म्याग्दीको मालिका गाउँपालिका-२ रुम गाउँमा अवस्थित श्री राष्ट्रिय माविको कक्षा ११ र १२ सञ्चालनका लागि आर्थिक सहयोग गरिएको छ। वार्षिक पुण्यतिथिको अवसरमा मालिका गापा-२ रुम बेली गाउँका स्वर्गीय शिवलाल पुनको परिवारले विद्यालयलाई ५१ हजार सहयोग गरेको हो ।
स्वर्गीय शिवलालका छोरा लाल पुन, बुहारी भिमसरा पुन सहित परिवारका सदस्यले विद्यालयका प्रधानाध्यापक प्रेम घर्ती र विब्यस अध्यक्ष खिम रसाइलीलाई हस्तान्तरण गर्नुभएको थियो । सोही अवसरमा विद्यालयका प्रअ घर्तीले गाउँमा उच्च शिक्षाको वातावरणले पढाइ छोडेकालाई सहज भएको बताउँदै कक्षा सञ्चालनका लागि प्राप्त सहयोगले सहज भएको बताउनुभयो ।
यसैबीच स्वर्गीय शिवलालकी नातिनी एवम् नेपाल मगर संघ शाखा इजरायलकी संस्थापक उपाध्यक्ष तथा निर्वतमान संरक्षक विष्णु पुन मगरले सामाजिक दायित्व सहित मगर उत्थानका लागि नेपाल मगर संघ इजरायलको अभियानलाई ३० हजार १५० रुपैयाँ सहयोग गर्नुभएको छ । स्वर्गीय शिवलालले गाउँमा विद्यालयलाई जग्गा सहित विभिन्न सामाजिक एवम् मानवीय सेवाका क्षेत्रमा सहयोग गदैं आउनुभएको थियो ।
