प्राकृतिक उपचारको चिकित्सालयको रूपमा विकसित हुँदै गइरहेको म्याग्दीको प्रसिद्ध तातोपानी कुण्डमा स्नान गर्ने बिरामीहरूको चाप बढेको छ । जिल्लाको बेनी नगरपालिका–४, सिङ्गा स्थित रहेको तातोपानीको कुण्डमा नुहाउने बिरामी, सर्वसाधारण र पर्यटकहरूको दिनहुँ जसो सङ्ख्या बढ्दै जान थालेको हो ।

जाडो समय सकिएर गर्मीको समय सुरु भएसँगै अहिले तातोपानी कुण्डमा दैनिक रूपमा नुहाउन आउने बिरामी तथा सर्वसाधारण र पर्यटकहरूको चाप बढेको तातोपानी कुण्ड व्यवस्थापन समितिले जनाएको छ । तातोपानी कुण्डमा अहिले पछिल्लो पटक म्याग्दीसहित बागलुङ, कास्की, पर्वत, मुस्ताङ, काठमाडौँ, चितवन, नवलपरासी, कपिलवस्तु, ताप्लेजुङ, झापा, मोरङ, कैलाली, दाङ, रुकुम, रोल्पा, डोल्पालगायत जिल्लाबाट बिरामीहरू आएका छन् ।

यहाँको तातोपानी कुण्डमा बाहिरी जिल्लामध्ये सबैभन्दा धेरै छिमेकी बागलुङ जिल्लाबाट बिरामीहरू आउने गरेका छन् भने टाढाको जिल्लाहरू पूर्वी नेपालको ताप्लेजुङ, झापा र मोरङ तथा पश्चिमको दाङ र कैलालीबाट समेत बिरामीहरू कुण्डमा आएको तथ्याङ्क छ । यसका साथै विदेशी मुलुकहरू भारत, बङ्गलादेशबाट पनि बिरामी तथा पर्यटकहरू तातोपानी कुण्ड नुहाउनको लागि आउने गरेका छन् । तातोपानी कुण्डमा एक पटक आएर स्नान गरेर गएका बिरामीहरू रोग निको भएको भन्दै पुनः फर्किएर पटक पटक आउने गरेको भेटिन्छन् ।

पछिल्ला केही वर्षदेखि तातोपानी कुण्डमा नुहाउन आउने बिरामी, सर्वसाधारण र पर्यटकहरूको चाप बढ्न थालेपछि उनीहरूको व्यवस्थापनका लागि कुण्ड व्यवस्थापन समितिले आवश्यक पहल गरेको छ । बढ्दो चापलाई मध्यनजर गरी तातोपानी कुण्ड व्यवस्थापन समितिले मुख्य कुण्डभन्दा बाहिर दुई वटा पोखरी बनाएर नुहाउने व्यवस्थापन मिलाएको छ । तातोपानीको मुख्य पोखरीमा बिहान ६ बजेदेखि बेलुका ५ बजेसम्म महिला र पुरुषको छुट्टाछुट्टै पालो बनाएर नुहाउनको लागि समय तालिका बनाइएको छ । अहिले मुख्य पोखरीमा नुहाउनको लागि महिलाको दुई वटा समूह र पुरुषको एक वटा समूह रहेका छन् ।

तातोपानीको मुख्य पोखरी अर्थात् ठुलो कुण्डमा मात्रै दैनिक एक हजारभन्दा बढी बिरामी र सर्वसाधारणहरूले नुहाउने गर्दछन् भने बाहिरका दुई वटा पोखरीमा करिब ५ सय जनाले नियमित नुहाउँछन् । बाहिरको पोखरीमा बिहान ६ बजेदेखि राति ९ बजेसम्म नुहाउन पाइन्छ । तातोपानी कुण्ड व्यवस्थापन समितिका अध्यक्ष कृष्ण खड्काले तातोपानी कुण्डमा नियमित रूपमा करिब १२ सय जनाले दैनिक नुहाउने गरेको बताउनुभयो । उहाँका अनुसार तातोपानी कुण्डमा हरेक वर्ष २५ प्रतिशत नयाँ बिरामीहरू थपिने गरेका छन् । तातोपानी कुण्डमा पानीका थप स्रोत पत्ता लगाउने, कुण्डको संरक्षण तथा संरचना विस्तारका लागि आवश्यक पहल थालिएको उहाँको भनाइ छ ।

जमिन मुनिबाट ५५ डिग्री सेल्सियससम्मको तापक्रममा बिरेनुनको स्वादसहित निस्कने तातोपानीको कुण्डमा डुबुल्की मारेपछि ग्यास्ट्रिक, बाथ रोग, गानो गोला, युरिक एसिड, घाउ खटिरा, हार्डजोर्नी दुख्ने, छाला सम्बन्धी रोग, हड्डीको दुखाई, सड्केको, मर्किएको, बज्रिएकोसहित चिसोका कारणबाट उत्पन्न सबै प्रकारका रोगहरू निको हुने जनविश्वास रहेको छ । तातोपानी कुण्डमा आगोले पोलेका बिरामीहरू समेत आएर स्नान गरी निको भएर फर्किएका उदाहरण छन् । तातोपानी कुण्डमा नेपालको ७७ वटै जिल्ला र विदेशबाट पनि बिरामी तथा सर्वसाधारण एवं पर्यटकहरू आएर स्नान गर्ने गरेको कुण्डले जनाएको छ ।

यही बुधबार गलेश्वर शिवालय मन्दिरमा पूजा अर्चनाका लागि आउने पूर्व राजा पुर्व राजा ज्ञानेन्द्र शाह परिवार सदस्यलाई स्वागतका लागि मूल स्वागत समारोह समिति गठन गरिएको छ ।मुल समारोह समितिको संयोजक चक्रपाणी आचार्यको संयोजकत्वमा १ सय ५१ सदस्यीय समिति गठन भएको छ ।

पूर्वराज्यमन्त्री भिमप्रसाद गौचन, केन्द्रिय सदस्य जगत गौचन सहितको २५ सदस्यीय सल्लाहकार समिति, राप्रपा म्याग्दीका अध्यक्ष बिरबहादुर थापा, ब्यवस्थापन उपसमितिमा एकेन्द्र रावल र स्वयंमसेवक उपसमिति योगेन्द्रमान शेरचन रहनुभएको राप्रपाका केन्द्रिय सदस्य जगतप्रसाद गौचनले जानकारी दिनुभयो ।

फागुन २१ गते दिउँसो सडकमार्ग हुदै गलेश्वरधाम मन्दिरमा पुगेर पूजा अर्चना गर्ने कार्यक्रम रहेको छ । पूर्वराजा ज्ञानेन्द्र सहितको टोलीलाई भव्य स्वागत गरिने र नागरिकलाई समेत गलेश्वर क्षेत्रमा दर्शनभेट समेत रहेको राप्रपाले जनाएको छ । पूर्वराजा शाह गलेश्वरमा आउने जानकारीसँगै शान्ति सुरक्षा र गलेश्वर शिवालय क्षेत्र विकास कोषले समेत पूजाआजाको ब्यवस्था मिलाएको छ ।

पर्वतको जलजला गाउँपालिका–७, मिलनचोकमा शनिवार जातीय–धार्मिक र लैङ्गिक–वर्गीय सचेतना सम्बन्धी अन्तत्र्रिmया कार्यक्रम सम्पन्न भएको छ । शुन्य भेदभाव दिवसको अवसर पारेर नेपाल दलित संघ जलजला गाउँपालिकाको आयोजनामा सचेतनामूलक अन्तत्र्रिmया गरी दिवस मनाइएको हो ।

कार्यक्रममा सामाजिक अभियन्ता एवं महिला अधिकारकर्मी जमुना आचार्य र नेपाली कांग्रेस जलजला गाउँ कार्यसमितिका उपसभापति निर्मला खत्रीले जातीय, लैङ्गिक, वर्गीय, धार्मिक अधिकार, महिला सशक्तिकरण र जातीय विभेद अन्यलगायत विविध विषयहरुमा सहजीकरण गर्नुभएको थियो । कार्यक्रममा जातीय विभेद अन्त्यका लागि भएका व्यवस्थाहरुको प्रभावकारी कार्यान्वयन गर्ने सवालमा अन्तत्र्रिmया र छलफल समेत गरिएको थियो ।

कार्यक्रमका प्रमुख अतिथि जलजला गाउँपालिकाका अध्यक्ष राजुप्रसाद आचार्यले मानव समुदाय कसैले पनि कसैलाई जातीय, लैङ्गिक र वर्गीय अधिकारको नाममा विभेद गर्न नहुने बताउँदै गाउँपालिकाले यस्ता कार्यविरुद्ध आवश्यक कदम चाल्ने बताउनुभयो । उहाँले राज्यले ल्याएको समावेशी, समानुपातिक व्यवस्थाको नीतिलाई अबलम्बन गरी पछाडि पारिएको समुदायको सहभागितालाई अर्थपूर्ण बनाउन, चेतना र शिक्षाको विकासको माध्यमबाट विभेदलाई अन्त्य गर्न सकिनेमा जोड दिनुभयो ।

नेपाली कांग्रेस पर्वतका जिल्ला सदस्य लक्ष्मी हमाल आचार्यको विशेष उपस्थिति रहेको कार्यक्रम नेपाल दलित संघ जलजलाका अध्यक्ष बुद्धि परियारको अध्यक्षता, सहसचिव मिना परियारको स्वागत र सदस्य रेनु दर्जीको सञ्चालनमा सम्पन्न भएको थियो । सबै प्रकारका भेदभाव अन्त्य गर्न तथा त्यसप्रति विश्वव्यापी ऐक्यबद्धता जनाउन संयुक्त राष्ट्रसंघको पहलमा हरेक वर्ष मार्च १ तारिखमा यो दिवस मनाउने गरिएको छ ।

म्याग्दीमा विद्यार्थीको बोल्ने कलाको विकास गर्ने उदेश्यले शैक्षिक परामर्शदाताको रुपका कार्यरत स्टुडेन्ट भाइब्स अस्ट्रेलियाको आर्थिक सहयोगमा जिल्लामा पहिलोपटक विद्यालयस्तरमा सर्वाधिक धनराशीको वक्तृत्वकला प्रतियोगिताको आयोजना गरिएको छ ।

म्याग्दीका ६ वटै स्थानीय तहमा रहेका सामुदायिक तथा संस्थागत विद्यालयका कक्षा ८ देखि १२ सम्म र म्याग्दी बहमुखी क्याम्पसमा कक्षा ११, १२ मा अध्ययनरत विद्यार्थीको सहभागितामा ‘अब म पनि बोल्छु’ नामक वक्तृत्वकला प्रतियोगिताको आयोजना गरिएको हो ।

बेनी अनलाइन प्रालिको स्थानीय ब्यवस्थापनमा सञ्चालित प्रतियोगिमा सबै स्थानीय तहलाई फरक–फरक शिर्षक प्रस्तुत गरिएको छ । जिल्लामा शैक्षिक क्षेत्रमा सक्रिय ब्यक्तित्वको सहभागितामा विषय छनौट गरी प्रस्तुत गरिएको छ । स्टुडेन्ट भाइब्स अस्ट्रेलियाका संस्थापक बद्री बरुवालले विद्यार्थीको बोल्ने कलाका लागि उक्त प्रतियोगिताको आयोजना गरिएको बताउनुभयो । प्रतियोगितालाई स्थानीय तहको शिक्षा शाखाले समन्वय गरेको छ ।

प्रत्येक विद्यालयबाट १ जना सहभागि हुन पाउनेछन् । प्रतियोगितालाई २ खण्डमा बिभाजन गरिएको छ । पहिलो खण्डमा म्याग्दीका ६ वटै स्थानीय तहबाट १ जना उत्कृष्ट सहभागी छनौट गरी अन्तिम प्रतिष्पर्धाका लागि सदरमुकाम बेनीमा हुने छ । प्रतियोगिताबाट प्रथम हुनेलाई ५० हजार प्रमाणपत्र तथा ट्रफी, दोश्रोलाई ३५ हजार प्रमाणपत्र तथा ट्रफी, तृतीयलाई २५ हजार प्रमाणपत्र तथा ट्रफी साथमा अन्य आकर्षक पुरस्कारहरुको व्यवस्था गरिएको छ ।