दुवै मृगौलामा समस्या देखिएका म्याग्दीको मंगला गाउँपालिका–१, भर्जुलाका सुसन किसानलाई स्वदेश तथा विदेशबाट १० लाखभन्दा बढी सहयोग भएको छ । आर्थिक अवस्था कमजोर भएका कारण उपचारमा समस्या भएपछि रबिन्द्र पुन, कृष्ण सेन्च्यूरी र मनकुमार जुग्जालीको संयोजकत्वमा सुरू सुसन किसान उपचारार्थ सहयोग अभियानमा हालसम्म १० लाख ४४ ह जार २२१ रुपैयाँ संकलन भएको हो ।
गाउँका सक्रिय यूवा किसानको अचानक स्वास्थ्यमा समस्या देखिएपछि उपचारको क्रममा दुबै मृगौलामा खरावी भएको चिकित्सकले बताएसँगै आर्थिक संकलन अभियान सुरु भएको अभियानका मनकुमार जुग्जालीले बताउनुभयो ।
हाल पोखरामा नियमित हप्तामा दुईपटक डाइलासिस गराइरहनुभएका किसानको मृगौला प्रत्यारोपण सहित नियमित औषधि उपचार सहितका लागि थप खर्चहरु लाग्ने भएकाले सहयोग अभियान जारी रहेको छ । हाल देश विदेशबाट साथीहरुले सहयोग रकम पठाइरहेको र त्यतिले मात्र नपुग्ने भएकाले थप सहयोग रकमका लागि अपिल गरेको जुग्जालीले बताउनुभयो ।
‘दुवै मृगौलाले काम गर्न छोडेको छ । नियमित डायलासिसपछि मृगौला फेर्नु बाहेक अन्य उपाय छैन’’ पीडित किसानले बेनीअनलाइनलाई भन्नुभयो । बृद्ध आमाको स्वास्थ्य अवस्था सामान्य भएपनि प्रत्यारोपणका लागि अहिले नै चिकित्सकले मिल्ने वा नमिल्ने केही बताइएको छैनन् ।
मृगौला दानको अन्य विकल्प नभए करिब ३५ लाखभन्दा बढी खर्च हुने अनुमान गरिएको छ । घरको आर्थिक अवस्था कमजोर आर्थिक अवस्था भएका किसान हालसम्म सहयोग गर्र्ने सम्पूर्ण सहयोगीहरूमा धन्यवाद प्रकट गर्नुभएको छ । जीवन मृत्युसँग लडिरहेका किसानलाई सहयोग गर्न इच्छुक व्यक्तिले ९८४७७४६२४५ मा सम्पर्क गर्न सकिन्छ ।
