दाजु कमलबहादुर पुर्जाको आँसुले भरिएको सन्देश

आदरणीय मेरो विश्वभरिका परिवार तथा मित्रहरू,
नमस्ते

यो सन्देश कसरी लेखूँ मलाई थाहा छैन। मैले आफ्नो पूरा मनैदेखि प्रार्थना गरेको थिएँ कि मैले तपाईंहरूसँग एउटा खुसीको खबर साझा गर्न पाऊँ। संसारभरिका लाखौं अद्भुत मानिसहरूले भाइ निर्मल (निम्सदाइ) र उनीसँगै रहेका सबै आरोहीहरूका लागि प्रार्थना गर्नुभएको थियो। तर दुःखको कुरा, हाम्रो प्रार्थना हामीले आशा गरेजस्तो रूपमा स्वीकार भएन।

अत्यन्तै भारी मनका साथ म यो स्तब्धकारी र दुःखद खबर साझा गर्दैछु कि मेरा प्रीय साना भाइ निर्मल “निम्सदाइ” पुर्जा र अन्य आरोहीहरू अब हामीमाझ रहनुभएन।

मलाई यस्तो महसुस भइरहेको छ कि मैले मेरो पूरै संसार नै गुमाएँ। उनी मेरो मुटुको धड्कन थिए। हाम्रो परिवारले भोगिरहेको यो पीडालाई व्यक्त गर्न म शब्दहरू पाउन सकिरहेको छैन। प्रार्थना गर्नुहुने, आशा राख्नुहुने, फोन गर्नुहुने र सहयोगको सन्देश पठाउनुहुने प्रत्येक व्यक्तिलाई धेरै-धेरै धन्यवाद। तपाईंहरूको दयाभाव हाम्रा लागि शब्दमा व्यक्त गर्न नसकिने भन्दा बढी मूल्यवान् रह्यो।

आज, यस अकल्पनीय क्षतिका कारण १० वटा परिवारहरू शोकमा डुबेका छन्। यस त्रासदीमा आफ्ना प्रियजन गुमाउने प्रत्येक परिवारप्रति म हार्दिक समवेदना व्यक्त गर्दछु। हामी तपाईंहरूको पीडा महसुस गर्छौं, र हाम्रो मन तपाईंहरूको साथमा छ।

मेरो प्रीय भाइ निर्मल, हामी तिमीलाई प्रत्येक दिन सम्झनेछौं। तिमीले आफ्नो जीवन साहस, दृढ संकल्प र करुणा सँगै आउँदा के सम्भव छ भनेर संसारलाई देखाउन समर्पित गर्यौ। तिमीले मानव क्षमताको सीमालाई चुनौती दियौ र विश्वभरका लाखौं मानिसहरूलाई ‘केही पनि असम्भव छैन’ भनेर विश्वास गर्न प्रेरित गर्यौ।

तिमीभन्दा जेठो दाइ भएकाले, म प्रायः तिम्रो सुरक्षालाई लिएर चिन्तित हुन्थेँ र कहिलेकाहीँ गाली पनि गर्थें; किनकि म तिमीलाई माया गर्थें र तिमी सकुशल घर फर्किएको हेर्न चाहन्थेँ। काश, मैले ती शब्दहरू तिमीलाई फेरि एकपटक भन्न पाएको भए। हाम्रा आमाबुबाले हामीलाई बलियो संस्कार, माया र परिवारप्रतिको सम्मानका साथ हुर्काउनुभयो, र हामीले कहिल्यै सोचेका थिएनौं कि हामीले तिमीलाई यति चाँडै बिदा गर्नुपर्नेछ।

यद्यपि हाम्रा मुटुहरू टुटेका छन्, तर हामीलाई तिमीप्रति अतुलनीय गर्व छ। तिम्रो विरासत सधैं जीवित रहनेछ।

तिमीले हाम्रो परिवारलाई गौरवान्वित बनायौ। तिमीले दाना गाउँलाई गौरवान्वित बनायौ। तिमीले म्याग्दी जिल्लालाई गौरवान्वित बनायौ। तिमीले धौलागिरीलाई गौरवान्वित बनायौ। तिमीले चितवनलाई गौरवान्वित बनायौ। तिमीले नेपाललाई गौरवान्वित बनायौ। तिमीले गोर्खा समुदायलाई गौरवान्वित बनायौ। तिमीले ब्रिटिश आर्मी र एसबीएस (SBS) लाई गौरवान्वित बनायौ। तिमीले शेर्पा र पर्वतारोहण समुदायलाई गौरवान्वित बनायौ। र सबैभन्दा माथि, तिमीले संसारभरका मानिसहरूलाई प्रेरित गर्यौ।

मेरो प्रीय कान्छा, मेरो बाबु, म तिमीलाई मेरो बाँकी जीवनभर माया गरिरहनेछु। तिमी सधैं मेरो मुटुमा रहनेछौ। म प्रार्थना गर्दछु कि यदि अर्को जीवन छ भने, भगवानले हामीलाई फेरि एउटै परिवारमा, फेरि दाजुभाइका रूपमा जन्मिने वरदान दिऊन्।

भगवानले तिम्रो सुन्दर आत्मालाई आशीर्वाद दिऊन्।
मेरो प्रीय भाइ कान्छा बाबु, तिम्रो आत्माले शान्ति पाओस्।

अन्तमा, मेरो हृदयको गहिराइदेखि नै विश्वभरका ती सबैलाई धन्यवाद दिन चाहन्छु जसले मलाई फोन गर्नुभयो, सन्देशहरू पठाउनुभयो, प्रार्थना गर्नुभयो र यस अध्यारो घडीमा हाम्रो परिवारको साथमा उभिनुभयो। तपाईंहरूको माया र सहयोग मेरो मुटुमा सधैं रहनेछ।

गहिरो कृतज्ञताका साथ,
तिम्रो मायालु दाइ,
कमल बहादुर पुर्जा