अखिल नेपाल फुटबल सङ्घ (एन्फा) द्धारा सञ्चालित चार दिने सामुदायिक प्रशिक्षक कोर्षबाट म्याग्दीका ६ जना एन्फा लाइसन्स प्राप्त प्रशिक्षक बनेका छन् ।
गण्डकी प्रदेश फुटबल संघद्धारा आयोजित कोर्षबाट म्याग्दी जिल्लामा फुटबल खेल सञ्चालन तथा प्रशिक्षणका लागि ‘डि’ तहको प्रशिक्षकको मान्यता प्राप्त गरेका हुन् ।
प्रशिक्षणबाट दिलिप राम्जाली, दिवस छन्त्याल, खगेन्द्र पुन, कुमार बानियाँ, निशान गुरुङ र निशान केसीले प्रमाणपत्र समेत प्राप्त गरेका छन् ।
‘डी’ लाइसेन्स पाएका प्रशिक्षकले अब म्याग्दी जिल्लामा हुने फुटबल प्रतियोगिता, तालिम सहित गतिविधिमा एन्फाको लोगोमा सहभागि हुने प्र्रशिक्षक एवम् जिल्ला फुटबल संघ म्याग्दीका अध्यक्ष बानियाँले बताए ।
‘यो सफलताले म्याग्दीमा फुटबल खेललाई उकास्ने अभियानमा बल पुगेको छ,प्रशिक्षण र प्रतियोगितालाई समुदायस्तरमै पुर्याउन थप सहज हुने छ’ अध्यक्ष बानियाँले भने ।
एन्फाले प्रदेशस्तरमा पुगेर प्रशिक्षक कोर्ष दिँदै आएको छ । सामुदायिक प्रशिक्षक कोर्ष लिएका प्रशिक्षकले अब ‘सी’ तहको प्रशिक्षक कोर्ष लिन पाउने प्रावधान छ । 
एन्फाले चार तहको प्रशिक्षक तालिम दिँदै आएको छ । ‘डि’ तहको प्रशिक्षण लिएकालाई ‘सी’ तह, ‘सी’लाई बी तहको र बी तहका प्रशिक्षण लिएकालाई ‘ए’ तहको प्रशिक्षण दिने गरिएको छ । सहभागीहरूलाई एन्फाले सहभागिताको प्रमाण पत्र प्रदान गरेको छ । प्रशिक्षणमा एन्फा हेड अफ कोच एजुकेसनका प्रशिक्षक हेड कोच सञ्जीव सिंह लगायतको उपस्थिती रहेको थियो ।
यता जिल्ला खेलकुद विकास समितिका अध्यक्ष दिनेश केसीले असल र उत्कृष्ट प्रशिक्षक बन्ने पहिलो खुड्किलो भएको बताए । प्रशिक्षककोे माध्यमबाट फुटबल क्लबलाई चुस्त बनाउन स्थानीय तहले प्रोत्साहन गर्न जरुरी रहेको बताए ।
