बेनी नगरपालिका–३, भकिम्लीका धनबहादुर श्रीषले बेनी नगरपालिकाको मेयर पदमा उम्मेदवारी दिनुभएको छ । जिल्ला समन्वय समितिको सभाहलमा रहेको मुख्य निर्वाचन अधिकृतको कार्यालयमा सोमबार श्रीषले उम्मेदवारी दर्ता गराउनुभएको थियो ।
म्याग्दीका नमुना बाख्रापालक कृषक श्रीषले राज्यका निकायबाट कृषकलाई गरिने अपमान, अनुदानमा हुने भेदभाव तथा कृषि तथा पशुपालन सहित सम्रग नगरपालिका भित्रका समस्या समाधान गर्न मेयरमा उम्मेदवारी दिएको बताउनुभयो ।
‘मेरो उम्मेदवारी फिर्ताका लागि होईन्,‘अब सबै वडाभित्र अभियानमा जान्छु’ श्रीषले भन्नुभयो । नगर क्षेत्रको विकासका लागि आवश्यक सहकार्य गर्न अन्य उम्मेदवारलाई समेत अनुरोध गर्नुभएको छ । पेशाले कृषक श्रीषले उम्मेदवारी दर्ता गरेपछि सञ्चारकर्मीसँग कुराकानी गर्दै आफूले जित्ने दाबी गर्नुभयो ।
राष्ट्रिय बाख्रापालक महासंघका केन्द्रिय उपाध्यक्ष समेत रहनुभएका श्रीषले बाख्रापालक कृषकहरुलाई आफ्नो उम्मेदवारीमा विषेश सहयोग गर्न अनुरोध गर्नुभयो । उहाँले भकिम्लीमा पहिलो तथा सम्रग नगरभित्र आफ्नो सम्मानजक मत सहित विजय हुनेमा ढुक्क रहेको बताउनुभयो । मेयरका उम्मेदवार श्रीषलाई भकिम्लीमा स्वतन्त्र सहितका उम्मेदवारले समेत सघाउने संकेत मिलेको छ ।
