आफ्नो जन्मदिनमा महंगो खर्च गरेर मनाउने संस्कार छ। धर्तीमा पाइला टेकेको दिनलाई भोजभतेर गरेर फजुल खर्च गर्दै उत्सवको रुपमा मनाउनेहरूको बीचमा सामाजिक एवम् मानवीय सेवामा सधैँ सक्रिय भूमिकामा रहनुभएका म्याग्दीका एक युवा ब्यवसायीले विभिन्न क्षेत्रमा सहयोग गरी जन्मदिन मनाउनुभएको छ ।

म्याग्दी उद्योग वाणिज्य संघ म्याग्दीका अध्यक्ष सुविन श्रेष्ठले अभिभावविहिन बालबालिका, मृगौला पीडित र नेपाल पत्रकार महासंघको आपतकालिन कोषमा सहयोग गर्नुभएको हो ।

बेनी नगरपालिका–७ संगमचोकका श्रेष्ठले नेपाल बाल संगठन बेनी शाखामा कार्यरत बाल गृहका बालबालिकालाई १० हजार, बेनी नगरपालिका–७,की मृगौला पीडित जमिला बेगम र नेपाल पत्रकार महासंघको आपतकालिन कोषमा १० हजार सहयोग गर्नुभएको छ ।

हरेक बर्ष जन्मदिनको अवसरमा फजुर खर्च नगरी सामाजिक एवम् मानवीय सेवामा सहयोग गर्ने श्रेष्ठले बताउनुभयो । ‘‘जन्मदिनमा हरेक बर्ष विभिन्न क्षेत्रमा सहयोग गर्ने गरेको छु, यो कार्यलाई आगामी दिनमा पनि निरन्तर दिन्छु ।’’ श्रेष्ठले भन्नुभयो । मृगौला रोगबाट ग्रसित जमिला बेगमले उक्त सहयोगबाट उपचारमा सहज हुने र विगतमा पनि उहाँबाट सहयोग प्राप्त भएको बताउनुभयो ।

पश्चिम म्याग्दीको मालिका गाउँपालिका–२, रुममा बिहीबार न्यायिक संवाद तथा कानुनी सचेतनासम्बन्धी विषयमा अभिमुखीकरण कार्यक्रम सम्पन्न भएको छ । मालिका गाउँपालिका न्यायिक समितिको आयोजना र वडा कार्यालय रुमको समन्वयमा अभिमुखीकरण गरिएको हो ।

वडास्तरमा न्याय र कानुनको सचेतना जगाउने उद्देश्यले अभिमुखीकरण कार्यक्रम सञ्चालन गरिएको मालिका गाउँपालिकाले जनाएको छ । कार्यक्रममा विवाद र द्वन्द्वको अवधारणा, विकास, कानुन न्याय, न्यायिक समितिको संवैधानिक व्यवस्था, महत्व, सिद्धान्त, न्यायिक समितिको क्षेत्राधिकार, विवादका प्रकृति र मेलमिलाप, सामाजिक न्याय मानवअधिकार, लैङ्गिक समानता एवं सामाजिक समावेशीकरण विषयमा सहजीकरण गरिएको थियो ।

कार्यक्रमको मालिका गाउँपालिकाका उपाध्यक्ष लक्ष्मीदेवी घर्तीमगर पुन, प्रमुख प्रशासकीय अधिकृत हरिश्चन्द्र ढकाल र न्यायिक सहजकर्ता मिठु आचार्यले सहजीकरण गर्नुभएको थियो । सोही अवसरमा अभिमुखीकरण कार्यक्रमलाई म्याग्दीका सहायक प्रमुख जिल्ला अधिकारी अनिशा आचार्यले सम्बोधन गर्नुभएको थियो । कार्यक्रममा मालिका गाउँपालिकाका योजना अधिकृत सोमबहादुर केसी, पर्यटन तथा उद्योग कार्यालय म्याग्दीका कम्प्युटर सहायक सन्तोष ढुङ्गाना लगायतको विशेष उपस्थिति रहेको थियो ।

यसअघि न्यायिक समितिले मालिका गाउँपालिकाको विम, देवीस्थान र डाँडागाउँमा न्यायिक संवाद तथा कानुनी सचेतना सम्बन्धी अभिमुखीकरण कार्यक्रम सञ्चालन गरिसकेको जनाएको छ । रुमका वडा अध्यक्ष उदयकुमार बुढाथोकीको विशेष उपस्थिति रहेको कार्यक्रममा वडा सदस्य, पालिकाका कर्मचारी, सामाजिक संघसंस्थाका प्रमुख तथा प्रतिनिधि र स्थानीयवासीको सहभागिता रहेको थियो ।

माध्यमिक शिक्षा परीक्षा (एसइई) दिएर बसेका विद्यार्थीहरुलाई म्याग्दीको सदरमुकाम बेनीमा सौन्दर्यकला सम्बन्धी तालिम सुरु भएको छ । पोखराको गैह्रपाटनमा सञ्चालित पश्चिमाञ्चल सेकेण्डरी स्कुल र बेनीबजारको हुलाकचोकमा रहेको प्रजिया व्यूटीपार्लर एण्ड टे«निङ सेन्टरको संयुक्त आयोजनामा तालिम सञ्चालन गरिएको हो ।

एसइई परीक्षा दिएर बसेका विद्यार्थीहरुलाई सिप सिकाएर आत्मनिर्भर बनाउने उद्देश्यले सौन्दर्यकला तालिम सञ्चालन गरिएको आयोजकले जनाएको छ । तालिमको उद्घाटन गर्दै सौन्दर्यकला व्यवसायी संघका केन्द्रीय उपाध्यक्ष सोनम गुरुङले तालिमले युवा विद्यार्थीहरुलाई स्वरोजगार बन्न सहयोग पु¥याउने बताउनुभयो । उहाँले सिप सिकेपछि रोजगाारीको अवसर आउने बताउँदै सक्रियतापूर्वक तालिम लिन सहभागीलाई सुझाव दिनुभयो ।

प्रजिया व्यूटीपार्लर एण्ड टे«निङ सेन्टरमा सञ्चालित तालिममा एसइई परीक्षा दिएर बसेका २३ जना छात्राहरुले सहभागिता जनाएका छन् । एक हप्तासम्म निःशुल्क रुपमा सञ्चालन हुने सौन्दर्यकला सम्बन्धी विषयको तालिममा खासगरी स्किन केयर अर्थात् छालाको हेरचाह, मेकअप, फेसियल, हेयर स्टाइललगायत विविध विषयहरुमा प्रशिक्षण भैरहेको छ । सौन्दर्यकला व्यवसायी संघ म्याग्दीको अध्यक्ष समेत रहनुभएकी प्रजिया व्यूटीर्पालरका प्रोप्राइटर काकीले विद्यालयसँग जोडिएर निःशुल्क तालिम सञ्चालन गर्न पाएकोमा विद्यालयलाई धन्यवाद दिनुभयो ।

प्रोप्राइटर कार्कीले सिप सिकेर स्वदेशमै पेशा तथा व्यवसाय सञ्चालन गर्न सकिने र विदेशमा जाँदा समेत तालिमले सहयोग पु¥याउने बताउँदै पछिल्लो समय सौन्दर्यकलाको माग गाउँ गाउँसम्म पुगेको बताउनुभयो । कार्यक्रम अध्यक्ष कार्कीको अध्यक्षता, सौन्दर्यकला व्यवसायी संघ म्याग्दीका कोषाध्यक्ष टिका पुनको स्वागत र पत्रकार अमित विश्वकर्माको सञ्चालनमा सम्पन्न भएको थियो ।

तालिममा पश्चिमाञ्चल सेकेन्डरी स्कुलका अध्यक्ष रामनाथ ओझा, प्रिन्सिपल सरोज कोईराला, सौन्दर्यकला व्यवसायी संघ म्याग्दीका संस्थापक अध्यक्ष संगीता श्रेष्ठ, सल्लाहकार सरस्वती जिसीसहित सौन्दर्यकर्मीहरुको विशेष उपस्थिति रहेको थियो । पछिल्लो समय सौन्दर्यकला व्यवसाय गर्ने र सुन्दर बन्ने चाहना बढ्दै गैरहेको देखिन्छ ।

म्याग्दी जिल्ला रघुगंगा गाउँपालिका वडा नं. २ का ६० वर्षीय एक पुरुष सम्पर्कविहीन भएका छन् । चैत २३ गते बिहानदेखि वडा नं. २ पञ्चासे निवासी ६० वर्षीय अम्बरबहादुर खत्री सम्पर्कविहीन भएका हुन् ।

सम्पर्कविहीन खत्रीका जेठा छोरा राम खत्रीका अनुसार आफू काम विशेषले काठमाडौंमा रहेको र सामान्य रूपमा बुबा कहीँ जानु भएको होला भनेर केही दिन खोजी नगरेको तर लामो समयदेखि सम्पर्कविहीन भएपछि खोजी कार्य सुरु गरिएको उनले जानकारी दिए ।

आमासँग बाबाको कहिलेकाहीँ झगडा पर्दा विगतमा पनि ‘म जान्छु भारतमा बहिनी भेट्न र उतै बस्छु’ भन्दै घुर्की लाउने गरेकाले सोही अनुरूप बुझ्दा पनि बुबा भारत ‍नगएको र आफ्ना माइला बालगायतका आफन्त तराईमा पर्सातिर बसोबास गर्ने हुँदा उता पनि बुझ्दासमेत बुबाको अत्तोपत्तो नलागे पछि खोजीलाई तीव्रता दिइएको रामले स्पष्ट पारे ।

खत्रीका आफन्तले उनको खोजी गरिदिन आग्रह गर्दै जिल्ला प्रहरी कार्यालयमा निवेदन दिएका छन् । खत्रीलाई भेट्ने वा देख्नेले ९८५७६५२५१२ र ९८४७६२७००९ नम्बर मा खबर गरिदिन परिवारले आग्रह गरेको छ । वैदेशिक रोजगारीका लागि खत्रीले करिब दुई दशक कतार र साउदीमा बिताएका थिए भने उनको घरमा श्रीमती, ३ छोरा र ९३ वर्षीय आमा रहेका छन् ।