फोक्सो वा मुटुको गति रोकिएर मृत्युवरण हुने समस्यालाई रोक्न म्याग्दीको सदरमुकाम बेनीमा डेढ सयभन्दा बढीले कार्डिओ–पल्मोनरी रिससिटेसन (सिपिआर) लिएका छन् ।
अमेरिकन हार्ट एसोसिएशन,शहीद गङ्गालाल राष्ट्रिय हृदय रोग केन्द्र काठमाडौँको प्राविधि सहयोग तथा जिल्ला समन्वय समिति म्याग्दीसहित जिल्लाका ६ वटै स्थानीय तहको संयुक्त आयोजनामा स्वास्थ्यकर्मी सहित १ सय ५२ जनालाई तालिम प्रदान गरिएको हो ।
प्रदेश जनस्वास्थ्य कार्यालयमा आयोजित तालिममा १ सय ३५ जना स्वास्थ्यकर्मी र विभिन्न संघसंस्थामा आवद्ध १७ जनाले तालिम लिएको शिविर तथा तालिम ब्यवस्थापन समितिका संयोजक एवम् जिल्ला समन्वय समितिका शाखा अधिकृत अमृत सुबेदीले जानकारी दिनुभयो ।
तालिमको अमेरिकन हार्ट एसोसिएशनकी प्रशिक्षक प्रतिवेदन डंगोल सहित ६ जना स्वास्थ्यकर्मीले गर्नुभएको थियो । करिब ५ घण्टाको तालिममा मुटु वा फोक्सो बन्द भएर हुने त्यही मृत्युलाई रोक्न आवश्यक विधि सहित सिपिआरको आधारभूत ज्ञान प्रदान गरिएको थियो ।
तालिममा मुटुको चाल बन्द भएर कोही व्यक्ति अचानक ढलेको अवस्थामा चाललाई पुरानै अवस्थामा ल्याउन आवश्यक पर्ने सैद्धान्तिक र प्रयोगात्मक अभ्यास गरिएको थियो ।
चाल बन्द भएका बिरामीलाई सुताएर बिस्तारै–बिस्तारै छाती थिच्ने गरिन्छ। यस्तो उपचार चिकित्सकले मात्रै होइन, अन्य व्यक्तिले पनि सजिलै गर्न सकिने भएर बिरामी ढलेको अवस्थामा तत्काल अस्पताल पु¥याउनुभन्दा पहिला ढलेकै ठाउँमा सुताएर बिरामीको छाती बिस्तारै थिच्नुपर्ने अवस्थाका बारेमा जानकारी गराइएको थियो ।
कस्तो अवस्थामा सिपिआर गर्ने भन्नेबारे सामान्य मानिसले पनि जान्न आवश्यक रहेको तालिमले सिकाएको म्याग्दी बहमुखी क्याम्पसका प्रमुख श्रीधर सुबेदीले बताउनुभयो । तालिममा सहभागिलाई प्रमाणपत्र समेत प्रदान गरिएको थियो ।
