गण्डकी प्रदेश सरकारले आउने वर्ष थप चार दिन सार्वजनिक बिदा दिने भएको छ। विक्रम संवत् २०८२ मा नेपाल सरकारले निर्णय गरेका बाहेक चार दिन बिदा दिने मन्त्रिपरिषद्ले निर्णय गरेको हो। मन्त्रिपरिषद बैठकले गरेको बिदा दिने निर्णय राजपत्रमा प्रकाशित भइसकेको छ।
मुख्यमन्त्री तथा मन्त्रिपरिषद् कार्यालयका उपसचिव प्रविण ढकालले भानु जयन्तीका दिन असार २९ गते आइतबार, कोजाग्रत पूर्णिमाका दिन असोज २० गते सोमबार, गण्डकी प्रदेश स्थापना दिवस माघ २२ गते बिहीबार र चैते दशैं २०८२ साल चैत १२ गते बिहीबार गरी ४ दिन बिदा दिने निर्णय भएको जानकारी दिनुभयो।
यी बिदामा प्रदेशभरका सबै सरकारी कार्यालय, शैक्षिक संस्था र सार्वजनिक संस्थान बन्द हुने मुख्यमन्त्री तथा मन्त्रिपरिषद् कार्यालयले आइतबार जारी गरेको सूचनामा उल्लेख छ।
