म्याग्दीको सदरमुकाम बेनीमा सञ्चालित दुई दिने निःशुल्क मुटु परीक्षण तथा उपचार शिविरको पहिलो दिन ५ सय भन्दा बढीले सेवा लिएका छन् । जिल्ला समन्वय समिति म्याग्दीसहित जिल्लाका ६ वटै स्थानीय तहको संयुक्त आयोजना र शहीद गङ्गालाल राष्ट्रिय हृदय रोग केन्द्र काठमाडौँको प्राविधि सहयोगमा मङ्गलबारदेखि शिविर सञ्चालन गरिएको हो ।
बुधबार साँझ सम्पन्न हुने शिविरमा अति विपन्न र जटिल समस्या देखिएकालाई निशुल्क र सहुलियतमा उपचार समेत गरिने छ । म्याग्दी बहुमुखी क्याम्पसमा सञ्चालन भएको शिविरमा म्याग्दी र पर्वतको जलजला गाउँपालिकाका मुटुमा समस्या देखिएकाहरुको भिड लागेको जिल्ला समन्वय समितिका अधिकृत अमृत सुबेदीले बताउनुभयो ।
शिविरमा मुटुरोग विशेषज्ञबाट मुटुको परीक्षण तथा परार्मश, सुगर, इसिजी, ईको तथा रक्त परीक्षण गरिएको छ । शहीद गङ्गालाल राष्ट्रिय हृदय रोग केन्द्र काठमाडौँका निर्देशक डा. रबी मल्लले यो अवसरको सदुपयोग गर्न समेत अनुरोध गर्नुभएको छ । मुटुरोगसम्बन्धी विशेषज्ञ सेवा प्रदान गरिने शिविरमा विहान ८ बजेदेखि बेलुकी ५ बजेसम्म सेवा दिइरहेको छजिल्ला समन्वय समितिका निमित्त प्रमुख डिलकुमारी खत्रीले जानकारी दिनुभयो ।
शिविरमा म्याग्दी उद्योग वाणिज्य सङ्घ, राखु कल्याणकारी समाज, म्याग्दी जेसीज, नेपाल रेडक्रस सोसाईटी, ओमकुमारी शान्ति कोष र म्याग्दी बहुमुखी क्याम्पस स्वतन्त्र विद्यार्थी यूनियनले स्वंयमसेवक परिचालन गरेका छन् भने बेनी नगरपालिकाको नगर प्रहरी सहितको अन्य थप जनशक्ती समेत खटिएको छ ।
