बेनी नगरपालिका–४,सिंगास्थित म्याग्दी एकेडेमीमा बिहिबार आयोजित निःशुल्क आँखा परीक्षणमा ४ सयभन्दा बढी लाभान्वित भएका छन् । मनकामना आँखा केयरसँगको सहकार्यमा विद्यार्थी २७० र अभिभावक १५० जना गरी ४२० जनाको आँखाको परीक्षण गरिएको विद्यालयका निर्देशक सन्दिप केसीले जानकारी दिए।
डा. सन्तोष शाह र डा. रेनिशा पौडेल सहितको चिकित्सकको टोलीले गरेको परीक्षणमा ४७ विद्यार्थी र १०२ जना अभिभावकमा टाढाको वस्तु नदेख्ने, देखे पनि धमिलो देख्ने,आँखामा सुख्खापनको समस्या देखिएको छ ।
विद्यालयले मेरो स्वास्थ्य कार्यक्रम अन्तरगत आयोजित शिविरमा समस्या पहिचान गरिएका विद्यार्थीलाई थप उपचार तथा अभिभावकलाई समेत उपचारका लागि समन्वय गर्ने बताइएको छ । विद्यालयले आँखा सहित भविस्यमा विभिन्न समस्यालाई लक्षित गरी स्वास्थ्य शिविर सहितका सचेतनामुलक अभियान सञ्चालन गर्ने जनाएको छ।
