म्याग्दीमा भ्रमण गरेर रमाउने ठाउँहरु थुप्रै छन् । यहाँ अग्ला हिमालका चुचुराहरु, आधारशिविर, डाँडापाखा, कुनाकन्दरा, भञ्याङ–चौतारी, विभिन्न तालतलैया, पदमार्ग, पुराना मठमन्दिर, ऐतिहासिक, धार्मिक तथा पर्यटकीय क्षेत्रहरु रहेका छन् ।
म्याग्दी जिल्लामा रुप्से, नारच्याङ, महभीर, दुग्धबग्ने, नर्जालगायत झरनाहरु पर्यटक आकर्षणको केन्द्रका रुपमा अवस्थित छन् । अग्लो ठाउँबाट हुत्तिँदै खसेको पानीको छाँगोलाई हामीले झरना भनेर चिन्छौं । त्यसैमध्ये एक हो म्याग्दीको नर्जा झरना पनि ।
एकनासले माथिबाट तल जमिनतिर खसिरहने निकै सुन्दर, आकर्षक अनि मनमोहक म्याग्दीको नर्जा झरना जति हे¥यो उति हेरिरहुँ जस्तो लागिरहन्छ ।
पश्चिम म्याग्दीको धवलागिरि गाउँपालिका–२ लुलाङ र ३ नम्बर वडा मुनाको सिमानामा पर्ने नर्जा झरना पर्यटक र भौतिक पूर्वाधार विकासको पर्खाइमा छ । झरनासम्म पुग्ने सहज पदमार्ग तथा झरना आसपासका क्षेत्रमा पर्यटकलक्षित आवश्यक संरचनाहरु निर्माण नहुँदा पर्यटकीय आकर्षणको सम्भावनायुक्त नर्जा झरना ओझेलमा पर्दै जान थालेको छ । म्याग्दीमा यस्ता झरनाहरु थुप्रै छन् । कतिपय झरनाहरु वर्षामा मात्रै सुस्साउँछन् भने केही झरना बाह्रैमास सुस्साइरहन्छन् । कतिपय झरनाहरु प्रकृतिले बनाएका हुन्छन् भने केही मानवनिर्मित ।
नर्जा झरनाको बारेमा जानकारी पाउनेहरु सायदै कम होलान् । घाम परेको समयमा इन्द्रेणी समेत देख्न सकिने यस झरना पछिल्लो समय आन्तरिक तथा बाह्य पर्यटकहरुको रोजाइमा पर्दै गएको छ ।
झरनाकै कारणले गर्दा पर्यटकको चहलपहल बढेको स्थानीयवासी बताउँछन् । नर्जा झरना हेर्दा निकै सुन्दर, आकर्षक र मनमोहक छ । लुलाङ र मुना गाउँको माथिल्लो सिमानाबाट झर्ने नर्जा झरनाभन्दा माथि मानव वस्ती नभएको हुँदा झरना एकदमै सफा र कञ्चन रहेको बताइन्छ ।
पछिल्लो समय शनिबार तथा विदाको दिन झरनामा रमाउन पर्यटकहरु धेरै जाने गर्दछन् भने धवलागिरि गाउँपालिकामा विभिन्न कार्यक्रम लिएर जानेहरु पनि त्यहाँ पुग्छन् ।
झरनालाई पृष्ठभूमीमा पारेर सेल्फी फोटो र भिडियो खिच्न तथा टिकटक बनाउनको लागि भए पनि पर्यटकहरु नर्जा झरनामा जाने गरेको पाइन्छ । झरनामा पुगेर मोबाइलमा टिकटक बनाउनेहरुको पनि भीड लाग्ने गरेको छ ।
गर्मी छल्न समेत मानिसहरु यस झरनामा जाने गरेको स्थानीवासीको भनाइ छ । नर्जा झरना गूर्जा र चुरेन हिमाल जाने पदमार्ग अन्तर्गत पर्दछ ।
आन्तरिक पर्यटक राजेन्द्र सापकोटाले नर्जा झरनामा पुगेर रमाउन पाउँदा आफूलाई निकै आनन्दको अनुभूति मिलेको अनुभव सुनाउनुभयो ।
धवलागिरि गाउँपालिकाभित्र रहेका पर्यटकीय क्षेत्रहरुमध्ये एक मानिने नर्जा झरनाको प्रचारप्रसार तथा यहाँ भौतिक पूर्वाधारहरु बन्न नसक्दा ओझेलमा परेको छ । पर्यटकीय सम्भावना बोकेको यस झरनामा पर्यटकलक्षित भौतिक पूर्वाधारहरु बनाउन सकेमा धवलागिरि गाउँपालिकाको पर्यटन प्रवद्र्धन हुने देखिन्छ ।
झरना आसपास क्षेत्रमा पर्यटकलक्षित गोलघर, सेल्फी, फोटो, भिडियो र टिकटक बनाउने ठाउँ, खाने, बस्ने तथा रमाउने ठाउँहरु, बस्न, फोटो खिच्न कुर्सी तथा बेन्चलगायत संरचनाहरु जडान गर्नुपर्ने आवश्यकता देखिन्छ ।
झरनाको पर्यटन प्रवद्र्धन गर्न डिपिआर निर्माण गरी आवश्यक बजेट व्यवस्थापनको लागि पहल गरिएको धवलागिरि गाउँपालिकाका अध्यक्ष प्रेमप्रसाद पुनले बताउनुभयो ।
उहाँले गाउँपालिकाको आफ्नै स्रोतबाट पूर्वाधार बनाउन सम्भव नभएकाले नर्जा झरनासहित धवलागिरि गाउँपालिकामा रहेका अन्य पर्यटकीय तथा धार्मिक क्षेत्रको विकासका लागि माथिल्लो निकायमा बजेट माग गरिएको जानकारी दिनुभयो ।।
