राष्ट्रिय जनसाँस्कृतिक महासंघ नेपाल जिल्ला कार्य समिति म्याग्दीको अध्यक्षमा विजय परियार चयन हुनुभएको छ । मंगलबार बेनीमा सम्पन्न चौँथो जिल्ला अधिवेशनबाट परियारको अध्यक्षता नयाँ कार्य समिति चयन भएको हो ।

समितिको उपाध्यक्षमा युकेन क्षेत्री, दुर्गामाया रोका, सचिवमा शिव वोहोरा, कोषाध्यक्षमा मनिका पुन, सहसचिवमा भुवन विश्वकर्मा र सहकोषाध्यक्षमा अस्मिता रोका चयन हुनुभएको छ ।

त्यस्तै सदस्यहरुमा सन्दिप मल्ल, गरिमा परियार, अनुपमा घर्ति, हरिकला सापकोटा, झरना विक, मार्कस विक, अभि वोहोरा र बाबुराम सुवेदी यचन हुनुभएको सचिव वोहोराले जानकारी दिनुभयो ।

अधिवेशनको उद्घाटन गर्दै राष्ट्रिय जनसाँस्कृतिक महासंघ गण्डकी प्रदेशका अध्यक्ष सुवास मल्लले संगीतकर्मीहरु देशको अवस्था र व्यवस्था परिवर्तनको संवाहक भएको बताउनुभयो ।

उहाँले कला, साहित्य र संस्कृतिको विकासका लागि सरकारले आवश्यक नीति ल्याउनुपर्ने बताउँदै अवको संगीत परिवर्तन र विकास उन्मुख हुनुपर्ने बताउनुभयो ।

कार्यक्रममा नेकपा एमालेका केन्द्रिय सदस्य तथा म्याग्दी जिल्ला इन्चार्ज भुपेन्द्र थापाले कला र संगीतले मानिसलाई सभ्यता र संस्कार समेत सिकाउने बताउनुभयो ।

जनजीवनका गीत र सृजनाहरु कालजयी बनेको उदाहरण प्रस्तुत गर्नुहुदै उहाँले कलाकारहरुले लोकप्रीयताका लागि भन्दा पनि जनताहरुलाई परिवर्तन र रुपान्तरण गर्ने खालका गीतहरु गाउनुपर्ने बताउनुभयो ।

कार्यक्रममा नेकपा एमाले म्याग्दीका अध्यक्ष बालकृष्ण सुवेदीले समाज विकासका लागि साँस्कृतिक जागरण आवश्यक रहेको बताउनुभयो । कार्यक्रममा नेकपा एमाले म्याग्दीका उपाध्यक्ष तथा जनसंगठन समन्वय संयन्त्रका संयोजक प्रमोद श्रेष्ठ, एमाले म्याग्दीका सचिव थमसरा पुन, सचिवालय सदस्य टकसरा राना लगायतको उपस्थिति रहेको थियो ।कार्यक्रम राष्ट्रिय जनसाँस्कृतिक महासंघ नेपाल म्याग्दीका अध्यक्ष अमित विश्वकर्माको अध्यक्षता, उपाध्यक्ष देवि जिसीको स्वागत र शिव वोहोराको संचालनमा सम्पन्न भएको थियो ।

हिमाली जिल्ला म्याग्दीमा पछिल्लो तथ्याङ्क अनुसार साढे ४० हजार जनाभन्दा धेरै सर्वसाधारण, नागरिकहरु स्वास्थ्य बीमाको पहुँचमा जोडिएका छन् । चालु आर्थिक वर्ष २०८१÷०८२ को हालसम्म जिल्लाभर कुल ४० हजार ६ सय ४८ जनाले स्वास्थ्य बीमा गरेका हुन् ।

स्वास्थ्य बीमा कार्यक्रममा कुल बीमित परिवार सङ्ख्या १४ हजार ६ सय २४ रहेको छ भने जिल्लामा कुल सेवा प्रदायक स्वास्थ्य संस्था दुईवटा मात्रै छन् । म्याग्दी जिल्लामा प्रदेश अस्पताल बेनी र दरबाङ आधारभूत अस्पताल दरबाङमा मात्रै नेपाल सरकारले सञ्चालन गरेको स्वास्थ्य बीमा कार्यक्रम लागू भएको छ । यी दुईवटा स्वास्थ्य संस्थामा स्वास्थ्य बीमा गरेका नागरिकले बीमाको सुविधा उपभोग गरिरहेका छन् ।

म्याग्दी जिल्लामा स्वास्थ्य बीमाको नवीकरणको दर ७२ प्रतिशत रहेको छ भने अति गरिब बीमित सङ्ख्या २२ रहेको स्वास्थ्य बीमा बोर्ड सम्पर्क शाखा कार्यालय म्याग्दीले जनाएको छ । स्वास्थ्य बीमा कार्यक्रममार्फत ६ हजार ३ सय ९६ जना ज्येष्ठनागरिकहरु समेटिएका छन् भने ५३ जना एच.आई.भी. संक्रमितहरुले स्वास्थ्य बीमा गरेका छन् । यसैगरी अति अशक्त अपाङ्गतर्फ बीमितको सङ्ख्या १ सय ५१ जना रहेकोमा कुष्ठरोग संक्रमितका बीमित २ जना र एमडिआर टिबी २ जना रहेको स्वास्थ्य बीमा बोर्डका जिल्ला संयोजक उपेन्द्र बरालले जानकारी दिनुभयो ।

जिल्लामा ३ सय ७२ जना महिला स्वास्थ्य स्वयंसेविकाहरु क्रियाशील रहेकोमा त्यसमध्ये जम्मा १ सय ९८ जनाले मात्रै स्वास्थ्य बीमा गरेका छन् । सरकारले समुदायस्तरमा खटिने महिला स्वास्थ्य स्वयंसेविकाको परिवारलाई निःशुल्क रुपमा स्वास्थ्य बीमाको सुविधा दिएको छ । नेपालमा वि.सं. २०७२ सालमा सुदुरपश्चिमको कैलाली जिल्लाबाट स्वास्थ्य बीमा लागू गरिएको थियो । अहिले ५ जनासम्मको परिवारले ३५ सय रुपैयाँ र ५ जनाभन्दा बढी सदस्य भएका परिवारले प्रतिव्यक्ति थप सातसय रुपैयाँको दरले शुल्क तिरेर स्वास्थ्य बीमा गर्न सक्ने व्यवस्था रहेको छ । स्वास्थ्य बीमा गरेपछि यसको सुविधा पाउन तोकिएकै स्वास्थ्य संस्थामा मात्रै जानुपर्दछ ।

यसैबीच ‘तपाईँको स्वास्थ्य हाम्रो अठोट’, ‘सबै नागरिकको स्वास्थ्य बीमामा सहभागिता, सुरक्षित र स्वस्थ भविष्यको सुनिश्चितता’ भन्ने नारासहित यसवर्ष देशैभर नवौं स्वास्थ्य बीमाको वार्षिकोत्सव विविध कार्यक्रमहरुको आयोजना गरेर मनाइएको छ । सोही अनुसार म्याग्दी जिल्लामा पनि स्वास्थ्य बीमाको वार्षिकोत्सव तथा विश्व स्वास्थ्य दिवस कार्यक्रम सोमबार मनाइएको छ । प्रदेश जनस्वास्थ्य कार्यालयको सभाहलमा आयोजित कार्यक्रममा स्वास्थ्य बीमा बोर्डका जिल्ला संयोजक बरालले आफ्नो प्रस्तुतीकरणसहित सहजीकरण गर्नुभएको थियो ।

कार्यक्रमममा प्रदेश अस्पताल बेनी म्याग्दीका प्रमुख मेडिकल सुपरिटेन्डेन्ट डाक्टर रविरञ्जन प्रधानले आर्थिक अभावकै कारण उपचार सेवाबाट बञ्चित कुनै पनि बिरामीलाई बेनी अस्पतालमा निःशुल्क रुपमा उपचार गर्ने गरिएको बताउनुभयो । उहाँले स्वास्थ्य बीमा कार्यक्रमलाई प्रभावकारी बनाउन सचेतना फैलाउन आवश्यक रहेकोमा जोड दिँदै बेनी अस्पतालको सेवा प्रवाहलाई थप नागरिकमैत्री बनाउन पहल भैरहेको बताउनुभयो ।

प्रदेश जनस्वास्थ्य कार्यालय प्रमुख भुवन ठकुराठीले सरकारले ल्याएको स्वास्थ्य बीमा कार्यक्रम २०२५ मा आएर बल्ल देशैभर पुगेको बताउँदै म्याग्दीमा स्वास्थ्य बीमा कार्यक्रम प्रभावकारी रहेको बताउनुभयो । जनस्वास्थ्य कार्यालयका सूचना अधिकारी गणेश सुवेदीले सञ्चालन गर्नुभएको कार्यक्रममा स्वास्थ्य बीमा बोर्डका दर्ता अधिकृत विनिता जिसीले स्वागत गर्नुभएको थियो ।

नेपाल निवृत्त शिक्षक समाज, म्याग्दीको प्रथम जिल्ला अधिवेशनबाट अध्यक्षमा पुन : हरिकृष्ण सुबेदी चयन हुनुभएको छ ।
अधिवेशनबाट उपाध्यक्षमा धुरबलाल शर्मा, महिला उपाध्यक्षमा धनकुमारी थापा, सचिवमा कोमलप्रसाद उपाध्याय र कोषाध्यक्षमा नारायणबहादुर कार्की रहनुभएको छ। सदस्यहरुमा चन्द्रबहादुर घिमिरे, मोतिराज उपाध्याय, मोहन बानिया, इन्द्रा तुलाचन, निलकण्ठ सुवेदी, यामबहादुर खत्री, हरिप्रसाद सुवेदी, शेरबहादुर खड्का, गुप्तबहादुर रोका र भिमप्रसाद गौतम रहेका सचिव उपाध्यायले जानकारी दिनुभयो ।

राष्ट्रिय महाधिवेशन प्रतिनिधीमा केशवप्रसाद रेग्मी चयन हुनुभएको र थप एक जना पछि चयन गरिने समाजले जनाएको छ ।अधिवेशनमा बोल्दै प्रमुख अतिथि नेपाल निवृत्त शिक्षक समाजका केन्द्रीय सदस्य हरिप्रसाद शर्मा लामिछानेले निवृत्त शिक्षकहरूको अनुभव र ज्ञानलाई समाजको हितमा उपयोग गर्नुपर्नेमा जोड दिनुभयो। उहाँले निवृत्त शिक्षकहरूले समाजलाई मार्गदर्शन गर्न सक्ने बताउनुभयो ।

बेनी नगरपालिकाका प्रमुख सुरत केसीले निवृत्त शिक्षकहरूको सम्मान र कल्याणका लागि नगरपालिकाले सक्दो सहयोग गर्ने प्रतिबद्धता व्यक्त गर्नुभयो ।अधिवेशनमा निर्वाचन मण्डलमा रहेर जिम्मेवारीपूर्वक अधिवेशन सम्पन्न गराउनु हुने शिवप्रसाद कटुवाल, कृष्णबहादुर थापा तथा शेरबहादुर गुरुङलाई विशेष धन्यवाद ज्ञापन गरिएको छ ।