गङ्गालाल राष्ट्रिय हृदय रोग केन्द्रको कार्यकारी निर्देशक डा. रवि मल्ल गृहजिल्ला म्याग्दीमा सम्मानित हुनुभएको छ । मुटुरोग विशेषज्ञ डा. मल्ललाई बुधबार एक कार्यक्रमका बिच म्याग्दी उद्योग बाणिज्य संघले दोसल्ला र सम्मानपत्रले सम्मान गरेको छ ।
बेनी नगरपालिका वडा नं ८ कालिपुलस्थित पर्यटक सुचना केन्द्रमा आयोजित कार्यक्रममा स्वास्थ्य क्षेत्रमा अतुलनीय योगदान सहित विपन्नको उपचार सहित ग्रामिण क्षेत्रमा शिविरमार्फत सेवा प्रवाहबाट नागरिक लाभान्वित भएको भन्दै संघले सम्मान गरेको हो ।
संघका अध्यक्ष सुविन श्रेष्ठ, पूर्व अध्यक्ष एवम् बेनी नगरपालिका वडा नं ८ का अध्यक्ष उत्तमकुमार कर्माचार्य, बरिष्ठ उपाध्यक्ष राजेश शाक्य, सचिव मोतिलला पौडेल, महिला उद्यम विकास समितिकी अध्यक्ष अम्बिका श्रेष्ठले सम्मान गर्नुभएको थियो ।
सम्मानित भएपछि डा. मल्लले जन्मभूमी म्याग्दीका नागरिकलाई मुटु रोगमा देखिएको समस्या समाधानका लागि आफ्नो तर्फबाट सक्ने सहयोग गर्ने प्रतिबद्धता जनाउनुभएको थियो ।
डा. मल्ल जिल्ला समन्वय समिति म्याग्दीसहित जिल्लाका ६ वटै स्थानीय तहको संयुक्त आयोजना र शहीद गङ्गालाल राष्ट्रिय हृदय रोग केन्द्र काठमाडौँको प्राविधि सहयोगमा दुई दिनसम्म निःशुल्क मुटु परीक्षण तथा उपचार शिविर बुधबार सकिदै छ।
