माउन्ट एभरेष्ट आवासीय माविद्धारा सञ्चालित स्मल हेमन मन्टेश्वरीमा शनिवार दीक्षान्त समारोह सम्पन्न भएको छ । बेनीबजारको रेडक्रस भवनमा सञ्चालित मन्टेश्वरीबाट शैक्षिक वर्ष २०८१ मा कक्षा युकेजीका २६ जना नानीबाबुहरु दीक्षित भएका मन्टेश्वरीका संयोजक विभा रोकाले बताउनुभयो ।
कार्यक्रममा प्रमुख अतिथि बेनी नगरपालिकाका शिक्षा युवा तथा खेलकुद शाखाका शिक्षा अधिकृत कमलप्रसाद ढकालले स्मल हेभन मन्टेश्वरी बेनी बजार क्षेत्रको उत्कृष्ट मन्टेश्वरी भएको बताउँदै आफ्नै छोराछोरीलाई जस्तै स्नेहपूर्वक संस्कार सहितको शिक्षा प्रदान गर्न यो मन्टेश्वरी सफल भएको विचार व्यक्त गर्नुभयो ।
त्यसैगरी प्रिन्सिपल राजु केसीले विद्यार्थीहरुलाई गुणस्तरीय शिक्षा सहित व्यक्तित्व विकासका लागि अतिरिक्त क्रियाकलाप र चारित्रीक तथा नैतिव वल प्रदान गर्ने खालका विभिन्न कार्यक्रमहरु आयोजना गरिदै आएको बताउँदै नानीबाबुहरुको भविष्य निर्माणका लागि विद्यालयले समयसान्दर्भिक र बालमनोविज्ञानमा आधारित शिक्षण सिकाइ प्रक्रिया अघि बढाएको जानकारी दिनुभयो ।
विद्यालयमा बालविकासका लागि चाहिने सम्पूर्ण पूर्वाधार, शैक्षिक तथा शिक्षण सिकाइका सामग्रीहरु उपलव्ध हुनुका साथै घरको जस्तै माया र स्नेहका साथ मिस, म्याडमहरुले बालबालिकाहरुलाई शिक्षा प्रदान गरिरहनुभएको उहाँले बताउनुभयो । हाल युकेजीसम्म सञ्चालित मन्टेश्वरीलाई आगामी शैक्षिक वर्ष २०८२ मा कक्षा थप गरी एक कक्षा पनि सञ्चालन गर्न लागिएको उहाँले जानकारी दिनुभयो ।
त्यसैगरी अभिभावक प्रतिक्षा श्रेष्ठ र दीपक सापकोटाले मन्टेश्वरीको शैक्षिक र व्यवस्थापकीय क्रियाकलापबाट आफूहरु सन्तुष्ट रहेको बताउनुभयो । अभिभावकले घरमा गर्ने स्याहार सुसार र दिने संस्कार विद्यालयले प्रदान गर्दै आएको विद्यालय र यहाँका मिस म्याडमहरुप्रति आफूहरु आभारी रहेको उहाँहरुको भनाइ थियो । कार्यक्रममा नानीबाबु र मिस म्याडमहरुले विभिन्न किसिमका सांस्कृतिक नृत्य प्रस्तुत गर्नुभएको थियो ।
कार्यक्रममा विद्यालयका सञ्चालक रमेश गिरी र लिलाबहादुर बानियाँको पनि उपस्थिति रहेको थियो । कार्यक्रम विद्यालयका प्रिन्सिपल राजु केसीको अध्यक्षता, बेनी नगरपालिकाका शिक्षा अधिकृत कमलप्रसाद ढकालको प्रमुख आतिथ्यता, शिक्षक धु्रवसागर शर्माको स्वागत र विभा रोकाको सञ्चालनसमा सम्पन्न भएको थियो । २०७२ सालमा स्थापना भएको स्मल हेभन मन्टेश्वरी विगत सात वर्षदेखि बेनीबजारको रेडक्रस भवनबाट सञ्चालन हुँदै आएको छ । मन्टेश्वरीमा हाल १३२ जना बालबालिकाहरु अध्ययनरत छन् ।
