बेनी नगरपालिका-१० पात्लेखेतस्थित दीपक माध्यमिक विद्यालयका विद्यार्थीले च्याउ खेती थालेका छन् । बेनी नगरपालिकाको ‘हामी सक्छौ, हामी गछौं’ परियोजना मार्फत विद्यार्थीलाई च्याउ खेती सिकाउन थालिएको हो ।
कक्षा ९ र १० मा अध्ययन गर्ने २३ जना विद्यार्थीले सामुहिक रूपमा ‘केन्ये’ जातको च्याउ खेती छनौट गरी उत्पादन सुरु गरेको विद्यालयका प्रधानाध्यापक विष्णु ढुङ्गानाले जानकारी दिनुभयो । ‘विद्यार्थीले निकै राम्रोसँग सिक्दैछन्, हामीले विद्यालयमा सिकाएर घरमै पनि उत्पादनका लागि अभिभावकलाई प्रोत्साहन गदैछौ’ प्रअ ढुंगानाले भन्नुभयो।
उहाँका अनुसार २० भारी पराल पकाएर एक सय ५० वटा प्लास्टिकको थैलामा च्याउको बिउ सहित विद्यालयको पुरानो भवन प्रयोग गरिएको छ । विद्यार्थीलाई बेनी नगरपालिकाकाी कृषि प्राविधिक दिव्या बरालले च्याउ खेती प्रविधि सम्बन्धी सैद्धान्तिक र व्यवहारिक तालिम दिनुभएको थियो ।
बेनी नगरपालिकाले विद्यार्थीलाई किताबी ज्ञान बाहेक समय सुहाउँदो शिक्षालाई समेत प्राथमिकता दिएर चालु आर्थिक वर्ष २०८१–०८२ मा दिपक माविसहित बेनी नगरपालिकाका १६ वटा सामुदायिक विद्यालयलाई हामी सक्छौ, हामी गर्छौ कार्यक्रम सञ्चालन गरेको छ ।
नगरपालिकाले प्रत्येक विद्यालयलाई एक–एक लाख सहयोग गरेको नगर प्रमुख सुरत केसीले बताउनुभयो । सदरमुकाम बेनीबजारमा रहेका विद्यालय सहित ग्रामिण क्षेत्रमा रहेका विद्यालयहरुका विद्यार्थीको यो परियोजनामा आर्कषण रहेको छ ।
