विश्व विद्यालय अनुदान आयोगबाट(क्युएए) को प्रमाणपत्र प्राप्त म्याग्दी बहुमुखी क्याम्पसको ३४औ वार्षिकोत्सवको अवसरमा उद्यमशिलता कार्यक्रममा व्यवसायिक योजना पेश गरेका १४ जना विद्यार्थीलाई सम्मान गरिएको छ ।
देशभरका १४ सय क्याम्पसमा प्रतिस्पर्धा गरेको परियोजनाका लागि नेपालभरका १८ वटा क्याम्पसमा छनौट भएको म्याग्दी बहुमुखीमा उद्यमशील बन्नका लागि ४० घण्टाको पाठ्यक्रममा आधारित उद्यमी बन्न आवश्यक पर्ने ज्ञान, सीप र उत्प्रेरणा सम्बन्धि स्थानीय तथा राष्ट्रियस्तरका सफल उद्यमी, विषय विज्ञहरूले सहजीकरण गरिएको थियो ।
क्याम्पस प्रमुख श्रीधर सुबेदीले पहिलोपटक सहभागी भएका विद्यार्थीमध्ये व्यवसायिक योजना पेश गरेकालाई सम्मान सहित थप योजनाहरु समेत बनाइएको थियो । उक्त परियोजनामा छनौट भएकामध्ये ५ जनाको व्यवसायिक योजनालाई विश्व विद्यालय अनुदान आयोगमा पठाइएको थियो ।
देशैभरबाट प्रतिस्पर्धामा छनौट भएमा विद्यार्थीले न्यूनतम पाँच लाखदेखि ४० लाखसम्म बिनाब्याज प्राप्त गर्ने र उद्यमशीलताबाट आम्दानी गरेपछि उद्यमीले फिर्ता गर्नुपर्ने प्रावधान छ। 
सोही अवसरमा म्याग्दी बहुमुखी क्याम्पसबाट हालसम्म व्यवस्थापन संकाय तर्फ स्नातकोत्तर तह (एमबिएस) उत्तीर्ण २४ जना विद्यार्थीहरुलाई प्रमाणपत्रद्धारा सम्मान गरिएको थियो ।
