म्याग्दीमा माध्यमिक शिक्षा परीक्षा (एसइई) दिएर बसेका विद्यार्थीलाई जिल्ला भलिबल संघले एक महिने प्रशिक्षण दिने भएको छ । फर्सदको समयमा खेलकुद गतिविधिमा आर्कषित गर्ने उदेश्यले संघले चैत्र २४ गतेदेखि बैशाख २२ गतेसम्म खुल्लामञ्च बेनीमा प्रशिक्षण दिने संघका अध्यक्ष तेजेन्द्र बानियाँले बताउनुभयो ।
‘‘फुर्सदको समयलाई सदुपयोग गर्न प्रशिक्षण राखेका छौ’’, अध्यक्ष बानियाँले भन्नुभयो । विद्यालयस्तरबाटै भलिबल खेलाडीको पहिचान गर्ने उदेश्यले प्रतियोगिता सञ्चालन गरिरहेको संघले तालिमबाट उत्कृष्ट २० खेलाडीलाई छनौट गरी कक्षा ११ र १२ का लागि निशुल्क छात्रवृत्ति प्रदान गरिने छ ।
तालिममा भलिवल खेलका आधारभूत ज्ञान, सीप, उपलब्ध गराई अनुशासित रुपमा खेलकूदको विकासमा लगाउने संघका सचिव कुमार किसानले बताउनुभयो । जिल्ला भलिबल संघले नियमित खेल अभ्यासका लागि कबड हल समेत बनाउने तयारीमा जुटेको छ ।
