म्याग्दीको रघुगङ्गा गाउँपालिका-८, निर्माणाधिन जलविद्युत आयोजनामा कार्यरत बाराका हरिओम चौधरीको आफन्तहरूले शव बुझ्न नमान्दा पोष्टमार्टम हुन सकेको छैन् ।
तुँदी पावर प्रवर्धक रहेको ३७.५ मेगावाट क्षमताको मङ्गले राहुघाट जलविद्युत् आयोजनामा कार्यरत बारा जिल्ला कोल्हवी नगरपालिका-६, कुमरगढीका २७ वर्षीय चौधरी कामबाट फर्किने क्रममा अचानक बेहोस भई मृत्यु भएपछि परिवारका सदस्यले परिवारको लालनपालनका लागि उचित क्षर्तीपुर्तीको सुनिश्चितता नभएसम्म शब नबुझ्ने अडान दिएका छन् ।
चौधरीको उपचारका क्रममा बेनी प्रादेशिक अस्पतालमा ल्याइएका चौधरीलाई चिकित्सकले मृत घोषित गरेको जिल्ला प्रहरी कार्यालय म्याग्दीका प्रहरी निरीक्षक एवम् सूचना अधिकारी सागर पौडेलले जानकारी दिनुभयो ।मृतकका आफन्त कमलबाबु चौधरीका अनुसार सिविएम डब्लुई कम्पनीमार्फत हरिओम आयोजनामा जोडिनुभएको थियो ।
मृतक चौधरीले वल्डिङको काम गर्नुहुन्थ्यो । तुँदी पावरले मजदुरको विमा नगरेको, क्षर्तीपुर्तीमा आलटाल गरेको भन्दै मृतकका छोराछोरीको शिक्षादीक्षा सहित उचित क्षर्तीपुर्ती बिना शब नबुझ्ने बताएपछि छलफल जारी रहेको जिल्ला प्रहरी कार्यालयले जनाएको छ ।
यसैबिच कम्पनीले ७ महिनासम्म कार्यरत चौधरीको बिमा समेत नगरेको पाइएको छ । मजदुरलाई जोखिमपूर्ण काममा लगाएर बिमा समेत नगरेपछि आफन्तले कानुनी कारबाहीको माग गरेका छन् ।
कम्पनीको लापवाहीका कारण हरिओमको मृत्यु भएको र कम्पनीले गुनासो सुनुवाइ नगरेको भन्दै उचित क्षतिपूर्ति नदिएको खण्डमा शव नबुझ्ने परिवारले अडान लिएका छन् । हरिओमको शव अहिले बेनी प्रादेशिक अस्पतालको शवगृहमा राखिएको छ ।
मृतक चौधरीका घरमा बुवाआमा, एक दाजु ,श्रीमती र दुई छोरी हुनुहुन्छ । म्याग्दीमा निर्माणाधिन अवस्थामा रहेका जलविद्युत आयोजनामा कार्यरत मजदुरलाई न्यूनतम सुविधाका लागि समेत आनकानी गर्ने गरेका छन् । तुँदी कम्पनीको ४८ दशमलव पाँच मेगावाट क्षमताको अपर (माथिल्लो) राहुघाट जलविद्युत पनि निर्माणाधिन अवस्थामा रहेको छ ।
