बेनी नगरपालिका-२,गौस्वारामा सञ्चालित महायज्ञबाट ३८ फिट अग्लो गोर्वद्धन पर्वतको मुर्ती निर्माण सहित भौतिक संरचना बनाउने कार्य सुरु भएको छ । महायज्ञ समापन भएकै दिन मंगलबार शिलन्यास गरिएको छ । १५ दिनसम्म सञ्चालन भएको महायज्ञमा एक करोड पाँच लाख नगद र २४ रोपनी जग्गा सहयोग प्राप्त भएको आर्थिक संकलन उपसमितिका संयोजक हिराबहादुर थापाले जानकारी दिनुभयो ।
गौस्वारामा गौशाला सञ्चालन, आयुर्वेद अनुसन्धान केन्द्र बनाउने र धार्मिक पर्यटकीय स्थलको रुपमा विकास गर्न गोर्वद्धनको मुर्ती निर्माण गर्ने उद्देश्यले सञ्चालित महायज्ञमा स्थानीय दिपक मल्लले गौशालाका लागि १७ रोपनी १४ आना जग्गा निशूल्क उपलब्ध गराउनुभएको छ भने वडा नं–२ का जनप्रतिनिधीहरुले गौस्वाराको पूर्वाधार निर्माणमा रु. १५ लाख बजेट बिनियोजन गर्ने घोषणा गरिसकेका छन् ।
हिन्दु धर्मावलम्बीहरुका भगवान कृष्णले गोर्वद्धन पर्वत उचालेको मुर्ती निर्माण र आठ फिट अग्लो शंख राख्ने योजनालाई तिब्रता दिइने छ । मुक्तीनाथ पिठाधिश्वर स्वामी कमलनयनाचार्यको परिकल्पना अनुसार सञ्चालन भएको महायज्ञ बेनीको भाषा मंका खलको सभाहलमा महाप्रसाद वितरणमा समुन्द्रि सतहदेखि करिब दुई हजार मिटर उचाईमा रहेको गौस्वारालाई धार्मिक तथा पर्यटकीय गन्तब्य बनाउने प्रतिबद्धता जनाउनुभएको थियो ।
महायज्ञमा पण्डीत सुर्दशन बडालले कथा बाचन गर्नुभएको थियो । गौस्वारामा आयुर्वेद औषधीय हिसाबले महत्वपूर्ण स्थानीय रैथाने गाई संरक्षण गर्न गौशाला सञ्चालन गरी गहुँत र गोवर आयुर्वेद औषधी तयार पार्न कच्चा पदार्थको रुपमा प्रयोग गर्ने योजना समेत रहेको छ । गौस्वारा नजिकैको जंगललाई जडिबुटीको भण्डार समेत भनिन्छ ।
त्यहाँ पाइने जडिबुटीहरुको अनुसन्धान गरी प्रयोगमा ल्याउन स्थानीयले अनुसन्धानको क्षेत्रमा सक्रिय रहेका संघसंस्थालाई समेत सहयोगमा अगाडी बढ््ने जनाइएको छ ।
