पशुपक्षीमा एन्टिबायोटिकको अत्यधिक प्रयोगले मानिसलाई समेत समस्या आउन थालेपछि औषधि व्यवस्था विभागले बिक्रीमा कडाइ गरेको छ ।

पशुपक्षीमा एन्टिबायोटिकको जथाभाबी प्रयोगले मासु, दूध तथा अण्डाको माध्यमबाट मानिसमा पुग्ने र मानिसमा समेत औषधिले काम नगर्ने अवस्था आएपछि सूचना निकालेर सचेत गराएको विभागले जनाएको छ ।

विज्ञहरूले एन्टिबायोटिक औषधि प्रभावकारी हुन छाड्नु चिन्ताको विषय भएको बताउँछन् । विभागले निकालेको सूचनामा ६ प्रकारका एन्टिबायोटिक प्रयोग नगर्न भनिएको छ । अत्यावश्यक अवस्थामा चिकित्सकको सिफारिशमा प्रयोग गर्नुपर्ने र त्यस्ता औषधि अस्पतालहरूमा फार्मेसीबाट मात्रै बिक्री गर्नुपर्ने विभागले जनाएको छ ।

ब्याक्टेरियाविरुद्ध प्रयोग हुने एन्टिबायोटिक औषधिहरूको नेपालमा व्यापक दुरुपयोग भइरहेको गुनासो आएपछि सूचना निकाल्नुपरेको विभागले जनाएको छ । नेपालमा कृषि क्षेत्रमा समेत उत्पादन बढाउन एन्टिबायोटिकको प्रयोग अनावश्यक रूपमा बढ्न थालेको छ ।

स्वास्थ्य मन्त्रालयका अनुसार नेपालमा प्रयोग हुने भेटरीनरी औषधि र पूरक दानामध्ये झन्डै १३ प्रतिशत एन्टिबायोटिकको हुने गरेको छ । एन्टिबायोटिकको अत्यधिक प्रयोग हुने विश्वका ३० देशको सूचीमा नेपाल पनि पर्छ । पशुपक्षीलाई छिटो बढाउन वा धेरै दूध आउने बनाउनका लागि एन्टिबायोटिक प्रयोग हुने गरेको छ । Source: ujyaaloonline.com

नेपाली रैथाने प्रजातिको भोटे कुकुर अब विश्वका विभिन्न कुकुरहरुको संस्थामा दर्ता हुने भएको छ । भोटे कुकुरको संरक्षणमा जुट्दै आएको भोटे कुकुर क्लब अफ नेपालको पहलमा अन्तर्राष्ट्रिय किन्ले क्लब (आइकेसी) ले बुधबार भोटे कुकुरलाई छुट्टै जातको रुपमा मान्यता दिएको भोटे कुकुर क्लब अफ नेपालका अध्यक्ष विजय पौडेलले जानकारी दिए ।

मान्यता पाएसँगै अन्य अन्तर्राष्ट्रिय केनेल क्लबहरू वल्र्ड केनेल युनियन, फेडेरेसन साइनोलोजिक इन्टरनेशनललगायतका संस्थाहरुमा पनि आधिकारिक मान्यता दिलाउनका लागि प्रक्रिया सुरु भएको विजयले बताए । यसले भोटे कुकुरप्रतिको चासो र समर्थनमा उल्लेखनीय वृद्धिको उनको भनाइ छ ।

भोटे कुकुरको संरक्षण तथा अन्तर्राष्ट्रिय रुपमा पहिचान दिलाउने उदेश्यका साथ माघ १९ गते पोखरा ६ लेकसाइड बाराहीघाटमा भोटे कुकुर प्रदर्शन मेला सम्पन्न गरिएको थियो । प्रदर्शनीले भोटे कुकुरप्रति मानिसहरूबीच चासो र माया अभूतपूर्व रूपमा बढेको पाइएको अध्यक्ष पौडेलले सुनाए । उक्त मेलाले संरक्षण र प्रवद्र्धनमा ठूलो योगदान पुर्याएको र आगामी दोस्रो संस्करण ढोरपाटनमा गर्ने योजना रहेको उनको भनाइ छ ।

‘अब हामी अन्तर्राष्ट्रिय रुपमा पनि दर्ज भएका छौं । भोटे कुकुर संरक्षण र प्रबद्र्धनका लागि पोखरामा भएको एक दिने प्रदर्शनीले ठूलो भूमिका खेल्यो अब दोस्रो संस्करण हामी ढोरपाटनमा गर्न चाहन्छाँै । हामीले ढोरपाटन नगरपालिकासंग सहकार्य गरेर जाने योजनामा छौं ।

आशा छ, उहाँहरुले भोटे कुकुरको प्रबद्र्धनमा सहयोग गर्नुहुनेछ,’ उनले भने, ‘नगरपालिकाले अहिलेसम्म कुनै विशेष चासो व्यक्त गरेको छैन ।

हामी निरन्तर पहलमा छौं । यो नेपालका लागि पनि गौरवको विषय हो । आइकेसीबाट प्राप्त मान्यताले भोटे कुकुरलाई अन्तर्राष्ट्रिय स्तरमा परिचित गराउने मार्ग खोलिदिएको छ, जसले आगामी दिनमा अन्य अन्तर्राष्ट्रिय केनेल क्लबहरूबाट मान्यता प्राप्त गर्ने प्रक्रियालाई अझ सहज बनाएको छ ।’ भोटे कुकुरलाई विश्वव्यापी रूपमा स्थापित गर्न क्लबले निरन्तर पहल गरिरहेको छ । dhorpatannews

वसन्त ऋतुको आगमनसँगै आपसी मेलमिलाप र सद्भावनाको सन्देश लिइ आउने फागु पर्व बिहीबार मनाइँदैछ।आजको दिन परम्परागत रूपमा विभिन्न रङ र लोला खेली मनाउने परम्परा छ।

राम्रो तरिकाले तयार पारिएका रङ र अबिरले छालाको रोग निवारण गर्ने भएकाले यस्ता रङको प्रयोग गरी फागु खेल्नाले शीतकालमा शरीरमा उत्पन्न कफको विनाश हुन्छ। बालिएको चीरको धुवाँबाट शीतकालका अनेकौं रोगका कीटाणु निर्मूल हुने हुनाले यो पर्वको आयुर्वेदिक महत्त्व छ।

फागु पर्वका उपलक्ष्यमा सरकारले सार्वजनिक बिदा दिँदै आएको छ। तराई क्षेत्रमा भने यो पर्व पूर्णिमाको भोलिपल्ट मनाउने गरिन्छ। तराईमा भोलि होली मनाइँदै छ। होली पर्वका अवसरमा थकालीहरू रङ्गीचङ्गी पोसाकमा सजिएर सपरिवार भेला भई तिर हान्ने प्रतियोगिता गर्छन्। सात दिनसम्म चल्ने यो पर्वमा प्रत्येक दिन आफ्ना दाजुभाइ तथा नातेदार भेला भई मीठामीठा खानेकुरा खाइ रमाइलो गरिन्छ।

मादक पदार्थ सेवन (मापसे) गरी सवारीसाधन चलाउनेलाई अहिलेभन्दा थप २० गुणा बढी जरिवाना हुनेगरी कानुनको मस्यौदा तयार गरिएको छ। भौतिक पूर्वाधार तथा यातायात मन्त्रालयले बनाएको सवारी तथा यातायात व्यवस्था ऐन, २०८१ को मस्यौदामा यस्तो प्रस्ताव गरिएको हो।

मस्यौदामा अर्थ मन्त्रालयले सहमति जनाइसकेको छ। अहिले मस्यौदा सहमतिका लागि कानुन मन्त्रालयमा पुगेको र कानुनले सहमति दिनेबित्तिकै मन्त्रिपरिषद्मा लैजाने तयारी भएको भौतिक पूर्वाधार तथा यातायात मन्त्रालयका उपसचिव शंकरसिंह धामीले बताए। मस्यौदामा सवारी नियम उल्लंघन गरी सवारीसाधन चलाउनेलाई गरिने जरिवाना विद्यमान ऐनमा तोकिएभन्दा धेरै बढी हुने व्यवस्था गर्न प्रस्ताव गरिएको मन्त्रालयको यातायात व्यवस्था शाखाका प्रमुखसमेत रहेका धामीले जानकारी दिए।

यातायात व्यवस्था ऐन, २०४९ को दफा १६४ मा मापसे गरी सवारीसाधन चलाएमा पहिलो पटक पाँच सय, दोस्रो पटक एक हजार र तेस्रो पटक एक हजार पाँच सजाय जरिवाना हुने व्यवस्था छ। तर नयाँ बनाउन लागिएको कानुनको मस्यौदामा मापसे वा नसालु पदार्थ सेवन गरी सवारीसाधन चलाउनेलाई सिधै १० हजार रुपैयाँ जरिवाना हुने व्यवस्था गर्न प्रस्ताव गरिएको छ।

यसैगरी निषेधित क्षेत्रमा हर्न बजाएमा पाँच सय रुपैयाँ जरिवाना हुने प्रस्ताव गरिएको छ। मस्यौदामा सडक अनुशासन उल्लंघन गर्ने पैदल यात्रुलाईसमेत जरिवानाको व्यवस्था गरिएको छ। त्यस्ता पैदल यात्रुलाई पाँच सय रुपैयाँसम्म जरिवानाको प्रस्ताव गरिएको छ। तोकिएका कागजातबिना सवारीसाधन चलाएमा एक हजार, मोबाइल फोनमा कुराकानी गर्दै सवारीसाधन चलाएमा एक हजार रुपैयाँ जरिवाना प्रस्ताव गरिएको छ।

सवारीसाधनबाट सडकमा फोहोर फाल्ने यात्रु/चालक/सहचालकलाई एक हजार रूपैयाँ, चोरीको सवारीसाधन चलाएमा पचास हजार रुपैयाँ, सवारीचालक, परिचालक, सहचालक, यात्रु, पैदलयात्री तथा अन्य व्यक्तिलाई अशिष्ट अपमानजनक व्यवहार गर्नेलाई एक हजार रुपैयाँसम्म जरिवानाको प्रस्ताव मस्यौदामा राखिएको छ। यस्तो जरिवाना तोक्ने अधिकार यातायात निरीक्षक तथा प्रहरीलाई दिइएको छ।

धूमपान सेवन गर्दै सवारीसाधन चलाएमा एक हजार रूपैयाँ जरिवाना तोक्ने अधिकार प्रहरीलाई दिइएको छ। हेल्मेट र सिट बेल्टको प्रयोग नगरेमा एक हजार, अनधिकृत व्यक्तिले ट्राफिक संकेत राख्ने, झिक्ने, फेरबदल वा नष्ट गरेमा त्यस्तालाई पाँच हजारदेखि बीस हजार रूपैयाँसम्म जरिवाना गर्ने व्यवस्था मस्यौदामा प्रस्ताव गरिएको छ।

मस्यौदामा ढोका खुला राखी सवारीसाधन चलाएमा तथा अवस्था ठिक नभएको सवारीसाधन चलाएमा त्यस्ता चालकलाई पाँच सय रूपैयाँदेखि एक हजार रूपैयाँसम्म जरिवाना तोक्न प्रस्ताव गरिएको छ। त्यस्तै मस्यौदामा तोकिएको भन्दा बढी गतिमा सवारीसाधन चलाएमा पाँच हजार रूपैयाँ तथा अरूलाई हानि पुग्ने गरी सवारी चलाएमा पच्चीस हजार रूपैयाँ जरिवाना गर्न प्रस्ताव गरिएको छ।

जथाभावी ओभरटेक गरेमा दुई हजार रूपैयाँ, सार्वजनिक सवारीसाधनमा भाडादरको सूची नराखेमा एक हजार रूपैयाँ, लेन अनुशासन पालना नगरी सवारी चलाएमा वा संकेत नदिई लेन परिवर्तन गरेमा एक हजार रूपैयाँसम्म जरिवाना गर्ने व्यवस्था मस्यौदामा प्रस्ताव गरिएको छ। फुटपाथमा सवारी चलाउनेलाई पनि जरिवानाको व्यवस्था गरिएको छ। त्यस्ता सवारीचालकलाई एक हजार रूपैयाँसम्म जरिवाना हुने छ। nagariknews.com