गीत संगीतमा बागलुङेहरु निकै रमाउँछन् । चैतेदशै मेलामा दर्जन कलाकारको गीतसंगीतमा झुमेका बागलुङबासी शुक्रवार गायिका एलिना चौहानको गीतमा पनि छमछमी नाचे । डिभोर्स गरेको तीन महिना नबित्दै बागलुङ आएर गीत गाउँदा एलिनाले सयौंको माया पाइन् ।
वास्तविक जीवनमा उनको मायाप्रेम छुटेपनि गीतसंगीत प्रतिको लगाव र बागलुङको माया भने झनै बढेको शुक्रवारको प्रस्तुतीले देखायो । उनको वास्तविक जीवन र डिभोर्स एकातिर भएपनि गीतसंगीत सबैको साझा हो । बागलुङका आम दर्शक र श्रोताले भने उनको प्रस्तुती र गीतमा वास्तविक जीवनमा मेल खाएझै अनुभव गरे ।
सातादेखि बागलुङमा आयोजित चैतेदशै तथा नयाँ बर्ष मेलामा आइपुगेकी चौहानले ‘छुट्यो पिरिम’ गीत गाएर दर्शकलाई भावुक बनाइन् । त्यसो त उनका बर्षौ पुराना ‘धोकेबाज हौ तिमी’, ‘मेरो छुनुमुनु हौ’, ‘तिमिले धोका दियौ भने कट्टा हान्दिन्छु’ जस्ता गीत चर्चित छन् । शुक्रवार बागलुङ एकता क्लबले आयोजना गरेको मेलामा उनले यस्तै गीत गाइन् । एकबर्ष बागलुङेकी बुहारी भएर बसेकी चौहानले आफ्नो बिगत त केही बोलिनन् । तर उनका जति गीत प्रस्तुत भए अधिकांस वास्तविक जीवनमा मेल खाएझै थिए ।
मञ्चमा उभिंदा दर्शकले के भन्लान भन्ने धेरैको चासो थियो । तर गायिका चौहान आउने प्रतिक्षामा बसेका सयौं दर्शकले ताली बजाएर समर्थन गरे । उनले पनि आफ्नो व्यक्तिगत धारणा केही राखिनन् । बरु ‘धोका दिनेलाई कट्टा हान्दिने हो’ भन्दै कट्टाको धेरै अर्थ बताइन् । ‘कट्टालाई कसैले बन्दुक भन्छन्, कसैले बाल मतलब नदिने हो भन्छन्, म भने कट्टा हान्नेमा मायानै माया दिने हो’ उनले भनिन्, ‘मेरो कट्टाले धोका दिनेलाई पनि पछुतो होस् ।’ यति धारणा मात्रै राखेर उनले मंचमा दर्जन गीत गाइन्
‘मिनिरल वाटर’, ‘गोदावरी बनैमा’, ‘कुराकाट्ने मान्छेले काटुन्’ जस्ता गीतमा दर्शकहरु छमछमी नाँचे । हरेक गीतमा तरर ताली बजे । ‘कट्टा हान्दिन्छु’ र ‘छुट्यो पिरिम’ गाउदा वान्स मोरको बर्षा भयो । तर उनले ती गीत दोहो¥याइनन् । गायक दुर्गेस थापालाई सम्झेर उनले समेत साथ दिएको ‘दुश्मन हेरेको हे¥र्यै’ गीत भने दुइपटक गाइन् ।
चैतेदशैको अबसरमा चैत १९ गतेदेखि नै बागलुङ कालीका मन्दिर परिसरमा मेला संचालनमा छ । साथै यो मेलालाई नै नया बर्ष सम्म लम्ब्याउन बागलुङ एकता क्लबले मेलामै विविध सास्कृतिक कार्यक्रम आयोजना गरेको छ । यो मेलामा भने लोकगीत संगतीका स्रस्टा मात्र नभइ विभिन्न व्याण्डका पप गायक समेत बोलाइएको क्लबका अध्यक्ष इन्सान थापाले बताए । अंग्रेजी र नेपाली नयाबर्षमा पोखरा धाउनेहरुलाई जिल्लामै रोकेर मनोरञ्जन दिन चैतेदशै मेलामा थप कार्यक्रम जोडेको उनले जानकारी दिए ।
