कालीगण्डकी कोरिडोर सडकअन्तर्गत मालढुङ्गा–बेनी सडकको वैकल्पिक सडकका रूपमा रहेको बागलुङ–बेनी सडकलाई सडक डिभिजन कार्यालयले १४ किलोमिटर लामो बागलुङ–बेनी सडक रु तीन करोड २१ लाखको लागतमा मर्मतसम्भार गरेको छ ।
मालढुङ्गा–बेनी सडकको विकल्पका रूपमा प्रयोग हुँदै आएको यो सडक पहिरो, खाल्डाखुल्डी र कालोपत्र उप्किएर जीर्ण हुँदा कष्टपूर्ण यात्रा गर्नुपर्ने बाध्यता थियो ।
उक्त सडकको हुुलाके, भसभसे, ढाडेनी, सिम र पाङ्ग्रेखोलामा पहिरो पन्छाएर फराकिलो पार्ने, ढलान, ग्राभेल र कालोपत्र, वर्षाको पानी निकासका निम्ति पक्की नाला, ग्याबियन जाली, टेवा पर्खाल पनि निर्माण गरिएको उक्त कार्यालयका इञ्जिनियर विष्णुप्रसाद लामिछानेले बताए । यो सडक बेनीदेखि बागलुङ जानका लागि छोटो दूरीको सडक पनि हो । वर्षातका समयमा मालढुङ्गा–बेनी सडकमा पहिरो खसेर अवरुद्ध हुँदा बागलुङ हुँदै बेनी जान यो सडक प्रयोग गरिन्छ । RSS
