गरिमा विकास बैंकले समुदायस्तरमा वित्तिय साक्षरता कार्यक्रमलाई अभियानकै रूपमा अगाडी बढाएको छ । बैंकको पोखरेबगर शाखाबाट शुक्रबार अन्नपूर्ण गाउँपालिका-५,शिखस्थित शिख माविका विद्यालयका ब्यवस्थापन समिति, शिक्षक, विद्यार्थी र अभिभावकलाई वित्तिय सचेतना कार्यक्रम सञ्चालन गरेको छ।
आधुनिक बैंकिङ, ग्रामीण बैंकिङ सहित ग्राहकको सेवालाई उच्च प्राथमिकतामा राख्दै आफ्नो सेवा विस्तार गरिरहेको अवस्थामा वित्तीय रूपमा साक्षर बनाउने लक्ष्यका साथ ग्रामिण क्षेत्रमा कार्यक्रम गरिएको बताउनुभयो ।
कार्यक्रममा क्षेत्रीय म्यानेजर ढुंगानाले विद्यार्थी र अभिभावकलाई खाता खोल्ने तरिका, बचतका फाइदा, वित्तीय सेवासुविधा, डिजिटल सेवा लगायत विभिन्न विषयमा जानकारी गराउनुभएको थियो ।
करिब १ सयभन्दा बढीको सहभागिता रहेको कार्यक्रममा विब्यस अध्यक्ष बागबिर पाईजा, प्रधानाध्यापक मिना शर्मा सुबेदीले विद्यार्थी र अभिभावकलाई बचत गर्ने बानीको विकास तथा वित्तिय ज्ञान आवश्यकता रहेको अवस्थामा यो कार्यक्रम निकै उपलब्धीमुलक रहेको बताउनुभयो ।
सोही अवसरमा बैंकका पोखरेबगर शाखाका प्रमुख श्याम थापाले समुदायमै पुगेर सामाजिक सुरक्षा भत्ता सहित विभिन्न कार्यक्रमहरु गरिएको बताउनुभयो । यस साता शिखसँगै मालिका गापाको वडा नं ७ बिम र मंगला गापा–५, छिस्बाङमा गरी तीन स्थानमा वित्तिय साक्षरता कार्यक्रम सञ्चालन गरिएको छ ।
गरिमा विकास बैंकले म्याग्दी, बागलुङ र पर्वतका ८ शाखा हेर्ने गरी म्याग्दीको सदरमुकाम बेनीबजारमा क्षेत्रीय कार्यालय स्थापना गरेको छ ।
धौलागिरीभित्र म्याग्दीमा बेनीबजार, पश्चिम म्याग्दीको बावियाचौर, दरबाङ, उत्तरी म्याग्दीको पोखरेबगर, बागलुङ जिल्लाको सदरमुकाम बागलुङ, बुर्तिवाङ, पर्वत जिल्लाको सदरमुकाम कुस्मा र फलेबासमा शाखा रहेको छ । विकास बैंकमध्ये ‘नम्बर वान’ बैंक बन्ने गतिका साथ अगाडी बढिरहेको बैंकले प्रविधिको विकास र विस्तारलाई उच्च प्राथमिकतामा राखेको छ।
