पहिरोका कारण गत शुक्रबारदेखि अवरुद्ध नारायणगढ-मुग्लिन सडकखण्ड तीन दिनपछि एकतर्फी रूपमा सञ्चालनमा आएको छ। तर, सडक खुले पनि पहिरोको जोखिम भने टरेको छैन।
इच्छाकामना गाउँपालिकास्थित तुइन खोला नजिकै खसेको ठूलो पहिरो पन्छाएपछि आइतबार अपरान्ह सवा ४ बजेदेखि सडक एकतर्फी रूपमा खुलाइएको हो।
नारायणगढ र मुग्लिन दुवैतर्फबाट मेसिन प्रयोग गरी आइतबार बिहानैदेखि पहिरो हटाउने कामलाई तीव्रता दिइएको थियो।
राजमार्ग तीन दिनसम्म बन्द हुँदा सयौं सवारीसाधन र हजारौं यात्रु बाटोमै अलपत्र परेका थिए। सडक एकतर्फी खुले पनि रोकिएर बसेका गाडीहरूको लामो लाइनका कारण अहिले उक्त सडकखण्डमा ठूलो जाम लागेको छ।
काठमाडौं र पोखराबाट चितवनतर्फ र चितवनबाट काठमाडौं-पोखरातर्फ हिँडेका यात्रुहरूले घण्टौं जाममा फस्नुपरेको छ।
पहिरोको जोखिम र सवारीको चापका कारण यात्रा सहज हुन अझै केही समय लाग्ने ट्राफिक प्रहरीले जनाएको छ। प्रहरीले यात्रा गर्दा उच्च सतर्कता अपनाउन र वैकल्पिक मार्गको प्रयोग गर्न सकिने अवस्था भए सोहीअनुसार गर्न चालक तथा यात्रुहरूलाई आग्रह गरेको छ।
