चौतर्फी दवावपछि गण्डकी प्रदेश सरकारले प्रदेश अस्पताल बेनीमा शल्यक्रिया मार्फत गरिने प्रसुति र सर्जरीको पनि सेवा दिन सक्ने एमजिडिपी डाक्टर खटाएको छ। स्वास्थ्य मन्त्रालयको सिफारिसमा मुख्यमन्त्री तथा मन्त्रिपरिषद् कार्यालयले धौलागिरी अस्पताल बागलुङमा दरबन्दी भएका नवौ तहका डा. हेमन्त बास्तोलालाई प्रदेश अस्पताल बेनीमा मंसिर १० गते खटाएको छ । म्याग्दीबाट निर्वाचित गण्डकी प्रदेशसभा सदस्य रेशम जुग्जालीले एमजिडिपी डा.बास्तोला आइतबार प्रदेश अस्पतालमा हाँजिर हुने र उहाँ आएपछि सर्जरी तथा शल्यक्रिया मार्फत गरिने प्रसुति सेवा सूचारु हुने बताउनुभयो ।
म्याग्दीको एक मात्रै सरकारी अस्पतालमा प्रसुति र सर्जरीको चिकित्सक नहुदाँ तीनसातादेखि सेवा ठप्प भएको बारेमा बेनीअनलाइन सहित विभिन्न सञ्चारमाध्यमले निरन्तर समाचार प्रकाशन गरेपछि चिकित्सकको मागका लागि चौतर्फी दबाब तथा जिल्लाका राजनीतिक दल,जनप्रतिनिधि सहितले निरन्तर दबाबसँगै स्वास्थ्यमन्त्री कृष्ण पाठकले डा.बास्तोलालाई बागलुङबाट बेनीमा पठाएको र आइतबारदेखि हाँजिर हुने जानकारी गराउनुभएको छ । डा. बास्तोला प्रदेश अस्पताल पर्वतका मेडिकल सुपरिटेन्डनमा कार्यरत रहेको अवस्थामा बागलुङ सरुवा हुनुभएको थियो ।
अस्पतालमा प्रसुति र सर्जरीका बिरामीलाई रिफर गर्न थालेपछि सामाजिक सञ्जालमा समेत तिब्र आलोचना भएको थियो । गण्डकी प्रदेश सरकारका मन्त्री कृष्ण पाठकलाई बेनीमा शल्यक्रिया मार्फत गरिने प्रसुतिको चिकित्स सहित बेनी अस्पतालमा आवश्यक पर्ने अन्य सुविधाका लागि प्रतिबद्ध रहेको बताउनुभयो ।‘जिल्ला अस्पतालको अवलोकनका लागि आउँछु, त्यहाँको समस्या समाधानका लागि सक्ने सबै सहयोग हुन्छ’मन्त्री पाठकले बेनीअनलाइनलाई भन्नुभयो । प्रसुती, सर्जरी सहित अन्य नियमित आवश्यक पर्ने जनशक्तीको अभाव हुन नदिने, भौतिक संरचना सहित उपकरणमा समेत प्रदेश सरकारबाट गर्न सकिने सहयोगलाई निरन्तरता दिने मन्त्री पाठकको भनाई छ ।
जिल्ला समन्वय समिति प्रमुख दिलकुमारी खत्रीले संघीय, प्रदेश सरकारसँगै स्थानीय सरकारमार्फत पनि सेवा निवमित बनाउन बार्षिकरुपमा सहयोग आवश्यक रहेको बताउनुभयो । मन्त्री पाठकलाई अस्पतालको निरीक्षणसँगै अन्य अति आवश्यक क्षेत्रमा प्रदेशबाटै गर्न सक्ने सहयोगलाई तत्काल पठाउन माग समेत गर्ने समन्वय प्रमुख खत्रीको भनाई छ ।
५० सैयाको अस्पतालमा कन्सल्टेन्ट सर्जरी, कन्सल्टेन्ट पेडियाट्रि«सियन,कन्सल्टेन्ट रेडियोलोजिष्ट,कन्सल्टेन्ट अब्स्टेटिक एण्ड गाइनेक्लोजिष्ट,बायोमेडिकल टेक्निसियन, एनेस्थेसिया र फार्मेसी सहायकको पतपूर्तिका लागि सूचना जारी गरिएको निमित्त प्रमुख डा. रामु सापकोटाले बताउनुभयो ।
हाल अस्पतालमा अन्तरङ्ग र बहिरङ्ग सहित हाडजोर्नी, दन्त, आँखा, बच्चा उपचार कक्ष, हिंसा प्रभावितका लागि अल्पकालीन सेवा केन्द्र, डायलासिस सेवा नियमित रहेको छ । अस्पतालमा स्वास्थ्य बीमा सेवा पनि प्रभावकारी हुन सकेको छैन । बीमा भित्र पर्ने औषधि समेत उपलब्ध नहुदाँ बिरामीले निजी क्लिनिकमा गएर खरिद गर्नुपर्ने बाध्यता रहेको छ । बेनी अस्पतालमा बर्षेनी ६० हजारभन्दा बढीले सेवा लिने गरेका छन् ।
