म्याग्दीको सदरमुकाम बेनीमा रहेको चार सय वर्ष पुरानो ऐतिहासिक बेनी (भद्रिबम) शिवालय मन्दिरको नबौं साधारणसभा तथा चौथो अधिवेशनबाट दलप्रसाद श्रेष्ठको अध्यक्षतामा नयाँ कार्यसमिति चयन भएको छ ।
शनिबार मन्दिरको सभाहलमा सम्पन्न भएको अधिवेशनबाट उपाध्यक्षमा सुन्दर केसी, सचिव पूर्णबहादुर जिसी, कोषाध्यक्ष भावना पौडेल, सह–सचिव अर्जुन पौडेल, सह–कोषाध्यक्ष गोपाल भट्टचन रहेका छन ।
कार्यसमितिको सदस्यहरूमा हरिमायाँ श्रेष्ठ, डम्बर श्रेष्ठ, हरिकला श्रेष्ठ, सिता भण्डारी, भिमकुमारी भण्डारी बालकुमार महत, शिव भट्टचन र साधना जिसी रहेको निर्वतमान अध्यक्ष बिक्रम श्रेष्ठले जानकारी दिए । मन्दिरको अध्यक्षमा निर्वाचित श्रेष्ठको नेतृत्वमा बिरेन्द्रचोक टोल विकास संस्था बेनी नगरपालिकाकै नमुना घोषित भएको थियो ।
साधारणसभा तथा अधिवेशनको उद्घाटन गदैं गण्डकी प्रदेशसभा सदस्य बिमला गौचनले बाइसे चौबिसे राज्यका पालामा निर्मित मन्दिरले प्राचिन धार्मिक सभ्यता झल्काउने भएकाले यसको संरक्षणमा आवश्यक सहयोग गर्ने बताइन् ।
उनले आफ्नो पहलमा मन्दिरको संरक्षणका लागि आवश्यक बजेट विनियोजन गरी धार्मिक पर्यटकीयस्थल बनाउन सघाउने प्रतिबद्धता जनाइन् । वि.सं. १७५० मा निर्माण गरिएको यो शिवालयमा बटवृक्ष (वरको रुख) छ ।
शिवालय अहिले धार्मिक पर्यटकको मुख्य आकर्षणको केन्द्रसमेत बनेको छ । तत्कालीन ज्यामरुककोटे राजा मलेबम मल्लले भाइ भद्रिबम मल्लको हत्या गरेपछि पापबाट मुक्ती पाउन चार सय वर्षभन्दा पहिले मन्दिर स्थापना गरेको किम्बदन्ती छ । मन्दिर परिसरमा १०८ शिवलिङ्ग स्थापना र यज्ञ मण्डप निर्माण गरिएको छ । भद्रीबम शिवालय तत्कालीन पर्वत राज्यको इतिहासको साक्षी बनेर रहेको छ।
