सरकारले जेन-जी प्रदर्शनका क्रममा ज्यान गुमेका परिवारलाई पनि आर्थिक सहायता दिन वर्गीकरण गरेको छ । जेन-जी प्रदर्शन ज्यान गुमेमध्ये भागेका कैदीबन्दी र बालबन्दीले आर्थिक सहायता नपाउने भएका छन् ।
सरकारले जेन-जी आन्दोलनका क्रममा ज्यान गुमाएकालाई शहीद घोषणा गर्दै आर्थिक सहायता र अन्य खर्च दिने निर्णय गरे पनि कारागारबाट भाग्ने क्रममा मृत्यु भएका र बालबन्दीलाई भने यो सूचीमा राखेको छैन ।
यसअघिको मन्त्रिपरिषदको निर्णयले भदौ २३ र २४ गतेको प्रदर्शनका क्रममा ज्यान गुमाएकालाई प्रतिपरिवार १० लाख रुपैयाँका दरले आर्थिक सहायता र काजकिरिया खर्च, खाना खर्च र यातायात खर्च वापत पाँच लाख रुपैयाँका दरले प्रति परिवार १५ लाख रुपैयाँ आर्थिक सहायता उपलब्ध गराउने निर्णय गरेको थियो ।
जेन-जी प्रदर्शनको मौका पारी देशभरका धेरै कारागारबाट कैदीबन्दी भागेका थिए । भागेका मध्ये धेरै कारागार नै फर्किएका छन् भने अझै बेपत्ता भएकाको खोजी जारी रहेको छ ।
