मुस्ताङ र म्याग्दीको डाँक सेवा प्रभावकारी बनाउन पहिलोपटक हुलाक कार्यालयको अन्तर समन्वय बैठक तथा अन्तरक्रिया गरिएको छ । सुचना प्रविधिको अत्याधुनिक विकास सँगै जनचाहना अनुसार हुलाक सेवा विस्तार गर्ने उद्देश्यले उपल्लो मुस्ताङको लोघेकर दामोदरकुण्ड गाउँपालिका-२ घमी मा म्याग्दी र मुस्ताङ हुलाक कार्यालयको बैठक बसेको हो।
बैठकमा म्याग्दी देखि मुस्ताङ सम्मको डाँक रेखा अध्ययन तथा अवलोकन गरी द्रुत हुलाक वस्तुको आदान प्रदान,म्याग्दी देखि मुस्ताङ सम्मको डाँक रेखामा हाल हल्कारा÷हुलाकी मार्फत डाँक ढुवानी भएकोमा सवारीसाधन मार्फत हुलाक वस्तुको ओसार–प्रसार गर्ने म्याग्दी हुलाकका सुचना अधिकारी रमेश अधिकारीले जानकारी दिनुभयो ।
बैठकमा जिल्ला हुलाक कार्यालय म्याग्दीका प्रमुख रमेश थापाले पहिलोपटक दुई जिल्ला बिचको बैठकले सिमित स्रोतसाधन र जनशक्ती भएपनि डाँक ढुवानीलाई सवारी साधन मार्फत प्रभावकारी रुपमा सञ्चालनमा कोशेढुगा सावित हुने बताउनुभएको थियो। 
बैठकमा जनशक्तिको क्षमता विकास तथा असल अभ्यासका बारेमा अनुभव आदानप्रदान गर्ने, हुलाक सेवाको आम नागरिकसमक्ष जानकारी पुर्याउनका लागि प्रचारप्रसार तथा सेवाको गुणस्तरीयता अभिवृद्धि तथा यातायात व्यवसायीसँगै स्थानीय तहसँग समेत समन्वय गरी डाँकलाई सहज, छिटो र सुरक्षित रुपमा ओसारपसार गर्ने, डाँक ढुवानीका लागि आवश्यक समन्वय गर्न हुलाक निर्देशनालय पोखरालाई समेत जानकारी गराउने, समुदायमा आधारित विभिन्न संघसंस्थालाई हुलाक सेवाको प्रयोग तथा अपनत्व जगाउन आगामी आवका कार्यक्रमहरूमा समावेश गर्ने बैठकले निर्णय गरेको छ ।
बैठकमा यातायात ब्यवसायी, स्थानीय तह तथा अन्य सरोकारवाला निकायको सहयोग भएमा मुस्ताङ र म्याग्दीबाट डाँक सेवामार्फत दुई दिनमै सेवा दिन सकिने प्रतिबद्धता समेत जनाइएको थियो । बैठकसँगै तल्लो र उपल्लो मुस्ताङ क्षेत्रमा रहेका हुलाक कार्यालयको अनुगमन तथा अनुभव आदानप्रदान समेत गरिएको थियो ।
अन्तर जिल्ला समन्वय बैठकमा हुलाक कार्यालय मुस्ताङका निमित्त प्रमुख शिवराम आचार्य, म्याग्दीका प्रमुख थापा, डाँक शाखा प्रमुख सम्झना भण्डारी बानियाँ लगायत दुबै जिल्लाका हुलाक कार्यालयका कर्मचारीको उपस्थिती रहेको थियो। पछिल्लो समय हुलाक कार्यालयले चिठीपत्र बाहेक बहु्मुल्य साम्रागी सहित खाद्यान्न समेत बोक्ने गरेको छ ।
