श्रम, रोजगार तथा सामाजिक सुरक्षा मन्त्रालयले वैदेशिक रोजगारमा जाने कामदारको स्वास्थ्य परीक्षण सरकारी अस्पतालबाटै गर्न पाउने व्यवस्था गरेको छ ।
वैदेशिक रोजगारमा जाने नेपाली कामदारले नेपाल सरकारबाट स्वीकृत वा सरकारी स्वामित्वका स्वास्थ्य संस्थाबाट स्वास्थ्य परीक्षण गराउन पाउने भएका हुन् । यससँगै विदेश जाने श्रमिकको स्वास्थ्य परीक्षणको सिन्डिकेट अन्त्य भएकाे छ ।
श्रमिककाे स्वास्थ्य परीक्षण सम्बन्धी व्यवस्था कार्यान्वयनलाई थप व्यवस्थित बनाउन मन्त्रालयले स्वास्थ्य संस्थाको सूचीकरण प्रक्रिया अगाडि बढाएको छ।
मन्त्रिस्तरीय निर्णयअनुसार वैदेशिक रोजगारमा जाने कामदारको स्वास्थ्य परीक्षण गर्न इच्छुक स्वास्थ्य संस्थालाई सूचीकरण खुला गरिएको हो।सो निर्णय बमोजिम नेपाल सरकारबाट स्वीकृति प्राप्त तथा सरकारी स्वामित्वमा रहेका स्वास्थ्य संस्थाहरूले स्वास्थ्य परीक्षण सेवा प्रदान गर्न पाउनेछन्।
मन्त्रालयका अनुसार स्वास्थ्य संस्था सूचीकरण, नवीकरण तथा अनुगमन सम्बन्धी कार्यविधि, २०७२ को दफा ३ अनुसार आवश्यक प्रक्रिया अघि बढाइएको छ।
मन्त्रालयले जारी गरेकाे विज्ञप्तिमा भनिएकाे छ,यस मन्त्रालयको मिति २०६२।१२।१७ को माननीय श्रम, रोजगार तथा सामाजिक सुरक्षा मन्त्रिस्तरबाट भएको निर्णय अनुसार वैदेशिक रोजगारमा जाने कामदारको स्वास्थ्य परीक्षण गर्न चाहने नेपाल सरकारबाट स्वीकृति प्राप्त वा नेपाल सरकारको स्वामित्वमा रहेको स्वास्थ्य संस्थाले वैदेशिक रोजगारीमा जाने कामदारको स्वास्थ्य परीक्षण गर्न सूचीकरण खुला गर्ने र स्वास्थ्य संस्था सूचीकरण, नवीकरण तथा अनुगमन सम्बन्धी कार्यविधि, २०७२ को दफा ३ को व्यवस्था बमोजिम यस मन्त्रालयबाट सूचीकरणको लागि आवश्यक प्रक्रिया अगाडी बढाइएको व्यहोरा जानकारीका लागि अनुरोध छ ।’
मन्त्रालयले सम्बन्धित स्वास्थ्य संस्थाहरूलाई आवश्यक कागजातसहित सूचीकरण प्रक्रियामा सहभागी हुन अनुरोध गरेको छ। यसअघि वैदेशिक रोजगारीमा जाने कामदारहरुको स्वास्थ्य परीक्षण सीमित स्वास्थ्य संस्थामार्फत हुँदै आएको थियो । कामदारबाट महंगो शुल्क असुलेको गुनासो आएपछि सरकारले नयाँ व्यवस्था गरेको हो ।
