नेपाल २०२५ हेन्ली पासपोर्ट (राहदानी) इन्डेक्समा १०१ औँ स्थानमा रहेको छ, जहाँ नेपालीहरूले भिसा फ्री प्रवेशको लागि ३९ देशमा जान सक्छन्। नेपाल सबैभन्दा कमजोर देशहरूको सूचीमा सातौँ स्थानमा रहेको छ, जसको अवस्था युद्धग्रस्त प्यालेस्टाइन र लिबिया भन्दा पनि तल छ।
नेपालभन्दा माथि बङ्गलादेश र उत्तर कोरिया छन् भने तल सोमालिया, पाकिस्तान, यमन, इराक, सिरिया र अफगानिस्तान रहेका छन्। यसअघि नेपाल ९८ औँ स्थानमा रहेको थियो।
भारत ५७ देशमा भिसा फ्री जान सक्नेगरी ८५ औँ स्थानमा रहेको छ भने चीन ८५ देशमा भिसा फ्री जान सक्नेगरी ६० औँ स्थानमा छ।
यो इन्डेक्स १९ वर्षअघि प्रकाशन सुरु गरिएको हो र यसले विश्वभरका १९९ वटा पासपोर्टहरूलाई २२७ वटा गन्तव्यमा भिसा बिना प्रवेश पाउने आधारमा वर्गीकरण गर्छ। सुरुवाती वर्षमा अमेरिकी पासपोर्ट आकर्षक मानिएको भए पनि अहिले त्यसको महत्व कम भएको छ।
सन् २०१४ मा पहिलो स्थानमा रहेको अमेरिका यस वर्ष नवौँ स्थानमा झरेको छ, जहाँ अमेरिकी पासपोर्टधारीहरूले विश्वका १८६ देश र क्षेत्रमा भिसाबिना प्रवेश पाउँछन्। हेन्ली पासपोर्ट इन्डेक्समा सिंगापुर लगातार दोस्रो वर्ष विश्वको सबैभन्दा शक्तिशाली पासपोर्टको रूपमा सूचीबद्ध भएको छ, जसले कुल १९५ गन्तव्यमा जान सकिन्छ।
सूचीको दोस्रो स्थानमा जापान छ, जुन १९३ देशमा भिसा फ्री छ। त्यसपछि फिनल्याण्ड, फ्रान्स, जर्मनी, इटाली, दक्षिण कोरिया र स्पेन रहेका छन्। युनाइटेड अरब इमिरेट्स एक मात्र मध्य-पूर्वी देश हो जुन शीर्ष १० मा पर्न सफल भएको छ।
शक्तिशाली पासपोर्ट भएका देशका नागरिकहरूलाई भिसा आवेदनबिना यात्रा गर्ने अवसर प्रदान हुन्छ। इन्डेक्समा सबैभन्दा कमजोर मानिएको अफगानिस्तानको पासपोर्टले मात्र २६ देशमा भिसा फ्री प्रवेश अनुमति दिन्छ।
