आगामी मंसिर महिनामा सदरमुकाम बेनीबजारमा प्रथम लायन्स कप जिल्ला स्तरीय अन्तर माबि छात्रा रनीङ शिल्ड फुटबल प्रतियोगिता हुने भएको छ । म्याग्दीमा रहेका छात्रा फुटबल प्रतिभाको पहिचान गर्ने उदेश्यले लायन्स क्लब अफ बेनी लभ्लीहिलको आयोजनामा मंसिर १३–१५ सम्म हुने प्रतियोगितामा टाइटल स्पोन्सर (मुख्य प्रायोजक ) दि रियल म्याग्दी (अस्ट्रेलीया) ले गरेको छ ।
म्याग्दीको विद्यालय स्तरमा रहेका छात्रा फुटबल खेलाडीको पहिचान तथा जिल्ला हुदै प्रदेश र राष्ट्रियस्तर खेलसम्म पुग्नेगरी आवश्यक प्रशिक्षण लगायतका अवसरका लागि प्रतियोगिताको आयोजना गरिएको क्लवका अध्यक्ष सोहन श्रेष्ठले बताए । ‘प्रसारप्रसार सहित आवश्यक तयारीमा जुटेका छौ, छात्रा फुटबलका लागि म्याग्दीमा रहेका राम्रा प्रतिभालाई अवसर दिन समेत हरेक बर्ष प्रतियोगिता गरिने छ’ अध्यक्ष श्रेष्ठले भने । प्रतियोगिताका लागि म्याग्दीमा रहेका संस्थागत तथा सामुदायिक विद्यालयलाई पत्रचार गरिएको छ ।
प्रतियोगितामा कक्षा १० सम्मका विद्यार्थीले मात्रै सहभागिता जनाउन पाउने छन् । प्रतियोगिताको विजेताले ३५ हजार, उपविजेता २० हजार सहित मेडल, ट्रफी र प्रमाणपत्र र अनु्शासित टिम ५ हजार तथा उत्कृष्ट खेलाडी,उत्कृष्ट गोलरक्षक, सर्वाधिक गोलकर्ता, उत्कृष्ट डिफेन्डर,उत्कृष्ट मिडफिल्डर, उत्कृष्ट स्टाइकर, उत्कृष्ट कोच र उत्कृष्ट राइजिङ प्लेयरलाई नगद सहित पुरस्कृत गरिनेछ । प्रतियोगिताका लागि जिल्ला फुटबल सङ्घ म्याग्दी र लायन्स क्लब अफ बेनी लभ्लिहिबिच सम्झौता समेत भएको थियो ।
