जापानको फुकुओका शहरमा हरेक वर्ष झैँ यस वर्ष पनि ‘नेपाल फेस्टिभल’ हुने भएको छ । फुकुओका नेपाल सोसाइटी (फुनेसो)को अग्रसरतामा नेपाली समुदायको उत्साहजनक सहभागितामा ‘नेपाल फेस्टिभल फुकुओका-२०२५’ आयोजना हुने भएको हो । फुनेसोका अध्यक्ष इन्द्र प्रसाद घलेको संयोजकत्वमा क्युशु क्षेत्रका विभिन्न नेपाली संघसंस्था र जापानी निकायहरूको सहकार्यमा अप्रिल १२ र १३ का दिन फुकुओकाको तेन्जीन सेन्ट्रल पार्कमा फेस्टिभल सम्पन्न गरिने तय भएको छ ।
नेपाल फेस्टिभल फुकुओका नेपाली कला, संस्कृति, भेषभूषा तथा पर्यटन प्रवर्द्धनका लागि एउटा विशेष मञ्च बनिसकेको छ । नेपाल र जापानबीच सांस्कृतिक सम्बन्धलाई थप सुदृढ पार्ने उद्देश्यसहित आयोजना गरिँदै आएको यस फेस्टिभलले जापानमा रहेका अन्य विदेशी समुदायलाई समेत नेपालसँग जोड्ने अवसर प्रदान गर्दै आएको छ । संयोजक इन्द्र प्रसाद घलेका अनुसार यस वर्षको संस्करणलाई अझ प्रभावकारी र आकर्षक बनाउने तयारी गरिएको छ । दुई दिनसम्म चल्ने यो फेस्टिभलमा झण्डै १५ हजार दर्शकको सहभागिता रहने अनुमान गरिएको छ ।
नेपालका प्रमुख पर्यटकीय गन्तव्यहरूको विस्तृत जानकारी दिने स्टलहरू, नेपाली परिकारका स्वादिष्ट खानाका स्टलहरू तथा जापानी निकायका विभिन्न जानकारीमूलक स्टलहरू पनि महोत्सवको आकर्षण रहनेछन् । यस पटकको फेस्टिभललाई थप मनोरञ्जनात्मक बनाउन नेपालबाट चर्चित गायिका प्रीति आले मगर र गायक हेमन्त शर्मा विशेष प्रस्तुति दिन जापान आउने भएका छन् ।
यस्तै, अन्य लोकप्रिय तथा दिग्गज कलाकारहरूको समेत उपस्थिति रहने भएकाले दर्शकहरूको उल्लेखनीय चाप रहने आयोजक समितिले अनुमान गरेको छ । फेस्टिभललाई व्यवस्थित ढंगले सम्पन्न गर्न स्टेज व्यवस्थापन, स्टल व्यवस्थापन, सूचना तथा सञ्चार विभागलगायत गरी १२ ओटा कार्यदल गठन गरिएको छ । सन् २०११ मा ‘वैशाखे मेला’को रूपमा सुरु भएको यो महोत्सव निरन्तर रूपले विस्तार हुँदै आज १२ औं संस्करणसम्म आइपुगेको छ ।
नेपाल र जापानबीच सांस्कृतिक तथा आपसी सम्बन्ध सुदृढ पार्न यसको महत्त्वपूर्ण योगदान रहेको फुकुओका नेपाल सोसाइटीका पूर्व अध्यक्ष एवं संस्थापक संयोजक रामकृष्ण श्रेष्ठले बताए । नेपाल फेस्टिभल फुकुओकालाई थप व्यवस्थित र दीर्घकालीन रूपमा प्रभावकारी बनाउन ‘फेस्टिभल संरक्षण समिति-२०२५’ पनि गठन गरिएको छ । यो समितिको संयोजकत्व धर्मराज अधिकारीले गरेका छन् भने विभिन्न संघसंस्थाका अध्यक्ष, अग्रज तथा पूर्व संयोजकहरूको समेत सहभागिता रहेको छ ।
आयोजक समिति प्रचार प्रसार विभागका संयोजक दिपक बिकका अनुसार महोत्सवको तयारी अन्तिम चरणमा पुगेको छ । फेस्टिभलले नेपाल र जापानबीचको मित्रतालाई थप मजबुत बनाउने आयोजकको विश्वास छ । नेपाल फेस्टिभल फुकुओका-२०२५ ले नेपाली संस्कृति, पर्यटन तथा समृद्धिका लागि महत्त्वपूर्ण योगदान दिने अपेक्षा गरिएको छ ।
