प्रथम गण्डकी कप महिला फुटबल प्रतियोगिता आउँदो असार अन्तिम हप्ता पोखरा रङ्गशालामा हुने भएको छ ।
गण्डकी प्रदेश फुटबल सङ्घको आयोजना हुने प्रतियोगिताका लागि अखिल नेपाल फुटबल सङ्घ (एन्फा) ले आउँदो असार २८ गतेदेखि साउन ३ गतेसम्मको समय दिएको गण्डकी प्रदेश फुटबल सङ्घले जनाएको छ ।
गण्डकी प्रदेशमा पहिलो पटक हुन लागेको राष्ट्रियस्तरको महिला फुटबल प्रतियोगितामा आठ वटा टिमले सहभागिता जनाउने सङ्घका महासचिव विनोद गुरुङले जानकारी दिनुभयो । ‘एन्फा’ को स्वीकृतिसँगै प्रतियोगिताको तयारी अगाडि बढाइएको उहाँको भनाइ छ ।
पोखरामा महिला फुटबलको गतिविधि न्यून भइरहेका बेला राष्ट्रियस्तरको प्रतियोगिता हुने भएपछि यहाँका खेलप्रेमीसमेत उत्साहित बनेका छन् ।
