका–५ पिपलबोटमा म्याग्दीखोलामा ७३ मिटर, धवलागिरी गाउँपालिका–७ मा म्याग्दीखोलामा १०१ मिटर, धवलागिरीकै ४ मा खोलाखर्कमा ११२ मिटर, अन्नपूर्ण गाउँपालिकाको दोबिल्ला खोलामा ६० मिटर, ठूलोखोलामा ६४ मिटर र गण्डकी प्रदेश सरकारको पूर्वाधार विकास कार्यालय म्याग्दीले निर्माण गरेको कालीगण्डकी खोला माथि भूरुङ तातोपानी देखि पाउद्धार तातोपानी कुण्ड जाने १२६ मिटर लामो झोलुङ्गे पुल निर्माण भएको छ ।
त्यस्तै बेनी नगरपालिका–७ मंगलाघाटमा निर्माण हुन लागेको पुलको ८५ प्रतिशत काम सम्पन्न भएको छ । रघुगंगा गाउँपालिका–८कम स्टील ट्रस प्रविधिको ३२ मिटर लामो खोसेरा खोला पुलको काम ६५ प्रतिशत भएको छ भने मालिका –४ मा कुमालघारे खोलामा निर्माण हुन लागेको ७० मिटर लामो पुलको काम ३० प्रतिशत काम सकिएको छ ।
झोलुङ्गे पुल निर्माण भएपछि खोलामा जोखिमपूर्ण र घुमाउरो बाटोको यात्रा गर्नुपर्ने बाध्यता हटेको, बाटोको दूरी छोटिएको, स्थानीयवासीका साथै विद्यार्थीलाई पनि सुविधा पुगेको धवलागिरी गाउँपालिका अध्यक्ष प्रेम प्रसाद पुनले बताउनुभयो ।
