बेनी नगरपालिकामा राष्ट्रिय प्रजातन्त्र पार्टीले एकल उम्मेदवारी दर्ता गराएको छ । सोमबार जिसस सभाहलमा रहेको मुख्य निर्वाचन अधिकृतको कार्यालयमा मेयरमा मिनाकुमारी शर्मा सापकोटा, उपमेयरमा एकेन्द्र रावलले मनोनयन दर्ता गर्नुभएको छ । राप्रपाले नगरभित्रका केही वडामा समेत उम्मेदवारी दिएको छ ।
बेनपा–१ अध्यक्षमा नगेन्द्रबहादुर बोगटी, वडा नं २ कृष्णबहादुर बोगटी, बेनपा–४ मा वडा सदस्यमा विज्ञान हमाल, वडा नं ५ मा श्यामप्रसाद श्रेष्ठ, वडा नं ७ अध्यक्ष तोपबहादुर खत्री, वडा नं ८ झलप्रसाद गौचनले मनोनयन दर्ता गर्नुभएको राप्रपाका अध्यक्ष बिरबहादुर थापाले जानकारी दिनुभयो ।
‘यसपटक एकल उम्मेदवारीबाटै निर्वाचनमा जान्छौ,‘चुनाव चिन्ह फरक दलमा सहभागी हुन गरिएको प्रस्तावलार्इ हामीले अस्वीकार गरेका छौ’ अध्यक्ष थापाले भन्नुभयो । राप्रपालाई अन्य दलको चुनाव चिन्हमा सहभागी भएको जानकारी आएमा केन्द्रबाटै उम्मेदवारी रद्ध गर्ने निर्देशन आएको जनाइएको छ ।
यता राप्रपाले जिल्लाका अन्य स्थानीय तहमा समेत मनोनयन दर्ता भइरहेको जनाएको छ । म्याग्दीका नयाँ पुस्ताले राप्रपाले जिल्लामा विगतमा गरेका कामका बारेमा जानकारी मात्रै गराउन सकेमा लहर आउने भएकाले तालमेलमा आफ्नै चुनाव चिन्हबाट प्रतिस्वर्धा गर्न दिने वातावरण भए सहज हुने बताइएको छ ।
