फागुनमा हुने प्रतिनिधिसभा सदस्य निर्वाचनमा मताधिकार प्रयोग गर्न पाउने १८ देखि २८ वर्ष उमेर समूहको संख्या ६३ लाख ४१ हजार ८ सय ३४ छ । अहिले २१ वर्ष उमेरमा हिँडदै गरेकाले २०७९ सालमा भएको प्रदेश र प्रतिनिधिसभा निर्वाचनमा पहिलोपटक मतदान गरेका थिए।
आगामी निर्वाचनमा १८ देखि २० वर्ष उमेर समूहकाभित्रले पहिलो पटक मतदान गर्ने छन्। यो उमेर समूहको संख्या १८ लाख ८ हजार ४ सय ७७ छ। २०७८ सालको जनगणना अनुसार नेपालमा २ करोड ९१ लाख ६४ हजार ५ सय ७८ जनसंख्या छ। कुल जनसंख्याको ३३.५ प्रतिशत जेनजी भएको जनाइएको छ । फागुनको निर्वाचनमा यही उमेर समूह निर्णायक हुने देखिन्छ।
सरकारले अध्यादेशमार्फत कानुन संशोधन गरेपछि निर्वाचन आयोगले कात्तिक मसान्तसम्म मतदाता नामावलीमा सूचीकृत हुन छुटेका सबैलाई आग्रह गरेको छ। मतदाता नामवलीमा नाम सूचीकृत गर्न ८५ हजार एक सय सात जनाले बुधबारसम्म फोटो खिचाएको जानकारी आयोगका सूचना अधिकारी सुमन घिमिले दिए। आयोगले सुरुमा पाँच लाख मतदाता थपिने अनुमान गरेको थियो। कार्यवाहक प्रमुख निर्वाचन आयुक्त रामप्रसाद भण्डारी भने, ‘अहिलेकै गतिमा जाने हो भने यो संख्या (नयाँ थपिने मतदाता) दुई लाखभन्दा माथि जाने देखिँदैन।’
आयोगका अनुसार कात्तिक १६ गतेसम्म १८ वर्ष उमेर पुगेका मतदाताको संख्या १ करोड ८१ लाख ६८ हजार २ सय ३० पुग्नेछ । भदौ २४ गतेपछि फेरिएको अवस्था र पछिल्लो पुस्तालाई पनि निर्वाचनमा समेट्न आयोगले कात्तिक ३० गतेसम्म मतदाता नामावलीमा नाम समावेश गर्न र अधावधिक गर्न समय दिएको छ।
