यातायात व्यवस्था विभागले अत्यावश्यक पर्नेलाई पनि सवारीचालक अनुमतिपत्र (लाइसेन्स) दिन नसक्ने भएको छ ।
अध्ययन तथा रोजगारी, नेपाली सेना, नेपाल प्रहरी, शान्ति मिसनलगायत कार्यमा खटिन जानेलाई दिने गरिएको लाइसेन्स समेत उपलब्ध गराउन नसकिने भएको विभागले जनाएको छ ।
विभागका अनुसार, गएको बिहीबार (वैशाख २५)देखि लाइसेन्स प्रिन्टिङ प्रणालीमा समस्या आएको छ । उक्त समस्याका आएका कारण अत्यावश्यक लाइसेन्स समेत दिन नसकिने आइतबार विभागले एक सूचनामार्फत जानकारी गराएको छ ।
प्राविधिक समस्या समाधानको प्रक्रिया जारी रहेको र अर्को सूचना प्रकाशन नगरिँदासम्म लाइसेन्स छपाइ बन्द रहने विभागले स्पष्ट पारेको छ । प्राविधिक समस्या समाधान भएलगत्तै पुनः सेवा सञ्चालन गरिने विभागले जनाएको छ ।
