विद्यार्थी आन्दोलनको मेरुदण्ड स्वतन्त्र विद्यार्थी युनियन (स्ववियु) को हालै म्याग्दीको दुई क्याम्पसमा चुनाव सकिएको छ । म्याग्दीको पूरानो म्याग्दी बहुमुखी क्याम्पसमा नेपाल विद्यार्थी संघबाट संगम चोखाल क्षत्री र मंगला गाउँपालिका-२,बाबियाचौर लाम्पाटामा रहेको मंगला शिक्षा क्याम्पसमा अनेरास्ववियुका एल्डीस पुन विजय भए । चोखाल नेपाली कांग्रेस निकट र पुन नेकपा एमाले निकट विद्यार्थी संगठनका हुन् ।
स्वतन्त्र विद्यार्थी युनियन क्याम्पसमा विद्यार्थीहरुको साझा संगठन हो। यसले विद्यार्थी र क्याम्पस प्रशासनबीच समन्वयको काम गर्छ। विद्यार्थीको समस्या र गुनासो क्याम्पस प्रशासनसम्म पु¥याउने र त्यसलाई हल गर्ने प्रमुख दायित्व स्ववियूको हो।क्याम्पसमा विद्यार्थी हक हितको विषयको नेतृत्व गर्दै भविश्यमा असल नेता बन्ने अभ्यास गर्ने ठाउँ पनि स्ववियू नै हो।
स्ववियूले बिभिन्न आस्था र विचार भएका विद्यार्थीलाई एउटै मञ्चमा ल्याउने र पठनपाठनलाई सहयोग गर्ने र क्याम्पसको बृहत्तर हितका लागि क्याम्पसले लिएका योजनाहरुलाई सफल बनाउन सहयोग गर्न संस्था हो । स्ववियु नहुदा क्याम्पस प्रशासन स्वेच्छाचारी हुन्छ ।
विद्यार्थीको पीडा बिसाउने चौतारी बन्नुपर्ने स्ववियूले पछिल्लो एक दशकयता विद्यार्थी हकहित र शैक्षिक मुद्दा छाडेर राजनीतिक दलका माग पूरा गराउन विद्यार्थीहरुको उपयोग मात्र गर्ने गरेको आरोप लगाउने गरेको पाइन्छ । स्ववियुमा निर्वाचित भएका विद्यार्थीले रचनात्मक र प्रभावकारी रूपमा आफ्नो काम सञ्चालन गर्नुपर्छ ।
क्याम्पसमा विद्यार्थीको संख्या घट्दै गइरहेको अवस्थामा शिक्षासम्बन्धी सुधार, सांस्कृतिक गतिविधि र विद्यार्थी विकासमा केन्द्रित हुनुपर्छ । जहाँ ब्यक्तिगत, संगठन र आफ्नो पार्टीको फाइदा हेर्नु हुदैन।
शैक्षिक सुधार, संस्थागत समर्थन र गैरराजनीतिक चरित्रलाई क्याम्पसभित्रका गतिविधिमा केन्द्रित गर्नुपर्छ। पछिल्लो समय विद्यार्थी संगठनहरू राजनीतिक गुटबन्दी र सत्ता संघर्षको औजार मात्र बनेका कारण स्ववियुमा विद्यार्थीको वास्तविक संलग्नता घट्दै जानुको प्रमुख कारण बनेको छ ।
आर्थिक अवस्था कमजोर भएका विद्यार्थीहरूलाई निशुल्क शिक्षा, आवास तथा विभिन्न सहयोगहरूमार्फत क्याम्पसमा सहज बनाउने तथा दिर्घकालिन रुपमा अक्षयकोष, सीपमुलक तालिम सहितका गतिविधिलाई मुख्य केन्द्रित भएर काम गर्न सकेमा विद्यार्थीको आर्कषण बढ्छ । क्याम्पसमा बार्षिक शुल्क तिर्न नसक्ने अवस्थाका विद्यार्थीलाई लक्षित गरी विद्यार्थी कल्याणकारी कोष बनाउनुपर्छ ।
म्याग्दीका दुई सामुदायिक क्याम्पसलाई समुदायकै आर्थिक सहयोगमा सञ्चालन भइरहेको अवस्थामा समुदायसँग केन्द्रित हुने गरी स्ववियुले समेत थप योजनाबद्ध तरिकाले रचनात्मक कार्यहरू गर्न सक्छ ।
स्ववियुमा सुधार भएन भने भविष्यमा विद्यार्थीको आवाज थप कमजोर बन्नेछ र शैक्षिक संस्थाहरू थप अव्यवस्थित बन्ने निश्चित छ । स्ववियुले समयमै सच्चिएर पुरानो ढर्रालाई त्यागी विद्यार्थीको वास्तविक हितमा काम गर्नुपर्छ । यसपटकको स्ववियुमा निर्वाचित विद्यार्थीको सक्रियताले आगामी दिनमा विद्यार्थीहरुलाई स्ववियुमा लाग्नका लागि प्रेरणादायी हुन सक्छन् ।
