म्याग्दीको अन्नपूर्ण गाउँपालिका–३ दानामा मुस्ताङ तर्फ जादै गरेको बससँग ठोकिएर मोटरसाइकल दुर्घटना हुँदा एक जनाको मृत्यु भएको छ। बेनी–जोमसोम–कोरला सडकअन्तर्गत ग १६ प ६१६४ नम्बरको मोटरसाइकल बेनीदेखि जोमसोमतर्फ जाँदै गरेको ग २ ख २१३९ नंको बसमा ठोक्किँदा दुर्घटना भएको थियो ।

दुर्घटनामा मोटरसाइकल चालक पर्सा जिल्ला पर्सागढी नगरपालिका–५, का २१ वर्षीय फरमुला मियाँको घटनास्थलमा नै मृत्यु भएको जिल्ला प्रहरी कार्यालय म्याग्दीका प्रहरी निरीक्षक सागर पौडेलले बताउनुभयो । मृतक फरमुला मियाँ दानामा मोटरसाइकल मर्मत केन्द्र सञ्चालन गर्दै आएको खुलेको छ ।

मोटरसाइकल मर्मत केन्द्रमा कार्यरत मिस्त्रीले सडकमा मर्मतपछि चेकजाँच गर्दा तिब्र गतिमा सवारीसाधन चलाउने गरेको पाइन्छ ।घटनास्थलमा प्रहरी निरीक्षक पौडेलको नेतृत्वमा पुगेको प्रहरीको टोलीले थप अनुसन्धानका लागि बस चालक मुस्ताङको थासाङ गाउँपालिका २ बस्ने ३६ बर्षिय कुल बहादुर तामाङलाई नियन्त्रणमा लिएर थप अनुसन्धान गरिरहेको छ।

गण्डकी प्रदेशका मुख्यमन्त्री सुरेन्द्रराज पाण्डेले धार्मिक पर्यटनका लागि पूर्वाधार विस्तारमा सघाउने प्रतिबद्धता जनाउनुभएको छ । बेनी नगरपालिका–२ ज्यामरुककोटको गौश्वरामा आयोजित गोबर्धन महायज्ञमा आउनुभएका मुख्यमन्त्री पाण्डले धार्मिक स्थलको प्रवद्र्धनका लागि पूर्वाधार आवश्यक रहेकाले सडक, धार्मिक पर्यटनसँग सम्बन्धित क्षेत्रमा सघाउने बताउनुभयो ।

मुख्यमन्त्री पाण्डेले गण्डकी प्रदेश धार्मिक पर्यटनका हिसाबले महत्वपूर्ण गन्तव्य मुक्तिनाथ, कालीगण्डकी, देवघाट, त्रिवेणीधाम, दामोदरकण्ड जस्ता प्रसिद्ध धार्मिकस्थलहरु रहेको बताउँदै त्यस क्षेत्रमा रहेका अन्य धार्मिक क्षेत्रको प्रर्बधनमा समेत सक्रिय हुने बताउनुभयो । धार्मिक तथा पर्यटकीय हिसाबले यस प्रदेशमा धेरै सम्भावना रहेकाले धार्मिक पर्यटनमार्फत समृद्ध हासिल गर्न सकिने मुख्यमन्त्री पाण्डेको भनाई थियो ।

मुख्यमन्त्री पाण्डेले गण्डकी प्रदेशलाई पर्यटकीय केन्द्र बनाउनका लागि निरन्तर काम भइरहेको भन्दै अब धार्मिकस्थलसँग पर्यटकलाई जोड्न त्रिवेणीधामदेखि मुक्तिनाथसम्मका विभिन्न स्थानमा धार्मिक संरचना निर्माण गर्ने बताउनुभयो । पश्चिम नेपालमै पहिलो पटक मुक्तिनाथ पीठाधीश्वर स्वामी कमलनयनाचार्यको सत्संकल्प र नेतृत्वमा गएको बैशाख १५ देखि सुरु भएको महायज्ञमा ३० गतेसम्म संचालन हुनेछ।

महायज्ञमा आइतबारसम्म १ करोडभन्दा बढी नगद संकलन भएको छ भने मन्दिर, गौसला तथा प्राकृतक आयूवेर्दिक चिकित्सालयका लागि स्थानीयबासीले जग्गा दान समेत गरेको वडा सदस्य चन्द्रकान्त रिजालले बताउनुभयो ।

महायज्ञमा सदरमुकाम बेनी, छिमेकी बागलुङ, पर्वत तथा देशका विभिन्न जिल्लामा बसोबास गर्ने ज्यामरुककोटबासी पुग्नुभएको थियो। पर्यटन प्रवर्धन, योग, साधना तथा सनातन संस्कृतिको संरक्षण तथा विभिन्न धार्मिक तथा पर्यटकीय पूर्वाधारहरु निर्माण गर्ने उद्देश्यले आयोजित महायज्ञमा प्रमुख वाचक आचार्य श्रीसुदर्शन बडालले गर्नुभएको छ ।

गौश्वरा गोवद्र्धन गौ धाम समितिका अध्यक्ष डम्बरबहादुर खत्री, महायज्ञ सम्पादन समितिका संयोजक तथा बेनी नगरपालिका वडा नम्बर २ का वडाध्यक्ष यामबहादुर क्षेत्री, आर्थिक संयोजक पुर्व वडा अध्यक्ष हिरा बहादुर थापा सहित स्थानीयको सक्रियतामा सुरु भएको महायज्ञबाट संकलित आर्थिकबाट तत्कालै भौतिक संरचना निर्माण सुरु गरिने छ ।

महायज्ञमा क वर्गको सदस्यताका लागि रु सातलाख ५५ हजार पाँच सय ५५ सेवाशुल्क तोकिएको छ भने उक्त सदस्यता जम्मा एक जनालाई मात्र वितरण गरिने छ ।त्यसैगरी ख वर्गको सदस्यताका लागि रु पाँचलाख ५५ हजार पाँचसय ५५ निर्धारण गरिएको छ । उक्त सदस्यता दुईजना दाताले प्राप्त गर्न सक्नुहुने छ ।त्यसैगरी पाँच जनालाई ग वर्गको सदस्यता वितरण गरिने छ ।

जसको शुल्क रु तीन लाख ५५ हजार पाँच सय ५५ रहेको छ। ११ जनालाई वितरण गरिने घ वर्गको सदस्यता शुल्क रु दुईलाख ५५ हजार पाँच सय ५५,१५ जनालाई दिइने ङ वर्गको सदस्यता शुल्क रु एकलाख,५५ हजार, पाँच सय ५५, च वर्गको सदस्यताका लागि रु ५५ हजार,पाँच सय ५५ र छ वर्गको सदस्यताका लागि रु २५ हजार,पाँचसय ५५ शुल्क निर्धारण गरिएको छ । च वर्गको सदस्यता ३५ जना र छ वर्गको सदस्यता १०८ जनालाई वितरण गरिने छ ।

बागलुङको प्रशिद्ध धार्मिक पर्यटकीय स्थल पञ्चकोटको नजिकै रहेको प्राकृतिक सुन्दरता र सांस्कृतिक विविधताले युक्त गौश्वारमामहायज्ञमा वचत भएको रकमबाट विभिन्न पर्यटकीय तथा धार्मिक पूर्वाधार निर्माण गरिनुका साथै गौशाला, बहुउद्धेश्यीय सांस्कृतिक भवन, ध्यान कुटीलगाएतका संरचना निर्माण गरिने छ । आगामी बैशाख ३० गतेसम्म हुने गोवर्धन बिराट महायज्ञमा जिल्लामा क्रियाशिल संघसंस्थाले समेत सामुहिक दान गरेका छन ।

पूर्णखोप सुरक्षित भविष्य, स्थानीय स्रोतको उपयोग स्वामित्व र सहभागिता, पूर्णखोप सुनिश्चितता जिल्ला हाम्रो प्रतिबद्धता’ भन्ने मूल नारासहित म्याग्दी पूर्णखोप सुनिश्चित जिल्ला घोषणा भएको छ ।  आइतबार सदरमुकाम बेनीमा आयोजित एक समारोहबीच म्याग्दीलाई गण्डकी प्रदेशमा यसवर्ष पनि पहिलो पूर्णखोप सुनिश्चितता एवं दिगोपना जिल्लाको रुपमा घोषणा गरिएको हो ।

बच्चा जन्मेदेखि १५ महिनासम्मका १२ सय ३५ जनाले नियमित खोप लगाइरहेका छन्भने १६ महिनादेखि २७ महिनासम्मका ३ सय ६३ र १६ देखि ५९ महिनासम्मका ३२ सय ८८ जना बालबालिकाहरु सबैले पूर्णखोप पाएको सुनिश्चिता गर्दै म्याग्दीलाई पूर्ण खोपको दिगोपना कायम राख्ने प्रतिबद्धतासहित पूर्णखोप सुनिश्चितता एवं दिगोपना जिल्ला घोषणा गरिएको छ ।

बालबालिकाहरुले जन्मेदेखि ५९ महिनासम्मको अवधिमा विभिन्न १४ प्रकारका खोपहरु पाएका छन् । जन्मेदेखि १५ महिना भित्रका बालबालिकाहरु सबैले हाल नियमित रुपमा खोप लगाइरहेका छन् ।

राष्ट्रिय खोप तालिकाअनुसार तोकिएको उमेर समूहका बालबालिकाहरु सबैले सम्पूर्ण खोपको मात्रा पुरा गरेको तथा खोप निर्देशिकाअनुसार आवश्यक सबै प्रक्रिया पुरा गरी जिल्लालाई पूर्णखोप सुनिश्चितता दिगोपना जिल्ला घोषणा गरिएको प्रदेश जनस्वास्थ्य कार्यालय म्याग्दीका प्रमुख भूवन ठकुराठीले बताउनुभयो ।

उहाँका अनुसार बालबालिकाहरुले जन्मेपश्चात् पोलियो, दादुरा, हेपाटाईटिस, जापानीज ईन्सेफ्लाईटिस, रुबेला, झाडापखाला, धनुष्टङ्कार, टाईफाइडलगायत रोगविरुद्ध पाउनुपर्ने विभिन्न १४ प्रकारका खोपको सबै मात्रा पुरा गरेका छन् ।

जिल्लाको सम्पूर्ण घरधुरीमा सर्वेक्षणसहित ५९ महिनासम्मका सबै बालबालिकाहरुको विवरण सङ्कलन गरी उनीहरुलाई पूर्णखोप लगाउनुका साथै पुनः सर्भेक्षण समेत गरिएको थियो ।

एक नगरपालिका, पाँचवटा गाउँपालिका र ४५ वटा वडा रहेको म्याग्दीमा यसअघि वडा तथा पालिकालाई पूर्णखोप सुनिश्चितता एवं दिगोपना घोषणा गरिसकेपछि जिल्लालाई औपचारिक रुपमा पूर्णखोप सुनिश्चितता भएको जिल्लाको रुपमा घोषणा गरिएको प्रदेश जनस्वास्थ्य कार्यालय म्याग्दीले जनाएको छ ।

कार्यक्रमको अवसरमा जिल्लालाई पूर्णखोप सुनिश्चितता तथा दिगोपना घोषणा गर्ने अभियानमा खटिएका स्वास्थ्यकर्मी, स्वास्थ्यसंस्थाहरु र पत्रकार महासंघलाई प्रशंसापत्रसहित सम्मान गरिएको थियो । सोही अवसरमा लामो समयसम्म सेवा गरेकोमा पालिकाअनुसार विभिन्न ६ जना महिला स्वयंसेविकालाई दोसल्ला ओढाएर प्रशंसापत्रसहित सम्मान गरिएको थियो ।

यसैगरी प्रदेश खोप समन्वय समितिको तर्फदेखि म्याग्दीलाई पूर्णखोप सुनिश्चितता घोषणा भएको तथा दिगोपना कायम राख्नको लागि प्रशंसापत्र समेत प्रदान गरिएको थियो । कार्यक्रममा आगामी दिनमा पनि म्याग्दीलाई पूर्णखोप सुनिश्चित र दिगोपना राख्ने प्रतिबद्धता जनाउँदै हस्ताक्षर गरिएको छ ।

पूर्णखोप सुनिश्चितता जिल्ला घोषणा समारोहको उद्घाटन गर्दै गण्डकी प्रदेशका पूर्वमन्त्री एवं प्रदेश सभा सदस्य रेशमबहादुर जुग्जालीले प्रदेशभरी नै म्याग्दीलाई पहिलो पूर्णखोप सुनिश्चित जिल्ला बनाउने अभियानमा खटेका सबैलाई धन्यवाद दिनुभयो । उहाँले मानव जीवनमा सबैभन्दा महत्वपूर्ण स्वास्थ्य भएकाले प्रदेश सरकारमार्फत बजेट विनियोजन गर्ने क्रममा स्वास्थ्य क्षेत्रलाई प्राथमिकता दिइएको बताउनुभयो ।

कार्यक्रममा म्याग्दीका प्रमुख जिल्ला अधिकारी गुरुदत्त ढकाल, नेपाली कांग्रेस म्याग्दीका कार्यवाहक सभापति हरिकुमार श्रेष्ठ, नेकपा एमालेका जिल्ला अध्यक्ष बालकृष्ण सुवेदी, राष्ट्रिय स्वतन्त्र पार्टीका सभापति युवराज रोका, प्रदेश स्वास्थ्य तालिम केन्द्रका जनस्वास्थ्य प्रशासक प्रविन शर्मा, प्रादेशिक स्वास्थ्य निर्देशनालय गण्डकीका खोप अधिकृत एकनारायण लम्साल र म्याग्दी उद्योग वाणिज्य संघका अध्यक्ष सुविन श्रेष्ठले आगामी दिनमा पनि जिल्लालाई पूर्णखोप सुनिश्चितता र दिगोपना कायम राख्न निरन्तर लाग्नुपर्नेमा जोड दिनुभयो ।

कार्यक्रममा प्रदेश जनस्वास्थ्य कार्यालय प्रमुख ठकुराठीले पूर्णखोप सुनिश्चितता तथा दिगोपना कार्यक्रमको प्रतिवेदन प्रस्तुत गर्नुभएको थियो ।

जिल्ला खोप समन्वय समितिका संयोजक एवं जिल्ला समन्वय समिति म्याग्दीका कार्यवाहक प्रमुख डिलकुमारी खत्रीको अध्यक्षता र जिल्ला समन्वय अधिकारी कमलप्रसाद आचार्यले स्वागत गर्नुभएको कार्यक्रम शाखा अधिकृत अमृत सुवेदीले सञ्चालन गर्नुभएको थियो । कार्यक्रममा स्वास्थ्यकर्मी र सामुदायिक महिला स्वास्थ्य स्वयंसेविकाहरुले सन्देशमूलक गीत र नृत्य प्रस्तुत गरेका थिए ।

म्याग्दीको मालिका गाउँपालिका–३, सिउदीभिरदेखि औल जाँदा स्थानीयले जोखिम मोलेर भीरमा यात्रा गर्नुपर्ने बाध्यता थियो। पैदलमार्गमा घाँस समाउँदै ज्यानको बाजी राखेर हिँड्नुपर्ने बाध्यताको अन्त्य स्थानीयले पदमार्ग निर्माण गरेपछि हटेको छ।

प्रधानमन्त्री रोजगार कार्यक्रम अन्तर्गत जोखिमपूर्ण भिर थिचोल्दै सिउदीभिर–डाँडागाउँ औलसम्म फराकिलो मापदण्डअनुसारको पदमार्गमा ३ सय मिटर सोलिङ गरी सुख्खा पर्खाल बनाएर १ सय २ सिँढी बनाएसँगै स्थानीयलाई निकै सहज भएको उपभोक्ता समितिका अध्यक्ष रेमन पुनले बताउनुभयो । ‘अब बालबालिका पनि सहजै हिड्न सक्छन्, थोरै बजेटबाट हामीले पदमार्ग नै बनाएका छौ’ अध्यक्ष पुनले भन्नुभयो ।

पाँच लाख ६७ हजारको लागतमा डाँडागाउँको सिउदीभिरदेखि औलसम्म १.५ मिटर चौडाईमा निर्मित नयाँ पदमार्गले आवतजावतलाई सहज, सुरक्षित र व्यवस्थित बनाएको अध्यक्ष पुनको भनाई छ जोखिमपूर्ण बाटोबाट पैदलयात्रासँगै घाँसदाउरा गर्न समेत स्थानीयलाई सकस हुने गरेको थियो ।

पदमार्ग निर्माण क्रममा भिर काट्ने, सुख्खा पर्खाल लगाउने, सोलिङ्ग तथा सिँढी निर्माणजस्ता कठिन कार्यहरूमा स्थानीयको सक्रियताबाट सम्भब भएको पालिकाका रोजगार सहायक मिलन सुवेदीले बताउनुभयो । कठिन भूगोलमा जोखिम मोलेर स्थानीयले बाटो बनाएपछि गाउँपालिका अध्यक्ष बेगप्रसाद गर्बुजाले समेत धन्यवाद दिदैं सिमित स्रोतसाधनबाट भएको कामको प्रंशसा गर्नुभएको थियो ।