म्याग्दीको अन्नपूर्ण गाउँपालिका-६,घारस्थित मुक्तिमार्ग माध्यामिक विद्यालयमा ह.कुलबहादुर बरुवालको चौरासी बर्ष प्रवेश गरेको अवसरमा कोष स्थापना गरिएको छ । विपन्न परिवारका बालबालिकालाई शिक्षादीक्षामा सहयोग गर्ने उद्धेश्यले छोरा शिवकुमार र बुहारी ज्ञानु बरुवालले सोमबार एक कार्यक्रमको आयोजना गरी विद्यालयमा १० लाख ८ हजार ४ सय ८४ रुपैयाँको ‘कुलबहादुर÷स्व.मनकुमारी’ अक्षयकोष स्थापना गरिएको हो ।
मोना अन्तराष्ट्रियका संस्थापक कोषाध्यक्ष शिवकुमारले आर्थिक अभावका कारण शिक्षाबाट बञ्चित हुनुपर्ने अवस्थाको अन्त्यका लागि स्थापित अक्षय कोषको अन्नपूर्ण गाउँपालिका अध्यक्ष भारतकुमार पुनको प्रमुख आतिथ्यतामा विद्यालयका प्रधानध्यापक ठकराज बरुवाललाई हस्तान्तरण गरिएको छ ।
कोषबाट प्राप्त हुने बार्षिक ब्याजले मुक्तिमार्ग मावि र छिमेकी भुवानी आधारभुत विद्यालयका बालबालिकालाई बार्षिक रुपमा छात्रवृति प्रदान गरिने सहयोगदाता शिवकुमारले बताउनुभयो। मुक्तिमार्ग माविका पूर्व ब्यवस्थापन समितिका अध्यक्ष, एवम् भुवानी आधारभुत विद्यालयका संस्थापक समेत रहनुभएका बुबा कुृलबहादुरको योगदानलाई निरन्तरता दिन उक्त कोष स्थापना गरी विद्यार्थीलाई सहयोग गरिएको सहयोगदाता शिवकुमारको भनाई छ ।
‘‘मैले पढेको र बुबाले योगदान गरेको दुबै विद्यालयमा कोष स्थापना गर्न पाउँदा निकै खुसी लागेको छ, आगामी दिनमा पनि शैक्षिक क्षेत्रमा निरन्तर सहयोग हुने छ ।’’ सहयोगदाता शिवकुमारले भन्नुभयो ।
यसैबीच मुक्तिमार्ग माविका प्रअ बरुवालले बेल्जियमलाइ कर्मथलो बनाएका बरुवाल दम्पत्तीको गाउँको सेवामा अतुलनीय योगदान रहेको बताउनुभयो । उहाँले विगतमा शैक्षिक, भौतिक क्षेत्रमा विभिन्न माध्यमबाट विद्यालयमा सहयोग गर्नुभएको बताउँदै यस कोषले समेत विद्यालयमा अध्ययनरत विपन्न विद्यार्थीको शैक्षिक गतिविधिमा सहज हुने बताउनुभयो । प्रअ बरुवालले शैक्षिक क्षेत्रको विकासका लागि अक्षय कोषले नियमित सहयोग गर्न सकिने बताउनुभयो ।
