नेपाल टेलिभिजन म्याग्दीका संवाददाताद्वय प्रताप बानियाँ र राकेश शर्मा आज सम्मानित हुनुभएको छ । जिल्ला समन्वय समिति म्याग्दीको वार्षिक समीक्षा तथा दशौं जिल्ला सभाको अवसरमा विकास पत्रकारिता पुरस्कारबाट सम्मानित हुनुभएको हो ।
म्याग्दी जिल्लामा पत्रकारिताको माध्यमबाट समग्र जिल्लाको विकासमा प्रचारप्रसार गरी सहयोग पु¥याएको भन्दै संवाददाता बानियाँ र शर्मालाई जनही ११ हजार रुपैयाँसहित सम्मानपत्र र दोसल्ला ओढाएर सम्मान गरिएको जिल्ला समन्वय समिति म्याग्दीले जनाएको छ । दुईजना संवाददातासँगै राष्ट्रिय समाचार समिति म्याग्दीका प्रतिनिधि दलप्रसाद विश्वकर्मालाई सम्मान गरिएको थियो ।
जिल्ला संवाददाताहरुलाई संविधानसभा सदस्यहरु गोविन्द पौडेल, नवराज शर्मा, नरदेवी पुन, रेशमबहादुर बानियाँ, गण्डकी प्रदेशसभा सदस्य रेशमबहादुर जुग्जाली र जिल्ला समन्वय समिति म्याग्दीका कार्यवाहक प्रमुख डिलकुमारी खत्रीले सम्मान गर्नुभएको थियो । नेपाल टेलिभिजन म्याग्दीको संवाददाताद्वय विगत एक दशकभन्दा बढी म्याग्दीको पत्रकारिता क्षेत्रमा क्रियाशील हुनुहुन्छ ।
