म्याग्दीको मालिका गाउँपालिका-२ रूममा बिषालु च्याउ खाँदा एकै घरपरिवारका पाँच जना बिरामी परेका छन् । जङ्गलबाट टिपेर ल्याएको च्याउ पकाएर खाएपछि रूम भिरखर्कका रे बहादुर पुनको परिवारका पाँचजना बिरामी परेको वडा सदस्य भक्तबहादुर पुनले बताउनुभयो ।
च्याउ खाएपछि टाउको दुख्ने, रिङ्गाटा लाग्ने र बान्ता हुनेजस्ता लक्षण देखिएको थियो । बिरामी भएका पाँचै जनाको उपचारका लागि रूम स्वास्थ्य चौकीमा ल्याइएको थियो । स्वास्थ्य चौकीका प्रमुख हिमाल घर्ती मगरका अनुसार बिरामीको अवस्था खतरामुक्त रहेकोे छ ।
स्वास्थ्यचोकीमा उपचारपछि पाँचै जना घर फर्किएका छन् । मानव शरीरका लागि च्याउ अति उत्तम पौष्टिक आहार भएपनि जंगलमा पाइने सबै च्याउ खान योग्य नभएको स्वास्थ्यकर्मीको भनाई छ । जङ्गलमा पाइने च्याउमा केही च्याउ त यति धेरै विषालु छन् कि शुन्य दशमलव शुन्य २ ग्राम मात्रै पेटमा पर्यो भने मान्छे केही बेरमै ज्यान गुमाउनुपर्छ । जंगलमा पाइने, रुखमा उम्रन, परालमा उम्रने, ढुंगामा उम्रने, गोबरमा उम्रने च्याउहरु पनि विषालु हुन सक्छन् ।
मानिसहरु आँखा चिम्लेर च्याउ खाइरहेको अवस्थामा बर्षेनी बिरामी हुने गरेका छन् । म्याग्दीमा बिषालु च्याउका बारेमा समुदायस्तरमा सचेतनामुलक अभियान सञ्चालन नगर्दा वर्षात् शुरु भएसँगै जंगलमा च्याउ संकलनका लागि जानेहरुले च्याउलाई ननिचेर खाँदा विषको रूपमा परिणत हुने गरेको छ ।
