बेनी नगरपालिका–६, छापमा रहेको प्रतिक्षालयमा कर्नर पुस्तकालय स्थापना गरिएको छ । स्थानीय छाप यूवा क्लवको पहलमा प्रतिक्षालयमा मिनी पुस्तकालय स्थापना गरिएको हो । मोवाइल, सामाजिक सञ्जालको लतका कारण पुस्तक पढ्नेहरुको कमी हुँदै गएपछि प्रतिक्षालयमा आराम गर्नेहरूलाई लक्षित गरी धार्मिक, साहित्यिक सहित विभिन्न विधाका पुस्तकहरु राखिएको क्लवका अध्यक्ष पुस्कल केसीले बताउनुभयो ।
‘प्रतिक्षालयमा स्थापना गरिएको पुस्तकालयमा समयअनुकुल पुस्तक थप्दै जानेछौ, अहिले बजारमा चलेका पुस्तकहरु समेत उपलब्ध छ, यसको नियमित प्रयोग र सुरक्षामा ध्यान दिएका छौ’ अध्यक्ष केसीले बेनीअनलाइनलाई भन्नुभयो ।
स्थानीयबासीले धार्मिक तथा विभिन्न उपचारका विधिका बारेमा पुस्तक धेरै माग गरेको बताउँदै नयाँ पुस्तकका लागि समेत अभियान सञ्चालन गरिएको छ । हालसम्म हरि पौडेल, सुजता खत्री, महेन्द्र श्रेष्ठ, रत्नबहादुर विक, नारायण शर्मा र राजेन्द्र पौडेलले सहयोग गर्नुभएको छ । पाठकमैत्री पुस्तक सहित अझै ब्यवस्थित गराउन प्रतिक्षालय आसपासका बासिन्दालाई रेखदेखका लागि समेत अनुरोध गरिएको छ । प्रतिक्षालयमा पुस्तक पढ्न पाइएपछि स्थानीयबासीले समेत क्लवलाई धन्यवाद दिएका छन् । क्लवले स्थानीयस्तरमा खेलकुद सहित विभिन्न सामाजिक कार्य गदैं आइरहेको छ ।
