पछिल्लो समय म्याग्दीको सदरमुकाम बेनीबजारमा एकतर्फी पार्किङ र यातायात सञ्चालनमा चालकले उल्लंघन गर्न थालेपछि एकहप्ते संयुक्त अभियान सञ्चालन गरिएको छ । जिल्ला ट्राफिक कार्यालय र नगर प्रहरीको संयुक्त अभियानमार्फत नियमित उल्लंघन गर्नेलाई तत्काल सवारीसाधन नै चाबीले ‘लक’ गर्न मिल्ने उपकरण समेत ट्राफिकले प्रयोग गर्छ ।
साँधुरो बेनीबजारमा बजारमा दायाँबायाँ नै सवारीसाधन पार्किङ गर्ने गरिएकाले हिँडडुल गर्न र सवारीसाधन चलाउनसमेत मुस्किल पर्नुका साथै दुर्घटना समेत बढेपछि मोटरसाइकल सहित साना सवारीसाधन बजारभित्रबाट र ठूला सवारीसाधनलाई रिङरोडबाट आवतजावत गर्न समेत अनुरोध गरिएको छ ।
जिल्ला ट्राफिक कार्यालयका प्रमुख विशाल परियारले बजार क्षेत्रमा तोकिएको मापदण्ड बाहेक पार्किङ र सवारीसाधन सञ्चालन गरेमा कारवाही गरिने बताउनुभयो । ‘एकतर्फी पार्किङ र सवारी आवतजावतका लागि नागरिकबाट पनि सहयोगको अपेक्षा गरेका छौ, सबै मिलेर सुरक्षित र ब्यवस्थित बनाउनुपर्छ ।’ ट्राफिक प्रमुख परियारले भन्नुभयो ।
वर्षौंदेखि अस्तव्यस्त रहेको बेनीको पार्किङको समस्यालाई समाधान गर्न सुरू गरिएको एकतर्फी पार्किङ र यातायात सञ्चालन निकै प्रभावकारी मानिन्छ । साँधुरो बेनीबजारको मुख्य र गल्लीमा जथाभावी पार्किङ गर्दा दुर्घटनाको जोखिम र बेनीबजार नै कुरूप बन्दै जान थालेपछि बि.स २०७७ साल साउन महिनादेखि लागु भएको थियो ।
‘अव्यवस्थित पार्किङ नियमनका लागि प्रहरीसँगको साझेदारीमा बजारलाई व्यवस्थित बनाउने प्रयासमा छौ’ नगर प्रहरी प्रमुख शंकर पौडेलले भन्नुभयो । हरेक साताको पहिलो ३ दिन बायाँ र पछिल्लो ३ दिन दायाँतर्फ पार्किङ गर्ने गरी ट्राफिक प्रहरीले हेरफेर गरिन्छ । यसैबीच बजारभित्र विद्यालयको बस रोक्न स्थान, जेब्रा क्रस, कन्भेक्स लेन्सको मर्मतको आवश्यकता देखिएको छ ।
