‘उद्योग, व्यापार र कलाको विकास गरौं, संस्कृतिको संरक्षण गर्दै पर्यटन प्रवद्र्धन गरौं’ भन्ने मूल नारासहित शनिवार म्याग्दी उद्योग वाणिज्य संघको ३१औं वार्षिक साधारणसभा सम्पन्न भएको छ ।

साधारणसभाको अवसरमा १०औं म्याग्दी महोत्सवको आयव्यय सार्वजनिक गर्नुका साथै विभिन्न संघसंस्था, उद्योगी व्यवसायीलाई आर्थिक सहयोग तथा उत्कृष्ट विद्यार्थीलाई सम्मान गरिएको हो ।

साधारणसभामा गएको पुस २८ गतेदेखि माघ ८ गतेसम्म म्याग्दीको सदरमुकाम बेनीबजारस्थित खुलामञ्चमा लगाइएको  म्याग्दी महोत्सव एवं माघेसङ्क्रान्ति मेलामा प्रवेश टिकट बिक्रीबाट प्राप्त आम्दानीमध्ये सामाजिक संघसंस्थाहरुलाई आर्थिक सहयोग गरिएको छ ।

टिकटबाट भएको आम्दानीतर्फ नेपाल पत्रकार महासंघ जिल्ला शाखा म्याग्दीलाई ५० हजार, राष्ट्रिय लोक तथा दोहोरीगीत प्रतिष्ठान नेपाल जिल्ला कार्यसमितिलाई ३५ हजार र नेपाल बाल सङ्गठनलाई २५ हजार रुपैयाँको चेक हस्तान्तरण गरिएको थियो ।

यसैगरी म्याग्दी उद्योग वाणिज्य संघले स्थापना गरेको व्यवसायी हितकोषबाट गएको १ वर्षको अवधिमा विभिन्न विपद्लगायत घटनाबाट क्षति बेहोरेका उद्योगी, व्यवसायी तथा आफन्त गुमाएका संघका सदस्यहरुलाई पनि आर्थिक सहयोग रकम हस्तान्तरण गरिएको म्याग्दी उद्योग वाणिज्य संघले जनाएको छ ।

सोही अवसरमा म्याग्दी बहुमुखी क्याम्पसको बिबिएसतर्फ उत्कृष्ट अङ्कसहित स्नातकोत्तर तह उत्तीर्ण हुन सफल पर्वतको जलजला गाउँपालिका–२ निवासी राजेश कार्की र म्याग्दीको बेनी नगरपालिका–६ निवासी सुष्मा उपाध्याय पौडेललाई क्रमशः नगद पाँचहजार रुपैयाँसहित दोसल्ला ओढाएर कदरपत्रले सम्मान गरिएको थियो ।

साधारणसभामा म्याग्दी उद्योग वाणिज्य संघका अध्यक्ष सुविन श्रेष्ठले संस्थागत, महासचिव नारायण घर्ती क्षत्रीले प्रगति र कोषाध्यक्ष सुमन श्रेष्ठले गएको आवको आयव्यसहितको आर्थिक प्रतिवेदन प्रस्तुत गर्नुभएको थियो । साधारणसभाको उद्घाटन गर्दै बेनी नगरपालिकाका नगर प्रमुख सुरत केसीले जिल्लाको उद्योग, व्यापार, कला र संस्कृतिको संरक्षण तथा पर्यटन प्रवद्र्धनमा महत्वपूर्ण भूमिका निर्वाह गरेको बताउनुभयो ।

उहाँले बेनी नगरपालिका र उद्योग वाणिज्य संघको सहकार्यमा व्यावसायिक कर सङ्कलनको कार्य अगाडि बढाइएको बताउनुभयो ।

संविधानसभा सदस्य रेशमबहादुर बानियाँले निजी क्षेत्रको छाता सङ्गठन म्याग्दी उद्योग वाणिज्य संघले मेला, महोत्सवमार्फत जिल्लाको पर्यटन क्षेत्रको विकासमा सहयोग पु¥याएको बताउनुभयो ।

नेपाल उद्योग वाणिज्य महासंघको गण्डकी प्रदेश अध्यक्ष अमृत भट्टचनले पछिल्लो समय विभिन्न कारणले उद्योग व्यवसाय धरासायी बनेको बताउँदै सरकारले उद्योगमैत्री नीति र कानुन निर्माण गरी कार्यान्वयन गर्नुपर्नेमा जोड दिनुभयो ।

साधारणसभाको उद्घाटनसत्रमा नेपाली कांग्रेस म्याग्दीका उपसभापति हरिकुमार श्रेष्ठ, नेकपा एमालेका जिल्ला अध्यक्ष बालकृष्ण सुवेदी, राष्ट्रिय प्रजातन्त्र पार्टीका अध्यक्ष विरबहादुर थापा, मालिका गाउँपालिकाका अध्यक्ष बेगप्रसाद गर्बुजा, म्याग्दीका प्रमुख जिल्ला अधिकारी गुरुदत्त ढकाल, लेखनाथ उद्योग वाणिज्य संघ पोखराका अध्यक्ष विनोद श्रेष्ठ, म्याग्दी उद्योग वाणिज्य संघका पूर्व अध्यक्ष जीवनबहादुर विश्वकर्मा, नेपाल पत्रकार महासंघ जिल्ला शाखा म्याग्दीका अध्यक्ष हरिकृष्ण गौतम र महिला उद्यम विकास समितिका सभापति अम्बिका श्रेष्ठले शुभकामना मन्तव्य व्यक्त गर्नुभएको थियो ।

म्याग्दी उद्योग वाणिज्य संघका अध्यक्ष सुविन श्रेष्ठले स्वागतसहित अध्यक्षता र महासचिव नारायण घर्ती क्षत्रीले सञ्चालन गर्नुभएको साधारणसभाको उद्घाटनसत्र संघका वरिष्ठ उपाध्यक्ष राजेश शाक्यले धन्यवाद मन्तव्यका साथ समापन गर्नुभएको थियो ।

नेपाल पत्रकार महासंघ म्याग्दी शाखाले समाचार सङ्कलनकै क्रममा पत्रकारको हत्या भएको र आमसञ्चार माध्यममा आक्रमण गरिएको विरोधमा म्याग्दीको सदरमुकाम बेनीमा विरोध प्रदर्शन गरेको छ ।

शनिबार विहान जिल्ला प्रशासन कार्यालय अगाडी बिरेन्द्रचोकमा बिरोधसभाको आयोजना गरी शुक्रवार भएको राजावादीहरूको आन्दोलनमा पत्रकार सुरेश रजकको हत्या र संचारगृहमा तोडफोड गर्नेलाई कडा कारबाहीको माग गरेको हो ।

जिल्ला शाखा म्याग्दीका अध्यक्ष हरिकृष्ण गौतमले भिडियो खिचिरहेको घरमा पूर्वराजा ज्ञानेन्द्र शाहका सर्मथकहरूले थुनेर आगो लगाएको घटनाको निन्दा गर्दै छानबिन र दोषी उपर कारवाहीको माग गरेका छन् ।

स्वर्गीय पत्रकार रजकलाई श्रद्धाञ्जली अर्पण गदैं परिवारप्रति गहिरो समवेदना प्रकट गरिएको छ । सचिव ठाकुरप्रसाद आचार्यले सञ्चालन गरेको शोक तथा विरोधसभामा नेपाल पत्रकार महासंघ म्याग्दीका संस्थापक अध्यक्ष घनश्याम खड्का लगायतको उपस्थिती रहेको थियो।

यसैबीच पत्रकार महासंघ म्याग्दी शाखाले ७० औं स्थापना दिवसको अवसरमा शनिबार आयोजना गर्ने भनिएको कार्यक्रम अर्को सूचना जारी नभएसम्मका लागि स्थगित गरेको छ ।

५० शैयाको बेनी अस्पतालको भवनमा लिफ्ट जडान भइरहेको छ । चार तले भवनको झ्यालढोका राख्ने,विद्युत, पानी जडान, रंगरोगन र टायल राखिएको छ । भवनभित्र र बाहिर मजदुरहरु धमाधम काम गरिरहेका छन् ।भवनको भुईतला देखि चौथो तलासम्म चिटिक्क देखिएको छ ।

खानेपानीको ट्याकी राखिएको छ, शौचालय, बिरामी कक्षहरूका साथै कार्यालय प्रयोजनका लागि आवश्यक संरचनाहरूमा पनि काम तिब्र गतिमा अगाडी बढेको छ । शुक्रबार अस्पताल भवनभित्र प्रवेश गर्दा चालु आवभित्रै नयाँ भवनबाट सेवा दिन सकिने अवस्था देखिएको बेनी अस्पताल ब्यवस्थापन समितिकी अध्यक्ष एवम् जिल्ला समन्वय समितिकी उपप्रमुख दिलकुमारी खत्री बताउनुहुन्छ ।

‘हरेक दिन कामले गति लिएको छ, अब अस्थायी बाँकी रहेको कामलाई समेत पूर्णता दिएर भवनबाटै सेवा सञ्चालन गर्नेछौ’ अध्यक्ष खत्रीले भन्नुभयो । भवनभित्रका सबै संरचनालाई एकैसाथ सञ्चालनका लागि तयारी भइरहेको छ । भवन भित्र र बाहिर धमाधम काम भइरहेको अवस्थामा कोरोनाको समयमा प्रयोग भएको भवनबाट समेत बिरामीलाई हटाएर त्यहाँ टायल सहितका बाँकी काम समेत यसै महिना सम्पन्न गर्ने निर्माण ब्यवसायीले प्रतिबद्धता ब्यक्त गरेको बेनी अस्पतालले जनाएको छ ।

भुकम्प प्रतिरोधी क्षमत्ताको भवन अपाङ्ग मैत्री छ । भुईतलामा लोन्डरी, मोर्टुअरी, किचन, पहिलो तलामा ईमरजेन्सी, ल्याब, रेडियोलोजी, पहिलो तलामा अपरेशन थियटर, बहिरंग सेवा र अन्तिम तलामा प्रशासन रहने छ ।

सघन शहरी तथा भवन निर्माण आयोजना बागलुङले बि.स.२०७३ मङसिर २१ गते भवन निर्माणका लागि महादेव खिम्ती–गल्वा–रफिना जेभीसँग१८ करोड ८४ लाख आठ हजार ८९ मा ठेक्का सम्झौता गरेको थियो । २४ करोड चार लाख २९ हजार ८६९ लागत अनुमान गरिएको थियो । हालसम्म ९० प्रतिशतभन्दा बढी भौतिक प्रगति भएको जनाइएको छ।

म्याद सकिएको दुई वर्षपछि बेनी नगरपालिका–५ पछै रावण पार्कमा रावणको मुर्ती बाहेकको कामले गति लिएको छ । दुई वर्षमा सम्पन्न गर्ने लक्ष्यसहित २०७७ साल फागुनमा धर्म एस कास्यप जेभीले रु. एक करोड ७६ लाखमा ठेक्का सम्झौता गरेको रावण पार्क निर्माणकार्यले पछिल्लो दुई महिनायता तीव्रता पाएको हो ।

संस्कृति, पर्यटन तथा नागरिक उड्डयन मन्त्रालयको पर्यटन पूर्वाधार तथा पर्यटन उपज विकास साझेदारी कार्यक्रमअन्तर्गत मन्त्रालयको ७० र बेनी नगरपालिकाको ३० प्रतिशत लागत साझेदारीमा रावणको मूर्तिसहित पार्क निर्माण गर्न थालिएको थियो ।

योजनाका बारेमा नगरपालिकाले नियमित प्रतिवेदन बुझाउन नसक्दा आव २०७९/८० र २०८०/८१ मा बजेट व्यवस्थापन हुन नसकेको योजनाका निर्माण व्यवसायी पनि पन्छिन खोजेपछि निर्माण ४४ महिनासम्म निर्माण रोकिएको थियो । लामो समयको प्रयासपछि बजेट व्यवस्थापन गरेर २०७८ साल असारदेखि रोकिएको रावण पार्क निर्माणकार्यलाई लयमा फर्काएको बेनी नगरपालिका–५ का वडाध्यक्ष गोविन्द बानियाँले बताउनुभयो ।

“पार्कमा घेराबार, प्रवेशद्वार, पदमार्ग निर्माणको काम करिब सकिएको छ । रावणको मूर्ति राख्ने ठाउँमा जग खन्न थालेका छन्”, उहाँले भन्नुभयो, “जसोतसो पार्क बन्ने देखिए पनि सर्वोच्च अदालतमा परेको मुद्दाको टुङ्गो नलागेसम्म रावणको मूर्ति राख्ने विषयमा अन्योल सृजना भएको छ ।”

ठेकेदारले रु १८ लाख खर्चेर पार्कमा राख्ने छ मिटर अग्लो रावणको मूर्ति तयार पारेका छन् । पर्वतका केदारनाथ दासले गत असारमा सर्वोच्च अदालतमा दायर गरेको रिटमा रावणको प्रतिमा नराख्न अन्तरिम आदेश दिएको थियो ।

ऋषिमुनिहरूले तपस्या गरेको स्थानमा रावणको मूर्ति राख्न नहुने तर्कसहित परेको मुद्दामा अदालतबाट फैसला हुन भएको ढिलाइले अन्योल भएको वडाध्यक्ष बानियाँले बताउनुभयो । पछैस्थित पुलाश्रम मन्दिरका पुजारी जगदीश सुवेदीका अनुसार हिन्दू धर्मग्रन्थ रामायणका पात्र पुलह, पुलत्य ऋषिको तपोभूमि पछैमा रावण जन्मिएको र उनको नाभि गाडेको ठाउँमा राखिएको शिला अझै सुरक्षित छ ।

करिब १४ रोपनी क्षेत्रफलमा फैलिएको पुलाह आश्रम क्षेत्रमध्ये चार रोपनीमा पार्क बनाउन लागिएको हो । आश्रममा रहेका ऋषिमुनि मन्दिर, हवन कुण्ड, रावणको नाभी गाडिएको भनिने स्थानलाई यथावत् संरक्षण गरी रावणको मूर्तिसहित बगैँचा, विश्रामस्थल, घेरबार र जमिन संरक्षणलगायत पूर्वाधार निर्माणको काम ७० प्रतिशत सकिएको ठेकेदार कम्पनीका प्रतिनिधिले बताएका छन् ।

घेराबारका लागि पर्खाल निर्माण भइसककेको छ । पार्क निर्माणले पर्यटन प्रवर्द्धन हुने स्थानीयले आशा गरेका छन् । समुद्री सतहदेखि दुई हजार मिटर उचाइमा रहेको रावण पार्क निर्माणस्थल पछैबाट धवलागिरि, नीलगिरि, अन्नपूर्ण हिमशृङ्खला, सूर्योदयको मनोरम दृश्यका साथै म्याग्दी र कालीगण्डकी नदी दोभानमा अवस्थित बेनीसहित जिल्लाका अधिकांश भूगोलको दृश्यावलोकन गर्न सकिन्छ ।

यहाँ पुलह, कपिल र जडभरत ऋषिले तपस्या गरी सिद्धि प्राप्त गरेको पौराणिक मान्यता छ । रामायणको पाँचौँ अध्यायमा रावणको जन्म पछैमा भएको उल्लेख छ । पुलह, पुलत्स्य र भरत ऋषिले पछैमा तपस्या गरेको रामायणमा व्याख्या गरिएको छ । विसं २०६६ मा म्याग्दी उद्योग वाणिज्य सङ्घका पूर्वअध्यक्ष प्रमोदकुमार श्रेष्ठलगायतले धार्मिक पर्यटकलाई लक्षित गरेर बेनीमा उद्यान बनाउने योजनाको परिकल्पना गर्नुभएको थियो ।

विसं २०७४ देखि नै बजेट विनियोजन गरे पनि ठाउँको विवाद र स्रोतको अभावमा रामायण उद्यानको योजना कार्यान्वयन हुनसकेको थिएन । मुक्तिनाथ प्रवेशद्वार गलेश्वर, पुलाचौरको पछै, जगन्नाथ र टोड्के क्षेत्रलाई समेटेर धार्मिक करिडोर बनाउने योजना पनि अघि सारिएको छ । बेनी बजारबाट गाडीमा ३० मिनेट यात्रा गरेपछि पछै पुग्न सकिन्छ । बेनी अर्थुङ्गे हुँदै बाँसबोटसम्मको सडक कालोपत्र भएको छ । रासस