नेपाल निजामति कर्मचारी सङ्गठन म्याग्दीले आइतबार आफ्नो ३५औं स्थापना दिवस विविध कार्यक्रमको आयोजना गरी मनाएको छ । ‘सम्पूर्ण निजामति कर्मचारीहरु एकजुट होऔं, ‘संघीयतामा सुशासन, सामाजिक सुरक्षा र श्रमको सम्मान, राजनैतिक अधिकारसहितको टे«ड युनियन हाम्रो अभियान’ भन्ने नारासहित दिवस मनाइएको हो ।
दिवसको अवसर पारेर प्रकाशित नयाँ वर्ष २०८२ सालको भित्तेपात्रो (क्यालेन्डर) विमोचन गर्नुका साथै सङ्गठनको विकासमा पु¥याएको योगदानको कदरस्वरुप विभिन्न व्यक्तिहरुलाई प्रमाणपत्रसहित सम्मान गरिएको थियो । सम्मानित हुनेहरुमा मिना राम्जाली, भोलानाथ आचार्य, छविलाल उपाध्याय, मेघनाथ गैरे, राजेन्द्र आचार्य, रुचेन्द्र अधिकारी, युदेवी शाक्य, सुर्यबहादुर सुवेदी, रमेश अधिकारी, तेजकुमारी थापा र लिला थापामगर रहनुभएको छ ।
कार्यक्रमको उद्घाटन गर्दै नेपाल निजामति कर्मचारी सङ्गठनका केन्द्रीय सदस्य एवं गण्डकी प्रदेश सह–इन्चार्ज तेजप्रसाद निउरेले २०४७ साल वैशाख ७ गते आजैका दिन नेपाल निजामति कर्मचारी सङ्गठनको स्थापना भई कर्मचारीहरुको हकहितका लागि विभिन्न कामहरु गर्दै आइरहेको बताउनुभयो ।
उहाँले कर्मचारीहरुको पेशागत सुरक्षा र हकहितको क्षेत्रमा सङ्गठित हुनलाई कसैको डर मान्नुनपर्ने बताउँदै सङ्गठनको तर्फदेखि संघीय निजामति कर्मचारी ऐन तत्काल जारी गर्न सरकारलाई निरन्तर रुपमा पहल गरिएको जानकारी दिनुभयो ।
सहइन्चार्ज निउरेले निजामति कर्मचारी सङ्गठनको नमस्ते गर्ने अभियान रहेकाले सेवाग्राहीलाई मुस्कानसहितको सेवा दिनुपर्ने बताउँदै उहाँले संघीय निजामति ऐन, शिक्षा ऐन र प्रहरी समायोजन ऐन तत्कालै जारी गर्न आवश्यक रहेकोमा जोड दिनुभयो।
महङ्गी वृद्धि हुने गरी तलव÷भत्ता बढाउने माग जायज नभएको भन्दै उहाँले कर्मचारीहरुलाई ग्रेडवृद्धि, प्रोत्साहन, यातायात खर्चलगायत शीर्षकमा सहुलियत दिनुपर्नेमा जोड दिनुभयो । सङ्गठित हुन पाउने तथा बार्गेनिङ गर्न पाउने कर्मचारीको नैसर्गिक अधिकार भएको उहाँको भनाइ छ ।
कार्यक्रममा नेकपा एमाले गण्डकी प्रदेश कमिटीका सचिवालय सदस्य हरिकृष्ण श्रेष्ठले देशमा संघीय लोकतान्त्रिक गणतन्त्र स्थापना र संविधान जारी भएको लामो समय भैसकेको अवस्थामा अब छिटै निजामति कर्मचारी ऐन जारी हुनुपर्ने बताउनुभयो । उहाँले निजामति कर्मचारीहरुले जनताको सेवालाई उच्च प्राथमिकता दिएर काम गर्नुपर्ने बताउनुभयो ।
एमाले म्याग्दीका अध्यक्ष बालकृष्ण सुवेदीले वर्तमान सरकारले लिएको सङ्कल्प ‘समृद्ध नेपाल सुखी नेपाली’को परिकल्पना पुरा गर्न तीनै तहका सरकारहरु लाग्नुपर्ने बताउनुभयो । उहाँले एमाले नेतृत्वको सरकारले देशमा शान्ति, विकास र सुशासन तथा समृद्धि कायम गर्न लागिपरेको भन्दै अहिले एमालेमाथि चौतर्फी आक्रमण भैरहेकाले सबै मिलेर परास्त गर्नुपर्नेमा जोड दिनुभयो ।
कार्यक्रममा बेनी नगरपालिका ६ नम्बर वडाका वडा अध्यक्ष कृष्णसिङ बानियाँ, नेपाल निजामति कर्मचारी सङ्गठनका केन्द्रीय सचिवालय सदस्य मिना राम्जाली, केन्द्रीय सदस्य लिलादेवी गौतम र गण्डकी प्रदेश सदस्य भोलानाथ आचार्यले मन्तव्य व्यक्त गर्नुभएको थियो । कार्यक्रम नेपाल निजामति कर्मचारी सङ्गठनका जिल्ला अध्यक्ष सोमबहादुर केसीको अध्यक्षता, उपाध्यक्ष रबिन चोखालको स्वागत र सचिव भुवन रानाको सञ्चालनमा सम्पन्न भएको थियो ।
