म्याग्दीको मालिका गाउँपालिका-४, चिउरीबोट जादै गरेको बोलेरो जीप दुर्घटना हुदाँ एक जनाको मृत्यु भएको छ । सुङ्ग्रे पानिबाट चिउरीबोट तर्फ जादै गरेको ग १ ज ५६१२ नम्वरको बोलेरो जिप सडकबाट ५० मिटर तल खस्दा चिउरीबोट बर्ष ३१ का नगेन्द्र रसाईलीको घटनास्थलमा नै मृत्यु भएको हो।

चालक सहित जम्मा ५ जना सवार रहेको बोलेरोमा ओखरबोटका ३३ बर्षिय शेर बहादुर बिक, चिउरीबोटका ३१ बर्षिय नगेन्द्र गोतामे र २२ बषि भिमप्रसाद गोतामेको जनाको दरबाङ आधारभुत अस्पतालमा उपचार भइरहेको जिल्ला प्रहरी कार्यालय म्याग्दीका प्रमुख भरत श्रेष्ठले बताउनुभयो । जीपमा सवार एक यात्रु सामान्य अवस्थामा छन् ।

घाईतेको शरीरका विभिन्न भागमा चोट लागेको छ ।घाइतेको अवस्था सामान्य रहेको जनाएको छ । चालकले नियन्त्रण गुमाएपछि सडकदेखि तल झरेको प्रारम्भिक जानकारी आएको प्रहरीले जनाएको छ । घटनास्थलमा जिल्ला प्रहरी कार्यालय र इलाका प्रहरी कार्यालय दरबाङको टोली पुग्दै छ ।

म्याग्दी बहुमुखी क्याम्पसको सभापतिमा नेपाल विद्यार्थी संघका संगम चोखाल क्षेत्री विजयी हुनुभएको छ ।  नेविसंघका चोखाल क्षेत्री २८८ मत सहित विजयी हुनुभएको हो ।

अखिल क्रान्तिकारीका सन्दिप खत्रीले एक सय ६६,अनेरास्ववियुका दिनेश खत्री (सुजन)ले १९२ र अखिल नेपाल समाजवादीकी मनिषा दर्जीले ५ मत प्राप्त गर्नुभएको म्याग्दी बहुमुखी क्याम्पसका प्रमुख श्रीधर सुवेदीले जानकारी दिनुभयो । सचिवमा अनेरास्ववियुका मन्जुर कटुवाल क्षेत्री २८३ मत सहित विजयी हुनुभएको छ ।

कोषाध्यक्षमा अनेरास्ववियुकी अस्मिता भण्डारी २५२ मत प्राप्त गरी विजयी हुनुभएको छ । कार्यसमिति सदस्यहरुमा प्रतक्षतर्फ नेविसंघका विशाल विक (२६४) ,ढकबहादुर भण्डारी (२८१) ,सम्पुर्ण जिसी (२५१) ,अनुपम क्षेष्ठ (२८९) विजयी हुनुभएको छ भने अनेरास्ववियुबाट अविजित शाही (२५८४ ) विजयी हुनुभएको छ ।

समानुपातिक र प्रतक्षतर्फ गरी नेविसंघले ७ , अनेरास्ववियुले ४ र अखिल क्रान्तिकारीले एक सदस्य जितेको छ । कुल मतदाता ८२४ मध्ये ६८६ मत खसेको थियो । समानुपातिक तर्फ अनेरास्ववियुले २७७ , नेविसंघले २४४ , अखिल क्रान्तिकारीले एक सय ४२ , अखिल समाजवादीले दश मत प्राप्त गरेका छन् । म्याग्दी क्याम्पस स्ववियु सभापतिमा नेविसंघले दोस्रो पटक जितेको हो । यस अघि २०६० साल फागुन १४ मा प्रेम सिकेले सभापति जित्नुभएको थियो ।

सूचना तथा सञ्चार प्रविधि मन्त्रालय अन्तर्गतको सूचना तथा प्रसारण विभागको आयोजनामा म्याग्दीमा सञ्चालित घुम्ती शिविरबाट पत्रकार लाभान्वित भएका छन् । नेपाल पत्रकार महासंघ जिल्ला शाखा म्याग्दीको सहकार्यमा बेनी नगरपालिका–९, गलेश्वरमा सञ्चालित तीन दिनको तालिम तथा घुम्ती शिविरबाट मोफसलका पत्रकारहरु लाभान्वित भएका हुन् ।

दुर्गम क्षेत्रमा कार्यरत पत्रकारहरुको क्षमता अभिवृद्धि तालिम तथा प्रेस प्रतिनिधि प्रमाणपत्र वितरण तथा अनलाइन सञ्चारमाध्यम दर्ता सम्बन्धी घुम्ती शिविरमा विभिन्न १६ जना पत्रकारहरुलाई प्रेस प्रतिनिधि प्रमाणपत्र वितरण गर्नुका साथै तीनवटा नयाँ अनलाइन सञ्चारमाध्यम दर्ता गरिएको पत्रकार महासंघ म्याग्दीले जनाएको छ ।

तीन दिनसम्म सञ्चालन भएको तालिम र घुम्ती शिविरबाट म्याग्दीसहित विभिन्न जिल्लाका पत्रकारहरुको प्रेस प्रतिनिधि प्रमाणपत्र जारी, अनलाइन दर्ता र नवीकरण गरिएको शाखा अध्यक्ष हरिकृष्ण गौतमले बताउनुभयो ।

घुम्ती शिविरमा म्याग्दीसहित पर्वत र बागलुङ जिल्लामा क्रियाशील पत्रकारहरुले सेवा लिएका थिए । तीन दिनसम्म सञ्चालित कार्यक्रमको समापनसत्रलाई सम्बोधन गर्दै सूचना तथा प्रसारण विभागका महानिर्देशक प्रदीप परियारले तालिमबाट पत्रकारहरुको क्षमता वृद्धिमा सहयोग पुग्ने बताउनुभयो ।

उहाँले सूचना विभागद्वारा सञ्चालित तालिम तथा घुम्ती शिविर सञ्चालनमा पत्रकार महासंघ म्याग्दी शाखाले महत्वपूर्ण सहयोग पु¥याएकोमा आभार प्रकट गर्दै तालिमबाट सिकेका ज्ञान, सिपलाई कार्य क्षेत्रमा लागू गर्न सुझाव दिनुभयो । पत्रकार तथा सञ्चारकर्मीले आफ्नो क्षमता वृद्धि गरेर जिम्मेवारी पुरा गर्नुपर्नेमा उहाँले जोड दिनुभयो ।

प्रेस काउन्सिल नेपालको पत्रपत्रिका सम्परिक्षण वितरण समितिका सदस्य एवं पर्वतका उद्यमी हरिओम शर्मा लामिछानेले नागरिक तथा आम पाठकवर्गले पत्रकारले कस्तो समाचार लेख्छन् भनेर मूल्याङ्कन गर्ने भएकाले समाजलाई सुसूचित गर्दै सत्य, तथ्य र सन्तुलित समाचार सम्प्रेषण गर्नुपर्ने बताउनुभयो ।

तालिमको समापन गर्दै पत्रकार महासंघ म्याग्दीका अध्यक्ष हरिकृष्ण गौतमले जिल्लामा क्रियाशील पत्रकारहरुको क्षमता वृद्धि गर्न तथा जिल्लामै प्रेस प्रतिनिधि प्रमाणपत्र उपलब्ध, नवीकरण र अनलाइन सञ्चारमाध्यम दर्ताको सुविधा उपलब्ध गराउन सूचना विभागसँगको समन्वयमा शिविर ल्याइएको बताउनुभयो ।

तीन दिनसम्म चलेको तालिममा प्रमुख प्रशिक्षक एवं विषय विज्ञ डाक्टर विजयप्रसाद मिश्रले पत्रकारितासँग सम्बन्धित विभिन्न विषयहरुमा पत्रकारहरुलाई सहजीकरण गर्नुभएको थियो । दुर्गम क्षेत्रमा कार्यरत पत्रकारहरुको पेशागत क्षमता वृद्धि र जिल्लामा प्रेस पास वितरण तथा अनलाइन सञ्चारमाध्यम दर्ताका लागि शिविर सञ्चालन गरिएको थियो । कार्यक्रममा सूचना तथा प्रसारण विभागका निर्देशक पूर्णिमा उपाध्याय, जिल्ला हुलाक कार्यालय म्याग्दीका प्रमुख रमेश थापा, पत्रकार महासंघ म्याग्दीका संस्थापक अध्यक्ष घनश्याम खड्का र पत्रकार महासंघ पर्वतका अध्यक्ष लक्ष्मीप्रसाद सापकोटाको विशेष उपस्थिति रहेको थियो ।

पत्रकार महासंघ म्याग्दीका अध्यक्ष गौतमको अध्यक्षता र सचिव ठाकुरप्रसाद आचार्यको सञ्चालनमा सम्पन्न कार्यक्रममा उपाध्यक्ष एवं तालिम संयोजक अमित विश्वकर्माले मन्तव्य व्यक्त गर्नुभएको थियो भने सहभागीद्वय शिव बोहोरा र सुनिता किसानले अनुभव सुनाउनुभएको थियो । गएको आइतबारदेखि सुरु भई मङ्गलवार सम्पन्न तालिम तथा शिविरमा म्याग्दीबाट स्थानीय तथा राष्ट्रिय सञ्चारमाध्यमहरुमा रिपोर्टिङ गर्दै आइरहेका पत्रकार र सञ्चारकर्मीले सहभागिता जनाएका थिए ।